Read Konyak Naga AMOS 3 Bible Online

AMOS 3 - Konyak Naga bible

AMOS 3

¹Youngwanpawe nang phei tüi-e ngaopu tüopa ngao jaitüoh, O Isreal kahtalan Egypt mepu Taowe yahngaipu nokphong nopu phei tüi-e:

²“Kahtoknyu jatlan üshei yo mepu, Taowe shingpu hüyange paowe tükpuwa nangja shing; tüojingne Taowe numante tüolan üno jingne shaoshi yateng phalak.”

³Mongjam yange teingaopu yenangpute kahta ni yinkem lak a?

⁴Iye hahlak yetüopute yengkong mailange phao me waolak a? Iye hango yehah pute yengkong mailang ühawe yoi longsa me waolak a?

⁵Kahtok me tün tünne ye-angpute awha ja tün me lilak a? Ülamjawe yepotam pute kahtok mepu hankhak shümlak a?

⁶Kahtalan nyamne yetamlakte chingnyu ja me wehok nyawong wünglak a? Youngwanpawe yeshonpute chingnyu ja te mahshümpu ngailak a?

⁷Yoi shaoshanpa hipalan te-a yoi teihpu ngaiye yetampute Youngwanpa Kahwange hango yeling.

⁸Yengkong mailange waoteki; aowe yenyamlak? Youngwanpa Kahwange ngaoyangki; aowe hingao yengaope ngoh oklak?

⁹Aoyin Egypt hüyange Ashdod ahngnokyin me ngoh, imante shingne tamtüoh: “Samaria neikonpu kahtanglan me jamshe jemtüoh hüyange moppu üyong hüyange tüoken me püohpinpu lingpute leitüoh.”

¹⁰Youngwanpawe inang, “Tüolan kahtalan-e nyieleih-e hüyange yakphei lükke yahpu toilanne imanjing tungheinoong maa. Hangke innenyailak tüo nehoi iman-e yeshing.

¹¹Tüojingne Ütahpa Youngwanpawe inang: imanjing kahmük-a wepalan-e neikonlak, imanjing meipe latyangpulan-a menge tamlak, hüyange imanjing tungnoonga nyieyahlak.”

¹²Youngwanpawe inang, “Yengkong mailange hahyangpu nyee yashok ni yejema-a üna ja hei nyeeyompawe tüopu kih-e, tüokih-e sha-a aoyin shitte phowe tümyang phei nyoiphan me ngohpu Samaria kahtalan-a üjingha hei yinlak.

¹³Sha-a jaiyah, hüyange Jacob huhayimlante deingao phatüoh,” she Ütahpa Youngwanpa Kahwange inang.

¹⁴“Iman ünu jingne aope nyih Taowe Israel kahtalante shaoshi yateng phalakei. Bethel mepu wümjonglan Taowe menge tamlak. Wümjong üwong lili paikhoihlak hüyange kahtokte yeitamlak.

¹⁵Eanyu jingne hüyange jüo jingne wepu noklan Taowe menge winlak. Meinyu fa phei tümtayangpu noknyulan heamme toitalak; noknyu lili menge mahtamlak, she Youngwanpawe inang.”