Read Konyak Naga LUNGTET 11 Bible Online

LUNGTET 11 - Konyak Naga bible

LUNGTET 11

¹Sha-a kahtalan-e Youngwanpawe jaiye iman shaoshipu ümeng jengme ngaowe ngu nga; hüyange hatüo Youngwanpawe jaiwante, I mongshih ngai; hüyange Youngwanpa vün iman yo me pah ngai, hüyange lakjing ünahye ütam hah.

²Hüwante kahtalan-e Mosate üngwün, hüyange Mosawe Youngwanpate yop, hüyange vün-a meimah.

³Tüokhei tüopa nyoijing min Taberah she nyik; hangjing ne Youngwanpa vün-a iman yo me pah ngai.

⁴Israellan yo me ülao kahtalan-o omme kem-e ngohpu ükhonge mei hah huwe ngai; hüyange Israel hayimlan-o nishe shap hüyange i, “Teman-e hahlak mei hi ngohshih ma-a!

⁵Egypt me teman-e jajang jawe hahpu nyah hüyange maikoh, kohyim, shihtoi, aoshih, hüyange jihlang teihtüo nangki!

⁶Hüpoi sha-a teman wong yenangpe taiteki, hango yenang; nyihjeih she manna te leilak tokte kaiye teman hango yenang.”

⁷Sha-a manna-a hoingee üli ükhoih kih-e leilak müklei me yüknyu leye ngoh yangki.

⁸Kahtalan-e taiye tüopa toon-e jem, hüyange hatüowa yongshüm me ngütyange yejema-a shamme shu, hüyange hatüo tük me hongyange tüopawe awkek an ling; hüyange hatüo hahlak jingne olive minnga phei awkek an ngüwpu kih-e ngoh yangki.

⁹Aope wangnyak me lakjing me nyin yeilakei, manna-o tüophei jam-e yei ngoh yangki.

¹⁰Hüyange Mosawe kahtalan nokden phephe me yoi nyenok tafün shong me shappe jai; hüyange Youngwanpawe imante mongshih yeonge ngai hüyange Mosa mong yemeipe ngoh;

¹¹tüokhei Mosawe Youngwanpate i, “Hangne nang shaoshanpa tangme nange hüke menge jonpu? Nange tüopa kahtalan hangki khongkümpu üte kiye tamlak üne nang sheshao me taowe shüpshe yetüopu a?

¹²Taowe tüolan kahta khongkümpu puhpai pu a? Yejema-a iman nang jakuh me küwyange naopaipa lanne tampu, hahpu naodak paipu kih-e nange iman pajeiyonglan te jiengjep-e janpu kahmükte yah-e taitüoh she üte nange iye oklak ne taowe iman puhpu a?

¹³Taowe tüolan kahta khongkümpute ümeken mepu mei yahpeiye phalak? Hangjingne ‘toman-e hahlak mei tomante yahkei, she shap-e iman-e üte inang.’

¹⁴Ü-shahawe tüolan kahta khongkümpu nopai-e ye-oklak, hangjingne hatüowa üjingne jamloi yih nang!

¹⁵Hükih-e nange üte jonne ima-a, taowa lanshe toiwin yang yah she taowe nangte yoppe tongnang; nang sheshao me taowe shüpshe tüowe ngohpu ne mengma-a, üte shaaji ü-shaoshi tah ngetam pha.”

¹⁶Tüokhei Youngwanpawe Mosate i, “Israel lwngmeilan denyit, kahtalan yo mepu lwngmeilan, hüyange iman tangme woipa she nange shingpulan ü-tangte jem ne tamtüoh; hüyange iman khümjing nyenok shongte tüome nang phei yonglak jingne woipei kei.

¹⁷Hüyange Tao yukülak hüyange tüome nang phei ngaolak; hüyange nangte phayangpu yaha ütam yahpuwe iman tangme angtamlak, hüyange kahtalan hangki yih nang shahawe yeje, iman-e hatüowa nang phei kilak.

¹⁸Hüyange kahtalante itüoh, ‘Numan-e mei hahlak jingne numan nying nyingke ngainyihpu jingne jaowe shayah, hangjingne Youngwanpawe jaiye, “Teman-e hahlak mei ngohshih phang, hangjingne Egypt me-a toman wangman-e ngoh yangki, she numan-e ngaoteki.” Sha-a Youngwanpawe numante mei phakülak, hüyange numan-e tüopa-a hahlak.

