Read Konyak Naga AMOS 4 Bible Online

AMOS 4 - Konyak Naga bible

AMOS 4

¹Tüopa ngao jaiyah, numan Bashan mahulan, numan Samaria kahtang me ngohpalan; numan-e toihalante shaoshiyateng phanang, ye-ok yeshangpalante yamai-e lok tainang, hüyange numan netanpa lante, “Yah peikei, teman-e yinghah!” she inang.

²Hüke Youngwanpa Kahwang üjaopa me ngohtepuwe, Iye jan, “Iman-e numan yankeih phei shulak nyihlan peikülak; numan lili yankeihte ongpu nyah kih-e ngohlak.

³Hüyange numan-a kahta lili tingkhakke yha shao me khüo tepu jant te onglak; hüyange numan Harmon me shüp tüohlak; she Youngwanpawe inang.”

⁴“Bethel üjao nyoite taitüoh hüyange ünu lingtüoh! Gilgalte taitüoh hüyange numan wong sotkümme ünu lingtüoh! Nap ja phei me ja she toidopu phalak jingne yinmoklan yah-e ja peitüoh, hüyange nyih lüm shepupa lep iye numan jing penphong dopu yah peitüoh.

⁵Kahwangte minyong phawe dopu an phawe ja ngohtüoh, hüyange numan-e dolak jingne ünyei yah peipu jingne otayah! Tüolan-a numan-e linglak jingne kenne teihpu toishaolan ngoh nang.” Youngwanpa Kahwange inang.

⁶“Numan chingnyulante aowe seanyao yengle yahpei tüopa-a Tao ne ngohyangki, tüoyangpoi numan ü-tangte leih üye, she Youngwanpawe inang.

⁷Hüyange tah yah eipe leat lüm üne-o ngohwante, Taowe numan mepu wai tükke ang. Chingnyu ja te Taowe wai shon, hüpoi ülao jate yeshon. Kah jate wai keine tam, hüpoi ülao kah ja-a wanne mahne tam.

⁸Yengleye wong yenangpe, chingnyulan mepu kahtalan chingnyu ja tangte, ümeken me yeng tüolak she iman-e monghüm tüokente jem, hüpoi yinglak jingne wange yenang. Tüoyangpoi numan ü-tangte leih üye,” she Youngwanpawe inang.

⁹“Numan jing deihaliha wanne mahtamlak jingne Taowe wangyang ümeng shon. Numanjing pesha hüyange wuwüngkah, numan jing phuklick pee hüyange olive peelan khongkümpu hah tamlak jingne Taowe nyaodukh shon. Tüoyangpoi numan ü-tangte leih üye, she Youngwanpawe inang.”

¹⁰“Egypt me Taowe shonpu kih-e, Taowe numan tangme daktin ümeng ja shon. Yanglow phei Taowe numan naoshelan toine tam hüyange numan jing koiponglan yahtei. Numan jing lakjing me lipu mangnam pepuwe numan nateang phüngne Taowe tam. Tüoyangpoi numan ü-tangte leih üye, she Youngwanpawe nang.”

¹¹“Sodom hei Gomorrah mahtampu kih-e Taowe numan ütam mahtam. Numan aoyin yinpu okyangki tüolan-a vün mepu yinpu vüntong (ajeng) kih-e yinyangki. Tüoyangpoi numan ü-tangte leih üye,” she Youngwanpawe i.

¹²“Tüokhei O Israel, hüke taowe nangte linglak; Taowe nangte hatüo linglak ngohtepuwe, nang Kahwang phei hüone tümyah, O Israel!”

¹³Aowe kahtanglan ling hüyange wangyang linge ngai tüopa-a Kahwang. I juteih hangko kahtate Iye shingne tamnang; wangngai-a wangnyak ne Iye jeilei tamnang. Kahtoknyu shedaopupa tangme I kemnang. Ütahpa Youngwanpa Kahwang: hatüowa I min ngoh nang!