Read Konyak Naga HOSEA 6 Bible Online

HOSEA 6 - Konyak Naga bible

HOSEA 6

¹“Kei, Youngwanpa tangte leih yehah! Iye temante mayahtam, hüpoi ütingpa me Iye teman meitamlak; Iye temante ükosa, hüpoi teman makolante Iye nyeihtamlak, Iye yelinglak a?

²Nyih ni yejema-a nyih lüm mongme Iye teman mong lüpne tamphalak, hüyange I ompu me teman ngohlak.

³Youngwanpa shinglak jingne teman nganghah. Nyih üla ngaipu kih-e, hüyange waishuya keiye kahtokte yeng shokke tampu meimei kih-e I teman tangte peikülak.”

⁴“Ephraim hüyange Judah, Taowe numante hanghe lingne tamlak shi? Numan-e üte kenpuwa shommepu lümpem shinne mamshe ye-ngepe mah; tüopa-a wanghe ngaijang ngaiye mah taipu nyim kih-e mah.

⁵Tüojingne Taowe ü-hipalan numan tangte ngaophünpu hüyange mahtamlak ü-ngaolan phei shon. Taowe numan mepu hanghe yahhu, tüopa-a jaoshepu hüyange ütingpa hei ngohnang.

⁶Hangjingne numan jing yinmok toidopu yeje, numan-e yelakpe kenpu hei Taowe lengnang. Ü-kahtalan-e üte toiyange jakke dopu yeje tüoleima-a, Tao shingne tamhunang.

⁷“Hüpoi iman Adam kahmükte yupu phei jamshe, Taowe iman phei lingyangpu jiengjeppu iman-e meng.

⁸Gilead-a toilangpu hei kahta ümeng lan-e mapu chingnyu ja.

⁹Ngengpalan-a aoyin kuhleihpalan kahta jate dodoyange tanne ngoh, tüo kihwe. Shekhem üjao nyoite taipu lamnyu me nehoi iman-e toiyange ünu om. Hüyange iman-e tüopa-a shingjang shinge ling!

¹⁰Israel me Taowe fajümlihlakpa toishao ngeyangki. Ü-kahtalan-e iman nying nyingke peshaote yoppe khümpuwe nuweshak yangki.”

¹¹“Hüyange Judah kahtalan numan jingne-o, numan-e hanghe lingyangki tüopa jingne numante shaoshi yateng pha ne Taowe hipak ityangki.”