Read Konyak Naga JOEL 2 Bible Online

JOEL 2 - Konyak Naga bible

JOEL 2

¹Zion me nyawong wüngtüoh, Kahwangpa üjao kahtang me langpheng tüoh. Nintüoh, kahmük me nyoipu kahtalan üshei! Youngwanpa nyih-a mamshe peiküki.

²Tüopa-a wangnyak hüyange wangmangpu nyih, nyakke hüyange wangphom nyeihpu nyih ne menglak. Kahtang tangme wangnyakke peipu kih, nyaodukh nyahpong ükhong üyong peiküki. Tüopa kih-e ülang aope-o hango manngai, hüyange üne hüke aope-o yengailak.

³Vün kih-e iman-e phümhalan hahshu nang. Iman sheshao me kahmük-a Eden pesha kih-e, hüpoi iman tokphei me-a tüopa-a hango yenangpu wanwüng jengne meng. Iman mepu-a hango yeyin ok.

⁴Leilak müklei me iman-a koiponglan kih; iman-a wehok koiponglan kih phet nang.

⁵Kahtang shedaopu me iman pah wante, imanjing yangwünga pongtongtoi wüng kih-e; Vün sheshao me wantephei hüng shumahpu kih-e iman-e khüppe hah tainang. Iman-a shapju jingne nyahpong ükhong üyong tümpu kih-e khüng lienge yong.

⁶Iman owe peipu me, moilan fajümlih nang; sheta lili kui mah.

⁷Naomeilan kih-e iman-e shümnang, wetaipalan kih-e iman-e jantpenyu te ongnang. Iman khongkümpuwe tingkhakke shaoyete kemnang hüyange taipuye yejeilei;

⁸Yejema-a eiha jing tailamte yeyong. Tukke kotyangpu khongküm lüowe iman hütnang, hüyange hanghe-o imante laktam ne ye-ok.

⁹Chingnyu tangme iman pahnang; jantpenyu tangme iman kemnang, nok tangme iman phoonge ongnang, hüyange kuhpa kih-e tawo kaiye ümongte ongnang.

¹⁰Iman sheshao me kahtok po nang, hüyange wangdange ninnang. Wanghe hei linnyu nyakke mah, hüyange shanhalan-e shaaji ütee yepha.

¹¹Youngwanpawe yoijing nyahponglante wangkhong pukih ngaokeng pha. Tümyangpu ükhong I ngao jaipalan-a üngang hüyange wongnang puphei. Youngwanpa Nyih-a hangshin fajümlihlakpa! Aowe tüopa me yongpu oklak?

¹²Youngwanpawe inang, “Hüpoi sha-a nehoi,” “Innyaipu phei monglüp tüoh hüyange nyaoweleye hüyange shappe hüyange mang shappe ü-tangte lüppe yetüoh.

¹³Numan inkhek hitpu me yeje, numan mongjang paipuwe numan mongmengpu hüotüoh.” Numan Kahwang Youngwanpa tangte leih yetüoh. I-a yayeng puphei hüyange shüpsheye maawe ngohnang; I-a nün okpu phei hüyange Iye janyangpu angnang. I-a shaoshi yateng phalak jingne yeje, hüpoi jinte ümeng winlak jingne tümyange ngohnang.

¹⁴Aowe shingpu numan Kahwang Youngwanpa I mong jeilei ne ok hüyange numante ülick wangman-e moimanne ok. Hüwante numan-e tahlick hüyange wuwüngti do ne ok.

¹⁵Zion kahtang me nyawong wüngtüoh; nyaolelak jingne ngaokeng phatüoh, hüyange chingjem ne nyiktüoh!

¹⁶Kahtalan jamshe jemtüoh; üjao jempu ja jingne iman tümtüoh; puyonglan peitam tüoh; nahalan jemtam tüoh hüyange düam hahpu naotak halan-o jemtam tüoh. Nokyampu üla nyemnya hei nyemthe ni nehoi iman jing tüp tüohyange ngaitüoh.

