Read Konyak Naga LUNGTET 10 Bible Online

LUNGTET 10 - Konyak Naga bible

LUNGTET 10

¹Youngwanpawe Mosate ngaowe i,

²“Khüm nyawong ni lingtüoh, tüolan-a joppe lingyang phei khüm ne menglak yang; hüyange tüolan-a nange ükhong nyiklak jingne hüyange lakjing mepu yayonge yan-e tailak jingne wünglak yang.

³Aope nyawong moini wünglakei ükhong khongkümpu nang tangte khümjing nyenok tafün shongte jemlak.

⁴Hüpoi aope ja hei wünglakei, hüma-a woipalan, Israel jat mepu üshanglan, iman nying nyingke nang tangte jemlak.

⁵Aope pongetampu me wünglakei, heong ye me lak-e ngohpu nokphonglan yayonglak.

⁶Aope pongetampu me nishe wünglakei, heyekao me lak-e ngohpu nokphonglan yayonglak. Hüyange iman yayonglak jingne pongetampu me nyawong wünglak yang.

⁷Hüpoi ükhong nyik-e jemlak jingne-a numan-e nyawong laolünge wünglak.

⁸“Nyawonga Aaron hayim, ngengpa lan-e wünglak yang. Tüolan wanglam jonpuwa numan jintokte jin küm-e wanglam ne ngohlak.

⁹Aope numan yoi kahtok me hoklakei, hüyange numan nying nyingke yongyange numante shümme peipu wepa phei hokyalakei, shapju me yonglak jingne tüopa nyawong me pongtampu me wüngtüoh. Tao, numan jing Kahwang Youngwanpawe numante jamlak hüyange numan wepalan mepu numan yin-e tamlak.

¹⁰Hüyange üne-o hoongli mongongpu hipak me numan-e Lela Mo mowante hüyange numan-e mengpu wanglam-e ülao mopulan mowante wünglak-numan-e üne-o aope jakke dopulan phayalakei hüyange shüppe jempu dopulan phayalakei numan-e tüopa nyawonga wünglak. Hüwante taowe numante jamlak. Taowa numan jing Kahwang Youngwanpa ngoh nang.”

¹¹Ni shepupa wangpeng me, ni shepupa leat, nyih da shepupa me, khümjing nyenok ütangye mepu wangphom-a yahtei;

¹²hüwante Israel hayimlan yafün ja phei me ja she, Sinai wanwüng jeng mepu yayonge tai; hüyange wangphom-a Paran phaonyu jong me lak.

¹³Mosa kaiye Youngwanpawe ngaophapu kih-e iman yayonge kempu tüopa-a üwangpa ne ngoh yangki.

¹⁴Hüyange iman yayonge taipu hipak phe me hangke kemlak jingne itpu ngoh hüke yayong. Üwangne Judahlan lakjing khüwkam phei ükhong yayong; hüyange Amminadab üha Nashon tüopa ükhong tangme woipa ne ngoh yangki.

¹⁵Issakhar nokphong ükhonga Zuar üha Nethaniel-e woipu phang me;

¹⁶Hüyange Zebulun nokphong ükhonga Helon üha Elaiab-e woipu phangme tai.

¹⁷Tüophei me aope khümjing nyenok khok-e teeyapeih, khümjing nyenok paipalan Gershon hei Merarilan puhulan yayong.

¹⁸Tüophei me Shedeur üha Elizurwe woiyange Reubenlan lakjing khüwkam phei ükhong ükhong yayong.

¹⁹Hüyange Simeon nokphong ükhong tangme Zurishaddai üha Shelumiel-e woiyangki;

²⁰Hüyange Gad nokphong ükhong tangme Deuel üha Eliasaph-e woipu phangme tai.

²¹Tüophei me Kohathlan ne üjao toinan yahyange yayong; hüyange iman manngoipe ülaolan-e khümjing nyenok weshoyange ngoh.

²²Hüyange Ammihud üha Elishama-e woiyange ükhong ükhong Ephraim nokphong lakjing khüwkam phei yayong.

²³Hüyange Manasseh nokphong ükhong tangme Pedahzur üha Gamaliel woipu phangme woipu ngoh yangki.

²⁴Hüyange Benjamin nokphong ükhong tangme Gideon üha Abidan-e woipu ngoh yangki.

²⁵Hüyange Dan nokphong lakjing khüwkam phei, üshei phei ükümpa ne, iman ükhong yayong; hüyange tüopa ükhong tangme Ammishaddai üha Ahiezer woipu ngoh yangki.

²⁶Ochran üha Pagiel Asher nokphong ükhong tangme woipu ngoh yangki.

²⁷Hüyange Enan üha Ahira Naphtali nokphong ükhong tangme woipu ngoh yangki.

²⁸Hatüowa aope Israel kahtalan iman ükhong ükhong yayonge taiyapeih hüke kempu ngoh yangki.

²⁹Sha-a Mosawe Medianlan Iküo nok Reuel üha Hobabte i, “Youngwanpawe, Taowe numante hatüowa yaphalak she ipu kahtokte toman yayong tainangki; toman phei woikei hüyange toman-e nangte meiye namnolak; hangjingne Youngwanpawe Israelte jalunpu phalak she janteki.”

³⁰Hüpoi Hobahwe Ite jan-e i, “Tao mintai; tao ü-kahtokte hüyange ü-noksalan tangte yelak.”

³¹Hüpoi Mosawe i, “Chingmei lamlinge nange toman tahtüoh pha; hangjingne phao me toman laklak she nange shing, hüyange nanga toman jingne lamwoipa ne menglak.

³²Hüyange nang toman phei taiküma-a, ütingme Youngwanpawe hangheyin ümeilan tomante linglakei, tüoja muh toman-e nangte-o linglak.”

³³Tüokhei iman-e Youngwanpa kahtang mepu nyih lüm lamme yayong; hüyange Youngwanpa phei jiengjeppu ghonu-a iman shaoyete nyihlüm lamnyu shaotan-e iman jingne lakjing ja yam-e tai.

³⁴Hüyange iman-e lakjing mepu yayonge taiwante Youngwanpa wangphom-a nyihning iman shangtang me ngoh yangki.

³⁵Hüyange hangkih ting me Ghonu yayong, Mosawe i, “O Youngwanpa, yongtüoh, hüyange nang wepalan yantam tüoh; hüyange nangte müktakpalan nang sheshao mepu yanne tamtüoh!”

³⁶Hüyange aope tüopa laklakei Iye i, “O Youngwanpa, Israellan haja tokte hajapen tangte leih yekei.”