Read Konyak Naga HOSEA 9 Bible Online

HOSEA 9 - Konyak Naga bible

HOSEA 9

¹Israel kahtalan, ülao jatlan kih-e numan motappu mepu laktüoh. Numan Kahwang mepu numan lüppe tai hüyange Ite üting yelak. Kahmük nopu me numan-e numan nying nyingke üshoyüopalan kih-e Baal kahwangte yüo; hüyange Iye numante pha nang she teihpu tahlick te kenyangki.

²Mamshe muh numan me tahlick hei olive minnga wange yengohlak; hüyange wuwüngti yengohlak.

³Ephraim kahtalan-a Youngwanpa jing kahmük me ngoh yewalak, hüpoi Egypt te leih yelak hüyange Assyria me yejaoyeshapu hahying hahne ngailak.

⁴Tüolan kahheng kahmük me iman-e Youngwanpate wuwüngti dopu yepha oklak, yejema-a iman-e toidopu I tangte yah peipu ye-oklak. Iman jing hahyinga mang muwante hahpu hahying kih-e aoyinne tüopa hahlakei nushakteiye ngohlak. Tüopa-a iman seanyao meilak jingne hei hahlak; tüomepu hanghe-o Youngwanpa khümjingte dopu ja leye yepeilak.

⁵Aope Youngwanpate yihnoonpu mo itpu nyih peilakeih hüma-a iman-e hanghe linglak?

⁶Aope mahtampupa peilakeih, hüyange kahtalan yanne tamlakei, Egyptlan-e iman-a shaijemlak, iman shaijempuwa Memphis me muwe tamlak jingne jemlak! Imanjing khüm, shengngin hüyange hipak ja me iman jing nok yongyange ngohyangpu nyoilan me phümha hüyange ühuh-phümtümp lan-e yüohlak.

⁷Shaoshiyateng phalak jingne hipak peiteki, aope kahtalan-e iman-e hanghe tüolak ne ngoh tüolakpa hipak. Aope tüopa ngailakei, Israel-e tüopa shinglak! “Tüopa hipa,” nange ipuwa üngapa. Tüopawe hengetampu kahta-a ngayounpu. Numan kahtalan-e üte loishe aohüng hangjingne ima-a numan ünuwa jamloi.

⁸Kahwange taowa hipa ja ne, Ijing Ephraim kahtalante deingao phalak jingne shon. Tüoyangpoi ümeken yete tao tailakei, numan-e awha ja kih-e üte tün tün ne ngang nang. Kahwangpa yoijing kahmük me kahtalan-a hipatepu wepane ngohnang.

⁹Iman Gibeah me ngohwantepu kih, iman-e hanghe ling tüopa me iman-a jamloi ünune ngohnang. Kahwange iman-e lingpu ünu teih tüolak hüyange tüopa jingne imante shaoshi yateng phalak.

¹⁰“Aope Taowe üwangne Israel tüo, tüopa-a wanwüngjeng me wuwünglick ngaiye ngohpukih tüoyangki. Aope Taowe üwangne numanjing pajeiyonglan nge, tüopa-a juwan me lickke yimpu üwangpa phuklick ngepu kih-e ngoh. Hüpoi aope iman Peor kahtangte pei, iman-e Baalte yoppe khümne wang, mamshe iman-e kahwanglante lengpuwe dakne menge mah.

¹¹Ephraim kheyongpuwa awha kih-e puwe taimahlak, hüyange iman me shaaji moipaipu yengohlak, shekolan püm yekengpu shaaji yengohlak, naowompu shaaji yengohlak.

¹²Iman me moipai yapeyoi, Taowe iman-a yahteilak hüyange sheja nehoi üyin ngohne yetamlak. Aope Taowe tüolan kahta winlakei, iman tangme yawinmongpaipu ngailak.”

¹³Taowe ngepeipuwa, nyoimei me deipu Tyre kih-e Ephraim ngohnang; hüpoi Ephraim me yoi hayimlan toilanglaklan tangte woi teilak.

¹⁴Tüolan kahtalante linge tamlak jingne taowe nangte hanghe tonglak? Iman jing shekolan ükengne menge tamtüoh! Imanjing naotak halante yepao oklak ne düam yengaipe lingtam tüoh!

¹⁵“Iman-e lingpu toimeng khongküm Gilgal me ükongwang. Tüoken me Taowe imante nune wang. Hüyange iman-e lingyangpu ünu jingne, Taowe ü-kahmük mepu iman jange teilak. Taowe imante shaaji yekenlak; iman jing woipalan khongküm ü-phei tüi-e hokke we nang.

¹⁶Ephraim kahtalan-a hanghepa pee yalah wanne mahteiye hüyange ülick yelick okpu peephao ja leye ngohnang. Iman me moipaipu yengohlak, iman me moipaipu ngohyapoi, iman-e kenpu hayimlan-a Taowe toitamlak.”

¹⁷Taowe shaoshanpu Kahwange yoi kahtalan yeyahlak, hangjingne ima-a iman-e Ite yejai. Jatlan yome iman-a yayounpa ne menglak.