Read Konyak Naga AMOS 5 Bible Online

AMOS 5 - Konyak Naga bible

AMOS 5

¹O Israel nokphong, Taowe numan tangme hanghepa manglüng hem lokke tamnang jaiyah:

²Israel yhashaoha toitateki, nishe aope-o ülao oklak ne! Yha kahtokte wekewa lamtateki, Hüyange aowe-o yha loiyahpu yenang.

³Youngwanpa Kahwange i, “Israel mepu chingnyu jawe, wetaipalan haja shonne tei, hüyangpoi gho ja shingha leihye; ülao chingnyu jawe gho ja shonne tei, hüyangpoi pen shingha leih ye.”

⁴Tüokhei youngwanpawe Israel nokphong te i, “Numan-e Tao yamyah, hüyange numan üyin ngohlak.

⁵Yoppe khümlak jingne Beersheba te tah tai. Bethel me Tao yamme tüolak jingne tahngang, Bethel-a hangne-o yemenglak. Gilgalte tahtai, yha tepu kahtalan-a mahlak jingne phowe teilak.”

⁶Youngwanpa yamtüoh, hüyange numan üyin ngohlak. Numan-e yeyamyahma-a, Israel kahtalan tangme Iye vün kih-e moiye teiphalak. Vünne Bethel kahtalan hahshulak, hüyange aowe-o tüopa meiye tampu ye-oklak.

⁷Numan, ütingpa-a lüppeshüppe tampalan hüyange iman khakshuwe ngohpu kahtalante lowelampalan, numan mahnang!

⁸Youngwanpawe shanhalan, shanha-üphüohlan hei wangngailam ling. Iye wangnyak-a wangngai ne, hüyange wangngai-a wangnyak ne ling. Iye yengching yeng üngangte nyik, hüyange tüolan-a kahtoknyute shokke tam. I min-a Youngwanpa.

⁹Iman wongnangpu hüyange okkeshangpu tangme Iye mahtampupa peitam nang.

¹⁰Ngaotingpa ye-ipu jingne aowe ngaolakei numan kahtalan-e müktak hüyange ghonyoi me ütingpa khongkümpu ngaowe tam.

¹¹Numan-e toinanpalante shangne tam hüyange imanjing tahlick nyieyah. Tüojingne numan-e wepu longnok ümeilan me numan yenyoi oklak yejema-a numan-e deiye ngaipu shemei yaomapu wuwüngkah mepu wuwüngti yeyinglak.

¹²Numan jing ünulan-a hangshin nyamlakpa hüyange hangshin me numan-e püohpinpu omyangki Taowe shingnang. Numan-e kahta ümeilante shangne tam, yakjai yah, hüyange toinanpalan ghonyoi me tinge tamlak mepu tien.

¹³Hükihwe ümengpa hipak me ngao yengaipe ngohlak-a deitahwe lingpu ja ngohnang!

¹⁴Numan üyin ngohlak jingne, ümeng yeje, ümeipa yamtüoh. Hümme nakshih Ütahpa Youngwanpa Kahwang ütingpa me numan phei, numan-e ngaoyangpu kih-e ngohkülak.

¹⁵Hanghepa ümeng nutüoh, hanghepa üting tüopate kentüoh, hüyange ghonyoi me ngaotingpa-a ngaiye leitüoh. Aoweshingpu tüopa jat kahtalan aoyin üne-o üyin me towe tüoh tüolante Youngwanpawe shüpshe ne ok.

¹⁶Tüokhei Ütahpa Youngwanpa Kahwange i, “Chingnyu püanglamyin me shappe yoongpu hüyange mongmenge üngwünpu ngohlak. Aoyin mangshaplak jingne nanmee phayapeih tüolan phei jamme lipalante mangshaplak jingne kahhampalan nehoi nyiklak.

¹⁷Wuwüngkah üshei yeme shappe yoongpu ngohlak. Tüolan khongkümpu ngailak, hangjingne numante shaoshi yateng phalak jingne tao peinang.” Youngwanpawe ngaoyangki.

¹⁸Aoyinne Youngwanpa nyih jingne yoonge tannang tüopa nyih-a numan jingne hangshin fajümlihlakpa ne menglak! Numan jingne tüopa nyih-a wangngai yeje wangnyak nyih ne menglak.

¹⁹Tüopa-a ao kahta ja yengkong mailang mepu phette taipute üne-o shapnyu hüoyapeih tüokih-e ngohlak! Yejema-a kahta ja ao nokte leihye hüyange jant me yoi yak nyeangpuwa, pu jawe jotte tamlak jingne hei yepukih ngohlak!

²⁰Youngwanpa nyih-e wangngai yeje wangnyak hei yahpeilak; tüopa-a wangngai hango yenangpe wangmangpu nyih ne hei menglak.

²¹Youngwanpawe i, “Numan-e mengpu wanglam me motappu lilite Taowe nunang; tüoken me Tao omne ye-ok!

²²Aope numan-e jakke dopu hüyange hahying dopu Üte yah peilakeih, Taowe tüolan yahne ye-ok; numan-e dopu ja ne ü-tangte yah peine tamme nütne tamme angpu yinmoklan Taowe yeyah lak.

²³Langman jokpu numan hem laktüoh; numan jing kongki ümtük Taowe yejaihu.

²⁴Tüoleima, yengyin kih-e ütingpa, hüyange aope-o ye-eapu yengyin kih-e Khakshupupa yünne tamtüoh.”

²⁵Israel nokphonglan, tüolan wangpeng deli mongme Taowe numan wanwüngjeng kaiye woiwante, numan mepu toidopu hüyange dopulan hango yeyu.

²⁶Hüpoi sha-a numan-e numan jing kahwang ahngpa Sakkuth peshaote, hüyange numan jing shanha kahwang kaiwante yoppe khümtepuwe numan-e tüolan peshaolan kiyange taine ngailak,

²⁷Taowe numan Damascus kaiye kahmük ja te phowe teilak, she Youngwanpa, ao min Ütahpa Kahwang ngohnang, inang.