Read Konyak Naga JONA 1 Bible Online

JONA 1 - Konyak Naga bible

JONA 1

¹Amittai üha Jonate Youngwanpa ngao hüke pei:

²Iye i, “Tüopa chingnyu üyong Ninevehte taitüoh, hüyange tüopa phei tüi-e ngaotüoh; hangjingne tüopa mepu kahtalan yemeipu ü-tangte peiteki.”

³Tüoyangpoi Youngwanpa mepu yanlak nanjingne Jonawe janhüopu yekaopate yayong. I Joppate lai, Tarshish (Spain) te shaaji taine tümyange yenglin ja Iye nge. Iye yoi jingne taimee pha hüyange Tarshishte yeng yatte tailak jingne, ümeken me taitüoh me Youngwanpa mepu yanlakne ngoh tüoken me onge shot.

⁴Hüpoi Youngwanpawe yengchingte wongnangpu wangyang üyong shon, hüyange waishihwangkhahpuwa jamloi wongnangpu jingne yenglin-a wengtuh ngaiye menglak ne ngohyangki.

⁵Yenglin me toilingpalan yawinmongpaipu ngoh hüyange yinlak jingne yoi yoi Kahwangte üngwün. Hüwante wengtuh mepu taanne tamlak jingne iman-e linsa mepu toinan winnetam. Tüohipak me Jona-a yenglin üphangpa ümongpa nyoite yuwe lamyange, ü-mangme shiteiye ngoh.

⁶Yenglin woipawe I tüoken me nge hüyange Ite i, “Nang shiye hanghe lingnangki? Lüotüoh hüyange jamlak jingne nang Kahwangte yoptüoh. Aoweshingpu teman jingne I mongmenge teihne ok hüyange teman üyin yintamne ok.”

⁷Yenglin me ngohpalan-e jawe japhei teingaowe i, “Tüopa ütuh me teman pongpu jingne aote ümeng phalak shinglak jingne, kei, teman-e phongyenge leihah.” Iman-e hüke ling, hüyange phongyengpu me Jonate hüt.

⁸Tüokhei iman-e Ite i: “Hüma-a sha-a tomante ipha! Tüopa jingne nangte ümeng pha ne ngailak a? Tüome nange hanghe lingnangki? Ümpehe kahmük mepu nang peipu? Nanga hanghe jat shi? Hüyange nanga hanghe kahta shi?”

⁹Jonawe janne i, “Taowa Hebrew kahta.” “Wangdang Kahwang, aowe kahtok hüyange yengching lingengai, tüopa Youngwanpate taowe yoppe khümnang.”

¹⁰Jonawe yelakpe imante hüke I-a, Youngwanpa mepu phette taipupa üja she ine tam. Yenglin me ngohpalan fajümlih, hüyange Ite i, “Hükihwe linglaka yashanshe nyamlakpa!”

¹¹Waishih wangkhahpu yelakpe shemeng shemeng she ngai, tüokhei linsa me ngohpalan-e Ite tong, “Waishih wangkhahpu lakne tamlak jingne toman-e nangte hang linglak shi?”

¹²Jona janne i, “Yengching me tao toonne shüptüoh, hüyange tüopa-a ümok hümkülak. Taowe shingnang hatüowa taowe püohpinpu jingne tüopa mengshipu waishih wangkhah me numan omnang.”

¹³Tüoyangpoi linsa me ngohpalan-e iman wong sotkümme yenglin-a yengnahte yatte yelak jingne ngang. Hüpoi waishih wangkhahpu shemeng shemeng she ngai, hüyange iman tailak ülam hango yetüo.

¹⁴Tüokhei iman-e Youngwanpate üngwün, “O Youngwanpa, toman-e yopnang, tüopa kahta üyin yahpu jingne tomante li ne tampuwe shaoshi yateng ne tahtam pha! Tüolan khongkümpu jingne, O Youngwanpa, nang nying; hatüowa nange lingpu ngohnang.”

¹⁵Tüophei me iman-e Jona toonne yah hüyange yengchingte shüppe tam, hüyange mokhshe yengching ümokh hüm.

¹⁶Tüo kaiye linsa me ngohpalan Youngwanpate yeonge nyam, hüyange iman-e toidopu pha hüyange I shaoshanlak jingne jiengjeppu yah.

¹⁷Hüpoi Youngwanpawe ngaokeng phatüohwe hoyong jawe Jona lünge tai, hüyange hoyong seasa me I nyih lüm hüyange pha lüm ngohyangki.