Read Konyak Naga HOSEA 7 Bible Online

HOSEA 7 - Konyak Naga bible

HOSEA 7

¹“Aope Taowe Israel meiyetamhu, hüwante Ephraim püohpu ünu hüyange Samaria toishao ümeng shinge peinang. Hangjingne iman-e lolam-e jon, hüyange kahpalan ümongte ongnang, hüyange nokshao me nyieleihpalan-e nyieleihnang.

²Hüpoi Taowe tüolan ünu khongkümpu teih tüokülak she iman jelote aope-o ye-ong; hüpoi iman jing ünuwe imante neikon, hüyange tüolan ye-ngepe Tao aope-o yengoh ok.”

³“Kahtalan-e ahngpa hüyange I phang me shaoshanpalante iman-e ümengpa me lowelam nang.

⁴Iman khongküm nunushe hüyange ngao yejai. Iman-e aohüngpuwa vün jüo me vünoun, hanghepa anlingpawe nyütpu an do ne manmeng manmeng vünte yeleih kheihpe ahngpu kih ngoh nang.

⁵Ahngpate pongyinpu nyih iman-e ahngpa hüyange Iphang mepu üyonglante jokne tam hüyange wuwüngti phei üngapa ne linge tam.

⁶Üting, iman-e lowelampuwe iman-e vünjüo kih-e sheamme tamnang. Wangnyak phapan iman mongshih ngaipuwa sheamme tamnang, hüyange napning hatüowa vünloong ne pah ngainang.”

⁷“Iman mongshih ngaipu üsheamme iman-e imanjing wanglam lampalan toinang. Imanjing ahngpalan-a ja phei me ja japhei me ja she mahne tamnang, hüpoi aowe-o jamlak jingne üte yeyop.”

⁸“Ephraim kahtalan-a üyang yemeipu an kih-e ngohnang. Iman-e iman neikonne ngohpu jatlante monghümnang,

⁹hüyange hükihwe mongneangpuwe iman wong ülao jatlante nyieyahne tamnang she iman-e yeteih tüoh. Iman jing nyih ityange ngoh nang, hüpoi iman-e tüopa shinge yenang.

¹⁰Iman phei tüi-e jamloipu Israel kahtalan-e üngwünnang. Shemin lamphe ngaiyang phei tokte, imanjing Kahwang Youngwanpa Ü-tangte iman lüppe üye.

¹¹Juteih yewangpu awshu kih-e Ephraim lünglei nang; jamlak yamme üwangne Egypt te nyik, tüophei me iman Assyria yamme phet!

¹²Tüoyangpoi Taowe shaan saalak hüyange awhalan phopu kih-e iman taiye ngohwante Taowe pholak. Iman-e lingyangpu ünu jingne Taowe imante shaoshi yatengne tamlak.

¹³“Iman-a mahnang! Iman-e Tao tüoh hüyange ü-phei tüi-e hokkewenang. Iman-a mahtamlak. Taowe iman-a yinne tamhuwe teih, hüpoi iman-e üte yoppe khümpuwa tahleih ne meng.

¹⁴Iman-e üte innenyaipu phei yeyop, hüpoi hüke linghah shepu nanleiye iman nying nyingke lüppe iye hüyange ülao jatlan-e lingpu kih-e shappe yong. Aope iman-e tahlick hüyange wuwüngti jingne yop, ülao jatlan-e lingpu kih-e iman-e yoi pümte üko sha. Iman-a hangke hokkewepu?

¹⁵Aowe iman yahngai hüyange iman wongnangne tampupa ne Tao jeyapeyoi, iman-e Ü-phei tüi-e yong nang.

¹⁶Wong yenangpu kahwang tangte taiye iman ü-mepu yelakpe lüppe tainang. Iman-a yetingpu wenglah shinne mengmah. Iman jing woipalan-e jamloipu ngaopu jingne iman-a yakphei lükpu me lilak, hüyange Egyptlan-e nyitamlak.”