¹⁹Numan-e nyih ja, yejema-a nyih ni, yejema-a nyih nga, yejema-a nyih pen, yejema-a nyih da hei hahlak yeje;

²⁰hüpoi lekeng nyippe, nateang me tüopa khaktinge manngai manngai, hüyange tüopawe dakne menge manngai manngai hahlak, hangjingne numan yo me ngohpu Youngwanpa numan-e yeyah hüyange I sheshao me, “Hangjingne toman Egypt mepu ngaipu she shappe i!” ’ ”

²¹Hüpoi Mosawe i, “Kahtalan aoyin yome tao ngohnang, ya me kempu haja gho wok ngohnang; hüyange nange iyangki ‘Nange imante lekeng ja mah-e hahlak mei imante phalak!’

²²Imante khak wange uhlakjingne nyee ükhong hei mahu ükhong toipu oklak a? Yejema-a yengching me nyah khongkümpu iman jingne omyapoi tüowe iman wanglak a?”

²³Youngwanpawe Mosate i, “Youngwanpa yak jamloi shoh-e ngoh nangkü a? Ü-ngao ütingme ngaikülak heiya yengailakei nange sha-a me peiye ngelak.”

²⁴Tüokhei Mosa kem-e tai hüyange Youngwanpa ngaolan kahtalante ngaowe tam; hüyange kahtalan yo mepu lwngmei denyit Iye jemne tam, hüyange nyenok neikonne yongne tam.

²⁵Hüyange wangphom me Youngwanpa yuwe Ite ngao hüyange I tangme ngohpu yaha ütam yahpuwe lwngmei denyit tangme pahtam; hüyange aope yaha-a iman tangme pahyapeih, iman-e hi-ngao itte hipalan kih-e ngaone wang, hüpoi hipak laowe yengoh.

²⁶Tüoyangpoi woipalan denyit yo mepu naoshe ni Eldad hei Medad ni khümjing nyenok yekaote yetaipe iman lakjing me ngoh yangki. Hüwante iman ngohpu lakjing me yaha pah pei, hüyange imni-o ngengpalan kih-e üngwünne itpu ngaowe ngai.

²⁷Hüwante naoshe ja, Mosa tangte phette peiye Eldad hei Medad ni-e hanghe itpu ngao i, tüopa ngaolan iye tam.

²⁸Hüwante Nun üha Joshua aohipawe Mosa shaoshan-e jam-e pongpa ne ngoh pei, Iye Mosate ngaowe i, “Ü-nokpu Mosa, iman lakne tamshih!”

²⁹Hüpoi Mosawe Ite i, “Nange üjingne mongshange teihnang kü a? Youngwanpawe yoi yaha imante pahne tam-e Youngwanpa kahta khongkümpu hipalan-e mengshi phang meihah shepu! she taowe mongnang!”

³⁰Tüophei me Mosa hei Israel lwngmeilan lakjingte leihye.

³¹Hüyange mokhshe Youngwanpawe wangyang ja shon, tüo kaiye yengching mepu awshilan kahtok mepu feet lüm nanjing daowe puwe pei. Iman lakjing mepu nyih ja kem okjangpu nyoi yah-e üshei yekao me pah.

³²Tüokhei tüopa nyihlao hipak, wangnyak phapan, hüyange üne nyih nyihlao hipak, kahtalan-e awshi phowe nan-yengaipe toi ling; aowe-o kilogram haja ja yengoipe yetoon. Iman-e tüolan-a lakjing khongkümpu neikon-e wanne ang.

³³Hüpoi üne-o iman jingne mei üngang, hüyange mei-a fa nipa me ngohwante, kahtalan phei Youngwanpa mongshih ngai hüyange iman yome dak ümeng ngaine tam-e iman toi.

³⁴Tüopa nyoite “Hahnyak Mangjong” she min tam; hangjingne tüoken me iman-e kahtalan aoyinne mei hahhuwe wao iman mang muwe tam.

³⁵Hahnyak mangjong mepu kahtalan Hazerothte yayong, hüyange tüoken me iman-e lakjing ling.