Read Konyak Naga AMOS 8 Bible Online

AMOS 8 - Konyak Naga bible

AMOS 8

¹Hatüowa Ütahpa Youngwanpawe üte hanghe hüo. Tüopa me taowe yimte phei pelick maayange küm ja nge.

²Youngwanpawe tong, “Amos, nange hanghe ngenangki?” Taowe jan, “Pelick üyim küm ja.” Youngwanpawe üte i, “Ü-kahtalan Israel jingne üküm ngoi peiteki. Imante shaoshi yateng phalak mepu Taowe shaaji ü-mong yejeileilak.

³Tüopa nyih me ahngnoklan me lokpu hemwünga shappe yoonge üngwünpu ne menglak. Üken phe me lipu mang ngohlak. Iman-a jünge winne kümlak.”

⁴Tüopate jaiyah, numan shange pongpalante yalokke tampalan hüyange kahmük mepu toinanpalan mahtamlak jingne ngangpalan.

⁵Numan-e numan nying nyingke inang, “Toman-e tahlicklan yüowe oklak ne lela hipak-a aope linlak? Hüke toman-e üne-o yüopu ükongwanglak jingne Sabbath aope linlak? Hümme nakshih toman-e ünyei yolak, toklak yeshupe jonlak, hüyange toman jing pheei shakpalante lowelamme toklak jonlak jingne eppe wanglak.

⁶Wheat ümenga toman-e pheei wanne yüolak.Toinanpa aowe yoi pheeisea yepha ok, yashom ünok ni nehoi yeshak okpu toman-e tüolak, hüyange toman-e I-a rha ne shaklak.”

⁷Youngwanpa, Jacob Kahwange jiengjep nang, “Taowe aope-o iman-e lingpu toimenga yepelak.

⁸Tüojingne kahtok mokhlak, hüyange kahmük me ngohpu lili shanglak. Kahmük nopu polak; tüopa-a yonge onglak hüyange Egypt Nile Yengyin kih-e yeitalak.

⁹Heeitam hahju me wanghe nyipne tamlak hüyange nyihning wante kahtoknyu wangnyakke Taowe tamlak hipak peiküki. Tao, Ütahpa Youngwanpawe ngaoyangki.

¹⁰Taowe numan motappuwa manglüngpu hemne hüyange numan hoongli mongongpu hem-a mongmeng üngwünpu hem ne jeilei tamlak. Taowe numante shanglin ne hüyange monnye inne linge tamlak, hüyange numan-a halom ja shingha ngohpute nyupalan-e shappe yoongpu kih ngohlak. Tüopa nyih-a ükümte ngoiye khah ngohlak.”

¹¹“Kahmükte Taowe seanyao yenglepu shonlak hipak peiküki. Kahtalan seanyaolak, hüpoi hahying jingne yeje; iman yenglelak, hüpoi yeng jingne yeje. Youngwanpa mepu ngaolan tüohuwe iman seanyao yenglelak. Tao, Ütahpa Youngwanpawe ngaoyangki.

¹²Kahtalan apye mepu heye ngoiye hüyange heong mepu henyip ngoiye waalak. Iman-e ükenphe me Youngwanpa mepu ngaolan jingne yamlak, hüpoi iman-e tüopa yetüolak.

¹³Tüopa nyih me shemeiyaomapu naoshelan hei naoyhalan nehoi yenglepuwe toitalak.

¹⁴Aoyinne Samaria peshaolan min me jiengjep yange, ‘Dan kahwang ngohtepuwe,’ yejema-a ‘Beersheba kahwang ngohtepuwe’ she aoyinne i, tüolan kahta toitalak hüyange ni she lüopu ye-oklak.”