Read Konyak Naga AMOS 2 Bible Online

AMOS 2 - Konyak Naga bible

AMOS 2

¹Youngwanpawe hüke inang, “Moab kahtalan-e ngaokeng mengpu lüm jingne hüke peli jingne Taowe ütingpa me imante shaoshi yateng phalak. Iman-e Edom ahngpa waan vünla ne menge jakke tampuwe iman-e yaowelepu hüo.

²Taowe Moab kahmük tangme vün shonlak hüyange meipe latyangpu Kerioth jakke winlak. Aope wetaipalan-e üngwünne hüyange nyawonglan wünge tamlakei, Moab kahtalan lilak.

³Taowe Moab wanglam lampalan hüyange kahmük mepu woipalan khongküm toilak, she Youngwanpawe inang.”

⁴Youngwanpawe hüke inang, “Judah kahtalan-e ngaokeng mengpu lüm jingne hüke peli jingne Taowe ütingpa me imante shaoshi yateng phalak. Iman-e Taowe nyüowe tampulante ye-i-yeshepe ling hüyange ü-ngaokhümlan yejon, iman jing pajeiyonglan-e shaoshanyangpu tahleih kahwanglan jatemuh iman-a püoh woine tam.

⁵Tüokhei Judah tangme Taowe vün shonlak, hüyange meipe latyangpu Jerusalem jakke tamlak.”

⁶Youngwanpawe hüke inang, “Israel kahtalan-e ngaokeng mengpu lüm jingne hüke peli jingne Taowe imante ütingpa me shaoshi yateng phalak. Iman-e ütingpa kahtalan aoyinne imanjing pheeisea üpha ok, toinanpa kahtalan aoyinne yashom ümee nehoi phawe yeye-okpulan ngoh, rha ne yaowe tam.

⁷Iman-e wong yenangpu hüyange mokh ye-okpulante ya lokke tam hüyange toinanpalan-a tailam mepu shunge win. Ipa hei Iha niye rha nyu ja temuh phwngngampu jon, tüokaiye ü-üjaopa min nuweshakke tam.

⁸Yoppe khümpu nyoijing lili me toinanpalan mepu pheeisea nanleiye yahpu inkhek tangme kahtalan shi. Aoyinne iman mepu ngin sea yah yapeih tüolan mepu yahpu wuwüngti imanjing Kahwang khümjing me iman-e ying.”

⁹“Tüoyangpoi, ü-kahtalan numan jingne Taowe Amorlan, aoyin kahtalan cedar pee shinne dao hüyange longkhampee shinne wongnang ütang mepu ülick hüyange ümai mepu yalah me linne lanshe mahtam.

¹⁰Taowe numan Egypt mepu yah ngai, wangpeng deli mongme wanwüng jeng kaiye numan woi, hüyange Amorlan kahmük numan jingne numante pha.

¹¹Numan jing hayimlan ütam hipa ne menglak jingne, hüyange numan jing naoshelan ütam jaosheye ngohlak jingne Taowe le, hatüowa ütingne yejepu a, Israel kahtalan? Tao, Youngwanpawe ngaoyangki.

¹²Hüpoi jaoshe ngohpate numan-e wuwüngti yingne tam, hüyange hipalante ü-ngaolan yengaolak jingne ngaokeng pha.

¹³Tüokhei sha-a Taowe numan-a kahtok phei nyütte tamlak, hüyange tahlick-e maayangpu shümsa tepu kih-e numante shu-ngümlak.

¹⁴Phetpu she-okpupa nehoi yeyin oklak; wongnangpu kahtalan-e iman wong mahlak, hüyange wetaipalan-e iman üyin nehoi yinpu ye-oklak.

¹⁵Wenglah pheipu kahtalan wongnange yeyong oklak, phette okpalan taiye ye-oklak, hüyange koipong tok mepu kahtalan iman üyin yinpu ye-oklak.

¹⁶Tüopa nyih me mong sheyongpu naomeilan nehoi iman jing yonglah yeitüohlak hüyange phetlak.” Youngwanpawe ngaoyangki.