¹⁷Khümjing taten hei wümjong nipa me Youngwanpa shaoshanpu ngengpalan shapyange hüke yoplak yang: “O Youngwanpa, nang kahtalan tangme shüpshe pha. ‘Numan Kahwang ümeken me ngohnangki’ she iye ülao jatlan-e tomante yaoweleye hüyange phoiwümne tahtampha.”

¹⁸Hüwante Youngwanpawe yoi kahmük jingne teihtüopu ja hüo; Iye yoi kahtalante shüpshe.

¹⁹Iye imante jan: “Sha-a Taowe numante tahlick hei wuwüngti hüyange olive minnga phalak, hüyange numan mongme hulak. Ülao jatlan-e shaaji numante yaoweleye yelinglak.

²⁰“Apyekao mepu peipu nyaodukh nyahponglan-a Taowe yahteilak hüyange iman yo mepu ütam-a wanwüng jengte jange teilak. Sheshao yemepu iman ükhonga heong yengchingte hüyange tokphei yemepu iman ükhonga Mediterranean te jange teilak. Iman lipu mange ünam pelak. Iman-e numante lingyangpu khongkümpu jingne Taowe iman mahtamlak.

²¹“O kahmük, nyamme tahteih, hüpoi mongmei yah hüyange hoongli mongong yah; hangjingne ima-a Youngwanpawe numan jingne lingyangpu khongkümpu jingne!

²²Kahmüktepu yinmoklan, nyamme tahteih. Hahnyoilan-a (heeijong) hü-ünge; pelickjonge ülick licktam nang; hüyange phuklick hei wuwünglicklan üngang ngohnang.

²³“Mongong mongleye ngohyah, Zion kahtalan. Numan jing Kahwang Youngwanpawe numan jingne hanghepa linge tam tüopate mongmei yah. Iye numante laojee wai khakshuwe phateki; Iye numan jingne eanyu wai shokke tamteki, hüyange üshongpu kih muh lümlei wai phateki.

²⁴“Tahnoijing lanme tahlickke maawe ngohlak, ngütpu nyoi shongmepu kahkooklan-a wuwüngti hei olive minngawe maa phailak.

²⁵Lintepu wangpenglan me hanghepa nyaodukh üngang hütyange numan jing deihaliha hahwin numan-e hanghepa mahyangki Taowe numante leih phalak; Aowe numan phei tüi-e tüolan nyahponglan shon tüowa Tao ngohnang.

²⁶“Sha-a numan-e hahyinglak jingne üngang ngohlak, hüyange mongme hulak. Numan-e numan Kahwang Youngwanpa aowe numan jingne yashanyalipu toishao ling Ite yihlulak. Ü-kahtalan shaaji nishe yaowele ne yetamlak.

²⁷Hüwante, Israel numan-e Taowa numan yo me ngohnang, hüyange Tao, Youngwanpa, Taowa numan Kahwang she hüyange ülao ao-o yenang she shinglak. Ü-kahtalan-a shaaji nishe yaoweleye yelinglak.”

²⁸“Hüyange pheime hatüo ngailak, Taowe mei lili tangme ü-yaha shokke tamlak. Numanjing hala hüyange yhalalan-e hi-ngao itlak. Numanjing wupalan-e mangmanglak, hüyange numanjing shelalan-e himang ngelak.

²⁹Tüopa nyih hipak me Ü-shao shanpalan sheko hüyange netanlan moilante Taowe ü-yaha shokke tamlak.”

³⁰“Taowe wangme hüyange kahtok me yashanyali phalak; iy, vün, hüyange vünkhuh wangphom shinne nyeihlak.

³¹Fajümlihlakpa Youngwanpa Nyih üyong sheshao me wanghe nyaklak, hüyange linnyu iy shinne taakke ngailak.

³²Hüpoi jamlak jingne aoyinne Youngwanpate tonglakei khongkümpu yinlak. Hüke Youngwanpa ipuke, ‘Ütam Jerusalem me yinlak; aoyinte Taowe le yinpu oklak.’”