Read Konyak Naga LUNGTET 1 Bible Online

LUNGTET 1 - Konyak Naga bible

LUNGTET 1

¹Egypt kahtok mepu iman ngaiyang phei me nishepupa wangpeng, nishepupa leat üwangpa nyih me, Sinai wanwüng jeng khümjing nyenok me Youngwanpawe Mosate i:

²Iye i, “Israel kahtalan ükhong khongkümpu, nokphong nokphong, puhu hei puhu, yoi yoine kahta lili itüoh, netan lili shangtoi itüoh;

³Aaron nang niye wangpeng da me peiye ütokye, Israellan yo me, wehokte taipu oklaklan khongkümpu itüoh.

⁴Nang te jamlak jingne puhutepu üshangpa ne mengpupa nokphong lili tepu japong yahtüoh.

⁵Hüyange tüopa toishao jingne ükhong yo mepu, iman nokphonglan mepu woipalan-a tüolan kahta ngohnang. “Reuben mepu Shedeur üha, Elizur

⁶Simeon mepu Zurishaddai üha, Shelumiel

⁷Judah mepu Amminadab üha, Nahshon

⁸Issakhar mepu Zuar üha, Nethanel

⁹Zebulun mepu Helon üha, Eliab

¹⁰Joseph hayimlan mepu; Ephraim mepu Ammihud üha, Elishama; Manasseh mepu Pedahzur üha, Gamaliel

¹¹Benjamin mepu Gideoni üha, Abidan

¹²Dan mepu Ammishaddai üha, Ahiezer

¹³Asher mepu Ochran üha, Pagiel

¹⁴Gad mepu Deuel üha, Eliasaph

¹⁵Naphtali mepu Enan üha, Ahira.”

¹⁶Tüolan-a ükhong yo mepu leye ngaipu pajeiyonglan nokphong woipalan ngoh yangki; iman Israel puhulan tepu üshanglan ngoh nang.

¹⁷Mosa hüyange Aaron, niye iman yoi min me nyikpu kahta tüolan yah,

¹⁸hüyange iman ükhong khongkümpu jamshe nishepupa leat üwangpa nyih nyik-e jem, hüyange üjengpawe woiyange, wangpeng da me peiye ütokye kahta lili puhu hei noksalan min nyanne tam;

¹⁹Youngwanpawe Mosate ngaowe tampu kih-e, Iye Sinai wanwüng jengme iman min nyan yangki.

²⁰Hüyange Israel üha jeiyongpa Reuben mepu jalunpu kahtalan iman nokphonglan hei puhulan hüyange iman üshangpawe woiyange wehokte taipu oklak wangpeng da tok netan lili ja phei me ja, ja phei me ja she minyan;

²¹Reuben nokphong lungtet haja deli me wok, phei me gho nga ngoh yangki.

²²Simeon mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

²³Simeon nokphong mepu lungtet haja denga me tu phei me gho lüm ngohyangki.

²⁴Gad mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

²⁵Gad nokphong mepu nyanpu lungtet haja deli me nga phei me gho wok denga ngoh yangki.

²⁶Judah mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

²⁷Judah nokphong mepu nyanpu lungtet haja denyit me peli phei me gho wok ngohyang ki.

²⁸Issakhar mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

²⁹Issakhar nokphong mepu nyanpu lungtet haja denga me peli phei me gho peli ngohyangki.

³⁰Zebulun mepu jalunpu kahtalan, iman nokphonglan, iman puhulan, iman üshangpa woiyange wangpeng da hüyange tüo tok tepu wehokte taipu oklak netanlan lili min nyan:

³¹Zebulun nokphong mepu nyanpu lungtet haja denga me nyit phei me gho peli ngoh yangki.

³²Joseph mepu jalunpu, Ephraim kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

³³Ephraim nokphong mepu nyanpu lungtet haja deli phei me gho nga ngoh yangki.

³⁴Manasseh mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

³⁵Manas- seh nokphong mepu nyanpu lungtet haja delüm me ni phei me gho ni ngoh yangki.

³⁶Benjamin mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

³⁷Benjamin nokphong mepu nyanpu lungtet haja delüm me nga phei me gho peli ngoh yangki.

³⁸Dan mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

³⁹Dan nokphong mepu nyanpu lungtet haja dewok me ni phei me gho nyit ngoh yangki.

⁴⁰Asher mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

⁴¹Asher nokphong mepu nyanpu lungtet haja deli me ja phei me gho nga ngoh yangki.

⁴²Naphtali mepu jalunpu kahtalan, iman nokphonglan, iman puhulan, iman üshangpawe woiyange wangpeng da hüyange tüo tok tepu wehokte taipu oklak netanlan lili min nyan:

⁴³Naphtali nokphong mepu nyanpu lungtet haja denga me lüm phei me gho peli ngoh yangki.

⁴⁴Tüolan-a Israel woipalan pen me ni yoi yoi puhu mepu japong ngaiyange Mosa hei Aaron nite jamyange shangtoi iye nyanpu lungtet ngoh nang.

⁴⁵Tüokhei tüolan-a wangpeng da hüyange tüo tok tepu wehokte taipu oklak puhu phe phe mepu Israel kahtalan khongküm

⁴⁶iman khongkümpu sheiyange lakh wok haja lüm phei me gho nga denga ngoh yangki.

⁴⁷Hüpoi Levilan-a iman puhu wanglam me ülao nokphonglan phei min nyanpu me ye-om.

⁴⁸Youngwanpawe Mosate i.

⁴⁹“Aope nange wehok te taipu oklaklan Israellan shangtoi iyalakei, Levi nokphong tah om.

⁵⁰Hüleima khümjing nyenok me ghonu hüyange toinan khongkümpu tang me, hüyange tüopa jingne khongkümpu tangme yakjongpa ne Levilan nange angtam tüoh; iman-e khümjing nyenok hüyange toinan khongkümpu kilak; tüopa-a iman-e namnolak, hüyange khümjing nyenok neikonne lakjing linglak.

⁵¹Hangkih tingme numan-e numan lakjing sheihlakei, Levilan-e hatüo khokke yahlak; hüyange lakjing üla nyoijing üla me tüopa üne-o welak. Ao ne menglakei mengyapoi ao tüopa shongte owe wenlakei li ne tamlak.

⁵²Hüyange topu Israel lan-a ükhong ükhongne lakjing nyoi linglak, kahta lili yoi yoi ükhong phei hüyange yoi yoi khüwkam phang me lakjing linglak.

⁵³Hüpoi Levilan-e tüopa yomlak jingne khümjing nyenok neikonne iman lakjing linglak, tüome nakshih aowe-o tüopa shongte peine ye-oklak, hüyange Israel ükhong tangme ümong shihpu ngaiye yeshetlak.”

⁵⁴Tüokhei Youngwanpawe Mosate ngaokeng phapu kih-e Israel kahtalan-e khongkümpu ling yangki.