Read Konyak Naga LUNGTET 13 Bible Online

LUNGTET 13 - Konyak Naga bible

LUNGTET 13

¹Youngwanpawe Mosate i,

²“Israel lante Taowe phane ngoh pu, Kanan kahtok kuhshüklak jingne nange kahta shontüoh; iman nokphong penme ni mepu woipa kahta japong letüoh”.

³Tüokhei Youngwanpawe ngaowe tampu kih-e, Mosawe Paran phaonyu jong mepu iman shon; iman khongkümpu Israel hayim woipalan-ne ngohyangki.

⁴Hüyange tüolan-a iman min ne ngoh yangki: Reuben nokphong mepu, Zaccur üha Shammua;

⁵Simeon nokphong mepu, Hori üha Shaphat;

⁶Judah nokphong mepu, Jephunneh üha Caleb;

⁷Issakhar nokphong mepu, Joseph üha Igal;

⁸Ephraim nokphong mepu Nun üha Hoshea;

⁹Benjamin nokphong mepu Raphu üha Palti;

¹⁰Zebulun nokphong mepu Sodi üha Gaddiel;

¹¹Joseph nokphong mepu hatüowa Manasseh nokphong, Susi üha Gaddi;

¹²Dan nokphong mepu Gemalli üha Ammiel;

¹³Asher nokphong mepu Mikhael üha Sethur;

¹⁴Naphtali nokphong mepu Vophsi üha Nahbi;

¹⁵Gad nokphong mepu Machi üha Geuel.

¹⁶Kahmük te kuhshüklak jingne Mosawe shonpu kahtalan min tüolan ne ngoh yangki. Hüyange Nun üha Hoshea te Mosawe Joshua she leijei-e nyik.

¹⁷Aope Mosawe iman shonne teiyapeih, Iye imante i, “Tüomepuwa apyekao me taiye Kanan kahmük heyekaote ongtüoh hüyange tüophei me phaotang kahmük te ongtüoh.

¹⁸Hüyange kahmük-a hangke, tüome ngohpu kahta-a wong nange heiya wong yenangpe ngoh, iman ükhong üjoi heiya üngang, leitüoh.

¹⁹Hüyange iman ngohpu kahmük-a hangke ngoh, meipu heiya yemeipu; hüyange kahtalan ngohpu chingnyulan-a üko me heiya meipe latyange ngoh leitüoh.

²⁰Hüyange kahmük-a hangke ngoh, üyao ngohnangpu heiya yenangpu weih, hüyange yüngnyu yüngjong ne ngohya leitüoh. Hüyange tüoken me lickke ngaipu pelick ütam yahyange yelak monge teih yah.” (Sha-a tüopa hipak-a wuwünglick yüm-e wangpu hipak ne ngohyangki.)

²¹Tüokhei kahtalan yayonge tai hüyange Hamath Lamkeng Zin yüngnyu mepu Rehob ngoiye kahmükte kuhshük.

²²Hüyange iman üwangne heyekao kahmükte ong, hüyange Hebronte pei; hüyange tüoken me, Anakim she nyikpu kheyongpu huhayimlan mepu Ahiman, Sheshai, hüyange Talmai puhulan nyoingoh. (Sha-a Hebron-a Egypt me Zoan phei nehoi wangpeng nyit shaoyete linge nyoiteiye ngoh yangki).

²³Hüyange iman Eshcol kahjee te pei, hüyange tüome iman-e üqui ja lang, hanghe me wuwünglick üjep ja nang yange ngoh hüyange hatüowa kahta niye sheam leyange pailak üne yeonge üjep yonge yih-e ngoh. Iman-e tüophei üne-o chamuk hei phuklick ütam yahyange yeyangki.

²⁴(Tüopa nyoite Eshcol kahjee she nyik, hangjingne Israel kahtalan-e tüoken me wuwünglick üjep lange yah.)

²⁵Nyih deli mongme kahmükte leiye pongyang phei me, kuhshükpalan leihye.

²⁶Hüyange Mosa, Aaron, hüyange Kadesh me Paran phaonyu jongme Israel kahtalan ükhong khongkümpu tangte iman leihye; hüyange iman-e hanghe nge khongkümpu ngaolan ükhongte pha, hüyange iman-e yahyepu pelicklan hüowe tam.

²⁷Hüyange iman-e Mosate i, “Nange ümpeyekao te toman shon tüopa kahmükte pei hüyange ütingme tüopa-a düamyeng hüyange zahtai jelo yünnangki; hüyange tüopa mepu ülick-a hatüo üja.

²⁸Tüoyangpoi tüome nyoipu kahtalan-a yeonge wongnange, hüyange imanjing chingnyulan-a yeonge yonge hüyange yeonge meiye meipe latyange ngoh nangki. Shemengpupa ne toman-e ngepuwa Anak huhayimlan ngohnang ei.

²⁹Heyekao kahmük me Amaleklan ngoh nangki, hüyange kahtang nyoilan me Hitlan, Jebuslan, hüyange Amorlan ngoh nangki; hüyange Kanan lan-a Mediterranean yengching nahme, hüyange Jordan yengyin yengnah paowe nyoi ngohnang ki.”

³⁰Hüyangpoi Caleb-e Mosa kaiye yongpu kahtalan sheshao me imante ngao ngaine yetampe i, “Teman-e sha-a shümlak hüyange kahmük-a teman-e yahlak; tüolan chinghah okjange teman wongnange ngohnang.”

³¹Tüoyangpoi Caleb phei taiyangpu kahtalan-e i, “Yeje, iman chinghah jange teman wongnange yenang; tüoken me ngohpu kahtalan-a teman phei ünyei wong shenang she ngohnang.”

³²Tüokhei iman-e tahleih ngaolan iman-e kuhshükpu kahmük jeng Israel lante pongne tam. Iman-e i, “Tüopa kahmük-e tüome ngohpu kahtalan wangjange nehoi hahying yengai tampu ei. Toman-e ngepu kahta lili-a yeonge jin daowe ngeyangki.

³³Hüyange tüome toman-e Nephilim (Anak huhayimlan, aoyin Nephilim mepu pei) ngeyangki; Hüyange toman-a toman nying nyingke dukh shinne shoiye lingnang ei, hüyange tüokih-e teman-a iman sheshao me leilak ne ngaipu ei.”