Read Konyak Naga JOEL 1 Bible Online

JOEL 1 - Konyak Naga bible

JOEL 1

¹Hatüowa Pethuel üha Joelte Youngwanpa mepu ngaolan peipu:

²Mong phayah, numan lwngmei kahtalan: Judah me ngohpu moilan-e na shongyange jaiyah. Numan hipak me yejema-a numan payimlan hipak me hükihpu aope-o jü-ngai man?

³Tüopa jeng numan jing hayimlante itüoh; iman-e imanjing hayimlante ilak, iman-e üne-o ünepupa jinte ilak.

⁴Nyaodukh-e hanghepa towetüoh, dukdan-e hahküm; hüyange dukdan-e hanghepa towe tüoh, düoduk-e hahküm; hüyange düoduk-e hanghepa towetüoh dukshom-e hahküm.

⁵Numan jokpalan, lüotüoh hüyange shaptüoh; numan wuwüngti yingpalan, üngwüntüoh; wuwüngti üla ne linglak wuwünglick menge winteki.

⁶Nyahpong üngang kihpu nyaodukhwe ü-kahmükte shümnang; iman yeonge wongnang hüyange ipu yekümpe; iman jing fa-a yengkong mailanglan fa shinne nahnang.

⁷Iman-e üjing wuwüngwu mengetam hüyange üjing phukpeelan hahküm. üquilan he-enge manngai manngai iman-e pesho khokke tamteki.

⁸Naoyha ja aowe yha toitai ne she ngohpu kahta ja lipute shappe yoong tüokih-e shaptüoh.

⁹Khümjing me dolak jingne tahlick yejema-a wuwüngti yenang; ngengpalan shappe yoongnang hangjingne ima-a iman-e Youngwanpate toidolak yenang.

¹⁰Kah-a ükengne mengteki; kahtok shappe yoongnang, hangjingne ima-a tahlick mengetam teki, wuwünglick wanne mah, hüyange olive peelan kuikümteki.

¹¹Numan kahhampalan, mongshang mongmeng tüoh; numan wuwüngkah te paowe tükpalan, üngwünne wao eatüoh, hangjingne, wheat hei barley jingne, ütingme ülick lili mengkümteki.

¹²Wuwüngwu hüyange phukpeelan kuiteki; chamuk, loklick, hüyange shangfai, ülick pheipu pee lili wong yenangpe kui hüyange liteki. Ütingha me kahtalan hoongli mongongpu taiteki.

¹³Monnye intüoh hüyange shaptüoh, numan ngengpalan aoyinne wümjong me shaoshan! Khümjingte ongtüoh hüyange wangnyak phapan shappe yoongtüoh! Numan-e Kahwangte dolak tahlick yejema-a wuwüngti hango yenang.

¹⁴Nyaowelelak jingne ngaokeng phatüoh; Chingjem ne nyiktüoh! Woipalan jemne tamtüoh hüyange kahmük kahtalan khongküm numan Youngwanpa Kahwang khümjing me hüyange Youngwanpate üngwün tamtüoh.

¹⁵Tüopa nyih jingne onyukei! Hangjingne Youngwanpa nyih-a ü-o me ngohnang; hüyange üshei okpupa mepu mahtamlak kih-e hatüowa heipeilak.

¹⁶Teman jing deihaliha menge tamtüoh-e, teman yanglak ne ye-nge. Teman Kahwang Khümjing me mongong monglepu shaaji yenang.

¹⁷Ülilan-a kahtok üwan me liteki; yowe anglak jingne shaaji tahlick yenang; tüokhei bung ükenglan-a heamteiye ngohnang.

¹⁸Mahulan-a shaoshi teiye wao ea-nang, hangjingne ima-a iman jingne hahnyoi yenang; hüke muh nyee ükhonglan-o shaoshi nang.

¹⁹Youngwanpa, taowe nangte üngwün nang, hangjingne ima-a hüke vünne imante pahtampu kih-e, hahnyoilan hüyange peelan-a wanne mah.

²⁰Phao yinmoklan nehoi nangte üngwün nang, hangjingne ima-a yengyinlan-o eaye mah, hüyange vün-e wanwüng jeng heeijong nyoilan shukümteki.