Read Konyak Naga AMOS 9 Bible Online

AMOS 9 - Konyak Naga bible

AMOS 9

¹Taowe wümjong shongme Youngwanpa yongyange nge. Iye ngaokeng pha: “Khümjing ütokpa shinte wongnange shette tamtüoh tüome nakshih nokmong nopu polak. Tüolan pai khüohne tamtüoh hüyange tüolan-a kahtalan shangtang me yeine tamtüoh. Topu kahtalan-a Taowe yanglow-e toilak. Ao-o taipu ye-oklak; sheja nehoi yinpu ye-oklak.

²Iman-e lipu kahtoknyu (yimching) yekaote iman jing tailam shaoyapeyoi, Taowe iman pholak. Wangyekaote iman ongyapoi, Taowe iman yeitamlak.

³Carmel kahtang ütangpa me iman loyapoi, Taowe iman yamlak hüyange iman pholak. Iman ü-mepu yengching ümongme loyapoi, imante jeihtamlak jingne Taowe khongkhaite ngaokeng phalak.

⁴Imanjing wepalan-e iman phowe yahteipu ne mengma-a, yanglow phei iman toine tamlak jingne Taowe imante ngaokeng phalak. Taowe imante jamlak ne yeje, iman mahtamlak jingne Taowe mongnang.”

⁵Ütahpa Youngwanpa wongnangpupawe kahtoknyute Iye lette tam; hüyange tüopa lüohkhengne tam; aoyin tüome ngoh khongküm mangshap. Kahtoknyu nopu Nile kih-e yonge ong, hüyange Egypt mepu Nile yengyin kih-e yeita.

⁶Youngwanpawe yoi nyoi-a wangdang ütokpa eam me we-nang, hüyange kahtoknyu ütok me Iye wang khwngmong angetam. Iye yeng peilak jingne yengchingte nyik, hüyange tüolan-a kahtoknyute shokke tam. I min-a Youngwanpa!

⁷Youngwanpawe inang, “Israel kahtalan, Taowe Sudan kahtalante teihpu shinne numante Taowe teihnangki. Taowe numan Egypt mepu yah peipu mei mei kih-e, Taowe Krit mepu Philistialan hüyange Kir mepu Syrialan yahpei.

⁸Tao, Ütahpa Youngwanpawe tüopa Israel ünu ahngchingte yomme leinang, Taowe kahtoknyu tangmepu iman mahtamlak. Hüpoi Jacob huhayimlan mepu-a Taowe khongkümpuwa mahne yetamlak.

⁹“Wongjelak (khüng) me wong jepu kih-e Israel kahtalante polak Taowe ngaokeng phalak. Aoyin ühak yekoh khongkümpu jatlan yomepu yahteilak jingne Taowe imante powe tamlak.

¹⁰Ü-kahtalan yo mepu ünulan khongküm wehok yanglow me, hüke ‘Kahwange teman shongte owe hang ümengo minpei tamja she, aoyinne i, khongkümpu toilak.’ ”

¹¹“Nyih ja peiküki aope Taowe David ahngching hanghepa heamteiye toitapu nok kih-e ngoh, linge yelak. Taowe tüopa jantpenyu sheappe yelak hüyange tüopa linge yelak. Taowe tüopa welak hüyange üshongwante hangke ngoh hüke linglak.

¹²Tüokhei Edom kahmük me hanghepa towe tüoh Israel kahtalan-e chinghahlak hüyange hipak ja me ü-jingne ngohyangpu jatlan khongkümpuwe Youngwanpate ilak tüopa hüke ngailak aowe linge tampu!”

¹³Youngwanpawe inang, leihuyah, “Nyihlan peiküki.” “Aope kahhampawe tahyahpa kem yüolak hüyange wuwünglick phitpawe aowe üli deinang I kem yüolak; kahtanglan-e wuwüngti ümei yütne tamlak, hüyange kahkeng khongkümpu me tüopawe maawe yünlak.

¹⁴Taowe Ü-kahtalan imanjing kahmükte yatuhshao ümei phei yah yelak. Iman-e heamtepu iman jing chingnyulan linge yelak hüyange tüoken me nyoilak; iman-e wuwüngkah hamlak hüyange wuwüngti yinglak; iman-e pesha linge ngailak hüyange tüolan me hanghe ngai ülick hahlak.

¹⁵Taowe imante phayangpu kahmük me Taowe ü-kahtalan shomlak, hüyange iman nishe bhei yewinlak.” Youngwanpa numan Kahwange ngaoyangki.