Read Konyak Naga AMOS 7 Bible Online

AMOS 7 - Konyak Naga bible

AMOS 7

¹Ütahpa Youngwanpa mepu himang ja taowe nge. Tüopa me ahngpa meitam mahu heeijong wetyangpu phei jamshe hüyange hünga üne-o ngai ne wangwante, Iye nyaodukh üngang hüt ne tampu taowe nge.

²Ü-himang me kahmük mepu hü-üngpu üyak lili nyaodukh-e hahkümpu aope taowe nge, hüwante taowe i, “Ütahpa Youngwanpa, nang kahtalante ümeng winpha! Jacob hangke üyin ngohpu oklak? I jamloi shoi hüyange wong yenang!”

³Youngwanpawe I monglüp hüyange i, “Nange hanghe ngeyangki ngaine yetamlak,” she Youngwanpa inang.

⁴Youngwanpa Kahwang mepu ülao himang ja taowe nge. Tüopa me Iye yoi kahtalante vün phei shaoshi yateng phalak jingne tümpu taowe nge. Kahtok üphang me yengching üyonga vünne hah ngai, hüyange kahmük-a hahshulak jingne ükong wang.

⁵Hüwante taowe i, “Youngwanpa Kahwang, laktüoh! Jacob hangke yinne ngohlak? I jamloi shoi hüyange wong yenang!”

⁶Youngwanpawe üne-o I monglüp hüyange i, “Tüopa-o ngaine yetamlak,” she Youngwanpa Kahwange i.

⁷Taowe Youngwanpa mepu ülao himang ja nge. Tüopa me taowe I-a fhansheam jonyange itteshem-e wepu jantpenyu shongme yongyange, hüyange I yak me fhansheam jonyange ngoh.

⁸Iye üte tong, “Amos, nange hanghe ngenangki?” Taowe jan, “fhansheam ngenangki.” Hüwante Iye i, “Taowe tüopa-a ü-kahtalan tüopa fhansheam jant phei yetingpe taipukih ngohpu hüolak jingne jonnang. Imante shaoshi yateng phalak mepu shaaji ü-monga nishe yejeilei lak.

⁹Ümeken nyoijinglan me Isaac huhayimlan-e yoppe khüm, meng winlak. Israel jing üjao nyoijinglan-a heamteiye tüohlak. Ahngpa Jeroboam ahngchinga Taowe yanglow phei üküm ngoine tamlak.”

¹⁰Hüwante Amaziah, Bethel ngengpawe Israel ahngpa Jeroboamte ngaolan hüke shon: “Kahtalan yome Amoswe nang phei tüi-e lowelam nangki. Iye ngaopulan-e kahmük-a menglak yang.

¹¹Hatüowa Amos-e hanghe i, tüo ngohnang: ‘Jeroboam-a yanglow me lilak, hüyange Israel kahtalan-a iman kahmük mepu phowe yah teilak.’”

¹²Tüophei me Amaziahwe Amoste i, “Hipa, tüolan me wangteki! Judahte leih yetüoh hüyange tüoyeme nang konnyüopu toi-a lingtüoh. Iman-e tüopa jingne nangte min phakei.

¹³Hatüoken Bethel me shaaji hi-ngao tah i. Hatüowa jat-hei-li jing khümjing, hüyange ahngpawe yoppe khümpu nyoi ngoh nang.”

¹⁴Hüwante Amoswe jan, “Taowa hipa yejema-a hipa üha ne-o yeje, hüpoi Taowa kahhampa ja, hüyange taowe phukpeelante paowe tüknang.

¹⁵Hüpoi nyeeyompa ja ne ngohpu ü-toishao mepu Youngwanpawe tao yahngai hüyange Ijing Israel kahtalante hi-ngao ilak jingne taine üte ngaokeng pha.

¹⁶Tüokhei sha-a Youngwanpawe hanghe inang jaiyah. Hi-ngao ipu mepu laklak jingne nange üte inang; Israel kahtalan phei tüi-e nyüoweleipu laklak jingne inang.

¹⁷Tüojing ne, Amaziah, Youngwanpawe nangte inang, ‘Nenok shekonyuwa püanglampong me üshoyüonyu ne menglak, hüyange nang hayimlan-a wehok me yanglow-e toilak. Nangjing kahmük-a tamlak hüyange ülaolante phalak, hüyange nanga yejaopu ülao kahmük me lilak. Hüyange Israel kahtalan-a ütingpa me imanjing yoi kahmük mepu phowe yah teilak.’ ”