Read Konyak Naga JONA 3 Bible Online

JONA 3 - Konyak Naga bible

JONA 3

¹Hüwante Youngwanpawe Jonate nishe ngao peitam.

²Iye i, “Chingnyu üyong Ninevehte ongtüoh, hüyange Taowe nangte phapu ngaolan kahtalante pongtam tüoh.”

³Tüokhei Jonawe Youngwanpa nyingme yah hüyange Ninevehte ong; sha-a Nineveh jamloi yongpu chingnyu ne menge tüopa chingshao laopu me kemwante nyih lüm hipak yah ngohyangki.

⁴Jonawe chingnyu linne kemne wang, hüyange nyih ja wanghe nyippe kemyang phei me, Iye üngwün, “Nyih deli mongme Nineveh mahtamlak!”

⁵Nineveh kahtalan-e Kahwangpa ngaolante ütinglak. Tüokhei kahta liliye nyaowelepu yahlak jingne iman-e tüm, hüyange üyongpa mepu üjoipate ngoishe kahta liliye iman monglüpteki she hüowe monnye in.

⁶Aope Nineveh ahngpawe tüopa ngaolan jaiyapeih, ahngpa shotjing mepu I yayong, yoijing ngeng-ahng phakshaoh khokyange monnye in, hüyange kahmak yo me shot.

⁷Tüophei me Iye Nineveh kahtalante pongetampu ja shonne tei: “Hatüowa ahngpa hüyange I shaoshanpalan mepu ngaokeng ngohnang: Aowe-o hango yehahlak; kahta, mahu, hüyange nyee khongkümpuwe yehah yeyingpe nyüolak.

⁸Kahta hüyange yinmok liliye monnye inlakyang. Moilanne mongphünne phawe Kahwangte yoplakyang hüyange Iye ünu toi lingpu nyoingoh wanglam hüyange Iye yak yuwe ünu lingpu winlak yang.

⁹Aoweshingpu Kahwange I monglüp ne ok, aoweshingpu I mongshih ngaipu mepu lakne ok, hüyange teman yelilak!”

¹⁰Iman-e hanghe ling Kahwange nge; iman-e ünu toi lingpu nyoingoh wanglam iman-e winteki she Iye nge. Tüokhei I mong lüp hüyange Iye linglakei she ngaoyangpu kih-e imante Iye shaoshi yateng yepha.