Read Konyak Naga AMOS 6 Bible Online

AMOS 6 - Konyak Naga bible

AMOS 6

¹Zion me hükihpu wulishokshepu üyin ngohpu numan jingne hüyange Samaria me yinne ngohnang she teihpu numan jingne, numan Israel jatnyu tepu kahta üyonglan, numan aoyin tangte jamlak yamme kahtalan peinang tüopa-a hangshin fajümlihlakpa ne ngohlak!

²Taitüoh hüyange Calneh chingnyute leitüoh. Tüophei me Hamath chingnyu üyongte leine taitüoh, hüyange laipuwe Philistialan chingnyu Gathte leitüoh. Judah hei Israel ahngchinglan phei shemeipu ngohlak a? Imanjing yikenga numan jing phei shekhaolak a?

³Mahlakpa nyih ja peiküki she numan-e ye-i-hu, hüpoi numan-e hanghe lingyapeih tüowe tüopa nyih hei owe peine tamnang.

⁴Meinyu fa phei shitte phowe tümyang phei nyoiphan me mahu üha mei hei nyeeha phei motappu numan jingne onyukei she ngohlak!

⁵David lingpu kih-e numan-e hem lingengaihu, hüyange tüolan-a kongki ümtük phei lok-hu.

⁶Numan-e yankhong maawe wuwüngti ying hüyange shemeipupa üpe meipu jon, hüpoi numan-e Joseph heampu tangme shappe yoongpu yenang.

⁷Tüokhei numan-a phowe teipu yo me üwangpalan-e menglak. Numan motappu hüyange mongmeimo üküm ngoiye peilak.

⁸Ütahpa Youngwanpa Kahwange tüopa lahnyik mongkopu deingao pha: “Israel kahtalan otapute Taowe nunang; imanjing shitte phoyang phei tungnoongte Taowe yeleihu. Imanjing ahngjong chingnyu hüyange tüopa me ngohpu shemin lamphe Taowe wepate phalak.”

⁹Noksa ja me kahta pen towe ngohpu ne mengma-a, iman lilak.

¹⁰Lipupa kahta pheipulan, mang jaklakte yakjongpawe noksa mepu manga yahteilak. Aoyin üne-o noksa me towe tüoh tüolante iman pheipupawe nyik-e ilak, “Tüoken me nang phei ütam ja nehoi ngohya pu?” Ngaowüng jawe janlak, “Yenang!” Hüwante iman pheipupawe ilak, “Tahlangman! Youngwanpa min nehoi yengaitamlak jingne teman kentinglak yang.”

¹¹Aope Youngwanpawe ngaokeng phalakei, nok üjoi hüyange üyonglan khoihnyaiye menge tamlak.

¹²Longnyu tangme koiponglan phetnang kü a? Kahtalan-e mahu üpong phei yengching me kah lüoh nangkü a? Tüoyangpoi numan-e ngaotingpa-a soihüng ne, hüyange shupuwa yeshupupa ne lüppe tamyangki.

¹³Lodebar omme yahpu jengme numan kheyong. “Karaim yah oklak ne toman wangman-e wongnange ngoh,” she numan otapu phei kheyong.

¹⁴Ütahpa Kahwang Youngwanpawe yoi nying nyingke i, “Israel kahtalan, numan jing kahmük yahlak jingne Taowe kahheng nyahponglan shonlak, tüopawe numante apyekao me Hamath lamkeng mepu heyekao me Arabah kahjee ngoiye shangne tamlak.”