Read Konyak Naga AMOS 1 Bible Online

AMOS 1 - Konyak Naga bible

AMOS 1

¹Hatüowa Tekoa jila mepu nyeeyompa Amos ngaolan ngohnang. Minwe leilak wangpeng ni sheshao me, aope Judah me Uzziah hüyange Israel me Jehoash üha Jeroboam ahngne ngoh, Kahwange Israel jeng tüolan toishao khongkümpu Amoste ütahte ngaitam:

²Iye i, “Youngwanpawe Zion Kahtang mepu wao; I ngaowüng Jerusalem mepu khungtam. Hahnyoilan (heeijong) wanne mah, hüyange Carmel Kahtang mepu phümhalan nyanshienge wanne mah.”

³Youngwanpawe inang: “Damascus kahtalan-e ngaokeng mengpu lüm jingne, hüke peli jingne, taowe shangne tampuwa yah yeteilak. Iman-e Gilead kahtalante loishe nyimmenge yansho jon.

⁴Tüokhei Ahngpa Hazaelwe wepu ahngnokte Taowe vün shonlak hüyange Ahngpa Benhadadwe meipe latyang phei Taowe jakke tamlak.

⁵Taowe Damascus chingnyu peten lüohwinlak hüyange Aven Kahjee me nyoipalan hüyange Betheden wanglam lampalan teine tamlak. Syria kahtalan-a Kir kahmükte phowe teikümlak,” she Youngwanpawe inang.

⁶Youngwanpawe inang, “Gaza kahtalan-e ngaokeng mengpu lüm jingne hüke peli jingne Taowe ütingpa me imante shaoshi yatengne tamlak. Iman-e jat noshepu yahtei hüyange Edom kahtalante rha ne iman yaowe tam.

⁷Tüokhei Taowe Gaza chingnyu jantpenyu tangme vün shonlak hüyange tüopa meipe latyangpu jakke tamlak.

⁸Ashdod hüyange Ashkelon chingnyulan mepu woipalan Taowe yahteilak. Taowe Ekron chingnyute shaoshi yateng phalak, hüyange Philistialan aoyin tüoh khongkümpu lilak,” she Youngwanpa Kahwange inang.

⁹Youngwanpawe hüke inang, “Tyre kahtalan-e ngaokeng mengpu lüm jingne hüke peli jingne Taowe ütingpa me imante shaoshi yateng phalak. Iman-e jat khongkümpu noshepu Edom kahmükte phowe yahtei, hüyange shümpa ne menglak jingne iman-e teijanpu ye-ang.

¹⁰Tüokhei Taowe Tyre chingnyu jantpenyute vün shonlak hüyange tüopa me meipe latyange ngohpu jakke tamlak.”

¹¹Youngwanpawe hüke inang, “Edom kahtalan-e ngaokeng mengpu lüm jingne hüke peli jingne Taowe ütingpa me imante shaoshi yateng phalak. Iman-e iman jing jeiheinao Israellante jang, hüyange imante shüpshe yehüo. Iman mongshih ngaipu yelak, hüyange iman-e tüopa aope-o mah ne yetam.

¹²Tüokhei Taowe Teman chingnyu tangme vün shonlak, hüyange Bozrah meipe latyangpulan jakke tamlak.”

¹³Youngwanpawe hüke inang, “Ammon kahtalan-e ngaokeng mengpu lüm jingne hüke peli jingne ütingpa me Taowe imante shaoshi yateng phalak. Iman wehokpu me yikeng ünyei omlak nanjingne Gilead me iman-e pümyekengpu shekolante nehoi toimeng ling.

¹⁴Tüokhei Rabbah chingnyu jantpenyu tangme Taowe vün shonlak hüyange tüopa tepu meipe latyangpu jakke tamlak. Hüwante shapju pongpu nyih üngwünpu ngohlak, hüyange wehokpuwa waishihwangkhah kih-e shihkhah lak.

¹⁵Hüwante imanjing ahngpa hüyange Imepu woipalan phowe teipu me ngohlak, she Youngwanpawe inang.”