Read Konyak Naga LUNGTET 12 Bible Online

LUNGTET 12 - Konyak Naga bible

LUNGTET 12

¹Mosawe Cushlan sheko ja yahpu jengme Miriam hei Aaron niye Mosa phei tüi-e ngao, hangjingne Iye Cushlan shekone yah.

²Hüyange imni-e i, “Youngwanpawe Mosa kaiye hei ngaonang kü a? Iye teman kaiye-o yengaopu-a?” Hüyange imni-e hanghe ngao i, Youngwanpawe tüopa jai.

³(Shaa-a Mosa yeonge innenyaipu kahta ja, kahtok me ngohpu kahtalan üshei yo me ünyei innenyaipu ja ne ngoh yangki.)

⁴Mokhshe Youngwanpawe Mosa, Aaron, hüyange Miriam lante i, “Taowe numan lüm khümjing nyenokte ongne tamhu nang.” Hüyange iman lüm peingoi.

⁵Hüyange Youngwanpa wangphom shongnyu ja me hüyange khümjing nyenok tafün shongme yong, hüyange hüke nyik, “Aaron! Miriam!” Hüyange imni moini sheshao yete wen.

⁶Hüyange Youngwanpawe i, “Sha-a Taowe hang ilakei ü-ngao jaitüoh! Aope numan yo me hipalan ngoh, Tao Youngwanpawe ü-nying nyingke, imante himang me ngaiye tam, hüyange Taowe iman phei mang me ngao yangki.

⁷Hüpoi Taowe aope ü-shaoshanpa Mosa phei ngaoya peih tüopa-a yoi yoi ne ngohnang; Taowe I-a ü-kahta Israellan üshei tangme yakjongpa ne menge tam.

⁸Tüokhei Taowe Ipheiya sheta hei sheta teihüowe lüppe lowe yeje, ngaiphaih-e ngaonang; Iye ü-püm hei tangta nehoi ngeyangki! Hüma-a hangne nangniye ü-shaoshanpa Mosa phei tüi-e ngaolak mongyong pu?”

⁹Hüyange imnite Youngwanpa mongshihpu loong ngai; tüojingne I yanne tai.

¹⁰Aope khümjing nyenok tangmepu wangphom I yanne tai, leihuyah, mokhshe Miriamte üsho me ngonma ngai hüyange yi kih-e henge ngai. Aope Aaron-e Miriamte lei, yha ngon tei-e ngoh.

¹¹Iye Mosa te i, “Üyongpa chingmei lamlinge toman ngayounpu ünu jingne toman shaoshi ne tahtam kei.

¹²Yoinyu sea mepu puhwante ühak tamme shonge yenangpe puhpu kahta kih-e, yha lipu kih-e tahmeng tamkhu, she taowe yoppe tongnang.”

¹³Mosawe Youngwanpate üngwün-e i, “O Kahwang, taowe yoppe tongnang, yha meiye tamshih!”

¹⁴Youngwanpawe Mosate jan-e i, “Ipawe yha shetate iyphao phaotam küma-a yha wüopu phei nyih nyit lowe yengohlak a? Lakjing ü-at yeme nyih nyit yha küppe tüotüoh hüyange tüophei me yha nishe woiye yepu oklak.”

¹⁵Tüokhei nyih nyit lakjing ü-at yeme Miriam küppe angyangki, hüyange Miriam nishe leih-e woiye manye manye kahtalan yayonge yetai.

¹⁶Tüophei me kahtalan-e Hazeroth mepu yayonge tai hüyange Paran phaonyu jong me lak.