Read Konyak Naga OBADIA 1 Bible Online

OBADIA 1 - Konyak Naga bible

OBADIA 1

¹Hatüowa Obadia hi-ngao ngohnang: Tüopa-a Youngwanpa Kahwange Edom jat jeng hanghe i tüo ngohnang. Youngwanpawe yoi ngaolan kipa jatlante shonteki, hüyange I ngaolan toman-e jaiteki. “Tümyah! Edom phei tüi-e teman taihah!”

²Leihuyah, “Taowe nanga jatlan yo me sheshoipa ne lingtamlak; moilanne nangte yaowelelak.

³Nang otapuwe nangte muh lowetam nang. Nangjing nyoijinga longnyuwe meipe latyange; nenok-a kahtang shedaopu me linge she, tüojingne nange nang nying nyingte i, ‘Aowe tao shuitaipu oklak?’

⁴Nange nenok awlan ülüp shinne daowe lingyapeyoi, tüo kaiye shanhayome ngohnang she teihyahpeyoi, tüoyangpoi Taowe nanga shui yeitamlak, she Youngwanpawe inang.

⁵“Aope wangnyak me kuhleihpalan peiyapeih, iman-e hanghe wongpongne meng, tüolan hei iman-e yahnang. Aope kahtalan-e wuwünglick khaiyapeih, iman-e hipak phe me üjingha towe tüohnang. Hüpoi numan jing wepalan-e nanga jaosheye kotte winlak.

⁶Esau huhayimlan, numanjing toinyunanha-a nyieyahteki.

⁷Nang phei teihsinpulan ne nang lowetam; nang kahmük mepu iman-e nang jange tei. Aoyin nang phei chingmei me ngoh tüolan kahtalan-e sha-a nangte naonang. Shümpalan aoyinne nang phei jamme hah nangjingne tün tünne tüoh; iman-e nangjenga, ‘Üpu I me nangpu deitahpulan-a hang taipu?’ she inang.

⁸“Taowe Edomte shaoshi yateng phapu nyih, imanjing deitahpu kahtalan Taowe mahtamlak, hüyange iman jing konjong khongküm phutte winlak.

⁹Teman mepu wehokpalan-a fajümlihlak, hüyange Edom mepu wetaipalan khongküm toilak.”

¹⁰“Hangne ima-a, Jacob huhayim nangjei nangnaolan nange shangne tam hüyange toipu jingne, nanga mahne tamlak hüyange jintepu jingne wüotüone tamlak.

¹¹Aope wepalan-e imanjing petenlan khüw mengyapeih, tüopa nyih me nanga iman phei yong. Aoyinne Jerusalem moth sheih ki taiyapeih hüyange tüopa-a iman yo me tamme yahyapeih, nanga tüolan yinpalan mengshipu shinne yemeipe ngoh.

¹²Judah mepu nang jeihei naolan yatuhshao mengpute nange ya-naowe yeteih hahshepu! Iman heampu nyihte nange mongmeiye yeteih hahshepu. Iman shange pongpute nange imante nyiyaiye yetamhah shepu.

¹³Iman mahshupu nyih me iman shangpute mongme huwe leine hüyange imanjing toinyu nanha yah ne, ü-kahtalan chingnyute nang ye-ong hah shepu.

¹⁴Aoyin phette taine ngangyapeih tüolan pholak jingne lampong me nanga yongyange yengoh hah shepu! Iman shanghah shaoshipu nyih me nange iman-a wepalan yakte phünne yepha hah shepu.”

¹⁵“Jatlan khongkümpute Tao, Youngwanpawe ngaophünlak nyih owe peiteki. Edom, nange hanghe lingyangki tüopa-a nangte linge tamlak. Nange hanghe phayangki nange leih tüolak.

¹⁶Ü-kahtalan-e Ü-üjao kahtang me shaoshi yatengpu ükhah wan yingyangki. Hüpoi tüopa phei shenyei she khahpu shaoshi yateng wan neikonpu jatlan khongkümpuwe yinglak; iman-e tüopa-a khongkümpu yinglak hüyange ye-ngepe mahtailak.”

¹⁷“Hüpoi Zion kahtang me ütam yinpu oklak, hüyange tüopa-a üjao nyoine menglak. Jacob kahtalan-e iman jingne ngohyangpu kahmük mothleilak.

¹⁸Jacob nokphonga vün ne menglak, hüyange Joseph nokphonga vünyi ne menglak; hüyange Esau nokphonga jüngoong ne menglak, hüyange iman-e tüolan-a jaklak hüyange lünge tailak; Esau nokphong mepu sheja nehoi towe yetüohlak; hangjingne Youngwanpawe tüopa ngaoyangki.

¹⁹“Judah heyekao mepu kahtalan-e Edom omme yahlak; aoyin henyipye kah yashongme ngoh iman-e Philistia shümme omlak; Israellan-e Ephraim hei Samaria yikeng mothleilak; Benjamin kahtalan-e Gilead yahlak.

²⁰Apyekao Israel mepu phoweteiye ngohpu nyahponglan leih yelak hüyange apye Zarephath te ngoi she Phoenicia ching hahlak. Jerusalem mepu phoweteiye aoyin Sardis me ngoh iman-e Judah heyekao jilalan shümme omlak.

²¹Hüyange Esau kahtang kahmük tangme wanglam lamne Zion kahtangte yinyeyangpulan onglak; hüyange ahngchinga Youngwanpa jingne menglak.”