Read Konyak Naga JOEL 3 Bible Online

JOEL 3 - Konyak Naga bible

JOEL 3

¹Tüojingne, tüohipak me aope Taowe Judah hüyange Jerusalem jaalunpu linge yelakei;

²Taowe jatlan üshei shaijemlak hüyange ngaophün Kahjee me iman yah peilak. Tüoken me iman-e ü-kahtalante lingyangpu khongkümpu jingne Taowe imante ngaophünlak. Iman-e Israel kahtalan-a ülao jatlan me yanne tam, hüyange ü-kahmük Israel tamme yah.

³Phowe teiye angpalan, aoyinne yahlak, shinglak jingne iman-e phongyeng. Iman-e üsho yüopulan hüyange wuwüngti te phalak jingne naoshe hüyange naoyhalan rha ne yüo.

⁴“Numan-e üte hanghe lingne nganghümpu shi, O Tyre, Sidon, hüyange Philistia yenghoilan? Numan-e üte ülam ja jingne shümme yene ngang hümpu a? Numan hüke ngangpu ne mengma-a, Taowe numante mamshe phawe yelak!

⁵Numan-e üjing hon hei khüm yah hüyange üjing hakke-hepu toinyu nanha numan jing khümjinglante kitei.

⁶Numan-e Judah hüyange Jerusalem kahtalan iman kahmük mepu üjaite yahtei hüyange Greeklante iman yüowe tam.

⁷Sha-a ümeken nyoilan me numan-e iman yüowe tam tüolan nyoi mepu Taowe iman yah yelak. Numan-e imante hanghe linge tam tüopa Taowe numante linglak.

⁸Taowe numan jing hala hei yhalalan Judah kahtalante yüone tamlak; iman-e jam iman-a üjai mepu Sabealante yüolak. Tao Youngwanpawe ngaoyangki.”

⁹“Jatlan yo me tüopa ngao jaine tamtüoh: Wehok jingne tümyah, numanjing naomeilante nyiktüoh; Numanjing wetaipalan khongküm jemtam tüoh hüyange yayongtüoh!

¹⁰Numan-e kahhoklak yan phei yanglow ne jobtüoh, hüyange phaoheap yanghawe ngou ne jobtüoh; wong yenangpupawe nehoi taowa naomei she ine tamtüoh.”

¹¹Mamyah hüyange peikei, neikonne ngohpu numan jatlan, hüyange kahjee me jemtüoh. O Youngwanpa, imante shümlak jingne nangjing nyahponglan shontam tüoh.

¹²“Jatlan iman nying nyingke tümtayange yongne tamtüoh, hüyange Ngaophün Kahjee te peitüoh. Tüoken me, Tao, Youngwanpawe, neikonpu jatlan üsheite ngaophünlak jingne shotlak.

¹³Yangkoih jontüoh, hangjingne tah-a nyinteki. Ongtüoh, ngümtüoh, hangjingne wuwüngti ngütjing maateki. Yengto maawe phai nang, hangjingne iman nuweshakpuwa jamloi nang.”

¹⁴Haja tokte haja , Hahjieng Kahjee me ngohnang. Tüoken me Youngwanpa nyih mamshe peilak.

¹⁵Wanghe hüyange linnyu nyakke ngai, hüyange shanhalan-e shaaji wangngai yepha.

¹⁶Youngwanpawe Zion Kahtang mepu wao; I ngaowüng Jerusalem mepu khunge tam; kah hei wang ninnepo. Hüpoi Iye yoi kahtalan-a yinne tamlak. Israel jingne wongnangpu lojing.

¹⁷“Hüwante numan-e Taowa Youngwanpa she shinglak. Taowa Zion, Ü-üjao kahtang me nyoi nang. Jerusalem üjao chingnyu ne menglak; ülao jatlan-e aope-o tüopa nishe chinghah ne ye-oklak.”

¹⁸Tüo nyih me kahtanglan-a wuwüngwuwe maalak, hüyange kahtang lili me düamyeng yünlak; hüyange Judah jing yengpeiwo lili me yeng wangmanne ngohlak. Hüyange Youngwanpa Khümjing mepu yengyin ja yünne talak, hüyange tüopawe Acacia kahjeete yeng shokke tamlak.

¹⁹“Egypt wanwüng jeng ja ne menglak, hüyange Edom heamteiye winne tüohpu nyoi ne menglak, hangjingne iman-e Judah kahmük kahtalante shüm, hüyange tüomepu ümeng yenangpu kahtalan iy shaitam.

²⁰Hüpoi Judah jintepu jingne nyoilak, hüyange Jerusalem jin üshei me ngohlak.

²¹Aoyin iy shaiyangki tüolan jingne Taowe phuh hahlak, püohpa-a Taowe yetüohlak; hüyange Tao Youngwanpa-a, Zion kahtang me nyoilak.”