Read Konyak Naga LUNGTET 14 Bible Online

LUNGTET 14 - Konyak Naga bible

LUNGTET 14

¹Hüwante ükhong khongkümpuwe ngao ngaiye üngwün; hüyange tüoya-a kahtalan shap.

²Hüyange Israel kahtalan khongkümpuwe Mosa hei Aaron ni phei tüi-e ngu-ngawe ngao ngai; hüyange ükhong khongküm puwe imnite i, “Kahwange toman Egypt kahtok me li ne tamme ngohshih phang! Yejema-a tüopa phaonyu jongme Kahwange toman li ne tamme ngohshih phang meihah shepu!

³Hangne toman yanglow-e mahtamlak ne Kahwange tüopa kahmükte woipei pu? Toman jing shekonyulan hüyange toman hayimlan hei toilak ne ngailak; teman jingne Egypt te leihyelak shemeipupa ne yejelak a?”

⁴Tüokhei iman-e jawejate teingaowe i, “Teman-e woipa ja lehah hüyange Egypt te leih yehah!”

⁵Hüwante ükhong khongkümpu jemme ngohpu sheshao me Mosa hei Aaron niye imni sheta khuhta.

⁶Hüwante kahmükte kuhshükpalan yo mepu Nun üha Joshua hüyange Jephunneh üha Caleb niye mongmengpuwe imni jing inkhek hit;

⁷hüyange Israel kahtalan khongkümpu te i, “Kahmük hanghepate toman-e kuhshük yangki, tüopa kahmük-a yeonge meipu kahmük ja ne ngoh nang.

⁸Youngwanpawe temante mongmeima-a Iye tüopa kahmük te teman woipeilak, hüyange düamyeng hei zahtai jelo yünne ngohpu kahmük-a temante phakülak.

⁹Youngwanpa phei tüi-e hokke weye tahyong, yejema-a kahmük me ngohpu kahtalante numan-e nyam-e tahteih. Teman-e iman-a oloh-e naolak. Youngwanpa-a teman phei ngohnang, hüyange iman yin-e tam-e ngohpu kahwanglan-a Iye naowe tamteki; tüokhei nyam-e tahteih.”

¹⁰Hüpoi ükhong khongkümpuwe imnite longe shüppe toine she nyamshaowe tam-e yong; hüwante mokhshe Youngwanpa phihlangpu wangngai khümjing nyenok me peipu Israel kahtalan üsheiye nge.

¹¹Hüyange Youngwanpawe Mosate i, “Tüopa kahtalan-e hangshin me Tao yeyahlak shi? Hüyange iman yo me kahnyingwüngha khongküm Taowe teshin-e lingya peyoi hangshin me iman-e üte üting yelak lakshi?

¹²Taowe imante leamdak ngaiye li ne tamlak, hüyange iman mothlei ne yetamlak, hüpoi Taowe nanga sha-a iman ngohpu phei wong sheyong she hüyange yongpu jat ja üpa ne linge tamlak!”

¹³Hüpoi Mosa Youngwanpa te i, “Hüma-a Egyptlan-e hatüo jailak; hangjingne iman yo mepu nang üngan wong kaiye nange tüopa kahtalan woipei;

¹⁴hüyange hatüo iman-e tüopa kahmük me ngohpalante ikülak. Nang Youngwanpa tüopa kahtalan yo me ngohnang she iman-e jaiteki; hangjingne nang Youngwanpa sheta hei sheta tei nge nang hüyange nang wangphom iman tangme yongnang, hüyange nyihning wangphom shongnyu me hüyange yaning vün shongnyu me nange iman sheshao me tainang.

¹⁵Sha-a nange hatüolan kahta khongkümpu toilakei she ima-a, hüwante nang yonge lüopu jaipu jatlan-e ilak:

¹⁶‘Youngwanpawe imante janpu kahtokte hatüolan kahta Iye woiye peipu ye-ok, tüokhei Iye iman phao me toi winnang she ilak.’

¹⁷Tüokhei sha-a Youngwanpa, taowe nangte nang üngan wong hüopha hüyange nange hanghe janyangki ling pha she yoppe tongnang; hüke nange,

¹⁸‘Youngwanpa Taowa oloh-e mongshih ngaipu ja ne yeje, hüyange Taowe kenpu üyong hüyange monghüm-e tampu hüonang, hüyange ünu hüyange hokkeweye ngaipute ümeng wintam nang; Tüoyangpoi inyu ipalan ünu jingne Taowe iman hayimlan hei huyimlante jin lüm hei jin peli ngoiye shangne tamlak mepu Taowe yelanlak she i.’

¹⁹“Sha-a, taowe nangte yoppe tongnang, nang yayeng shüpshe yongpu kih-e tüolan kahtawe püohyangpu, hüyange Egypt mepu sha-ate ngoiye nange tüolan kahtate ümeng winpu kih-e ümeng winpha.”

²⁰Hüwante Youngwanpawe jan-e i, “Nange tongpu kih-e Taowe iman ünu winlak.

²¹Tüoyangpoi Taowe jan nang, Tao üting tingha me üyin ngohpu kih-e, hüyange kahtoknyu khongkümpu me ümüktishiwapuwe maapu kih-e,

²²tüolan kahta aowe-o tüopa kahtokte ongne üyin me yengohlak. Hangjingne iman-e Tao ompu phihlangpu wangngai ngeyangki, hüyange Egypt me Taowe lingpu hüyange phaonyu jongme lingpu yashan yali ngeyangki, hüpoi iman-e Taowe nün-okyashi she pen phei nyeiye toknang hüyange ü-ngao minjai she lannang.

²³Taowe imanjing pajeiyong lante janpu kahtok iman-e aope-o ye-ngelak, yejema-a üte phoipalan jawe nehoi hatüo ye-ngelak.

²⁴Hüpoi ü-shaoshanpa Caleb, hangjingne Ime yaha yoi yoi ne ngohtepuwe, hüyange mong phün-e phawe ü-pheite woipu jingne, I taiyangpu kahmükte Taowe I woipeilak, hüyange I huhayim lan-e tüopa-a mothleilak.

²⁵Sha-a, kahjee me Amaleklan hei Kananlan ngohtepuwe ngainyih-a lüppe yetüoh hüyange Ütak Yengching yetepu phaonyu jong yekaote ongtüoh.”

²⁶Hüyange Youngwanpawe Mosa hei Aaron nite ngaowe i,

²⁷“Hangshin me yemeipu tüolan kahtawe ü-phei tüi-e ngao ngaiye ngu ngalak shi? Iman-e ngu-ngawe ngao ngaipu Taowe wangman-e jaiteki!

²⁸Imante itamtüoh: ‘Taowe janpu phawe inang, hüke Tao üting tingha me üyin me ngohtepuwe numan-e hanghe tongyangki, tüopa khakshuwe Taowe linglak. Tao, Youngwanpawe ngaoteki.

²⁹Numan lipu mang tüopa phaonyu jongme te-shailak; hüyange wangpeng da me peipu ütokye shangtoi ipu me om, aoyinne ü-phei tüi-e yongyangki lilak.

³⁰Tüopa kahtok me numan nyoine tamlak she Taowe jan; hüpoi sha-a Caleb hei Joshua ni tokte kaiye numan aowe-o yengoi oklak.

³¹Numan-e iyangki numan jing hayimlan-a wepalan-e phowe kümlak. Hüpoi numan-e minyah she winpu kahmükte Taowe iman woipeilak, hüyange tüopa-a imanjing nok ne menglak.

³²Hüpoi numan jingne-a, numan lipu mang tüopa phaonyu yüngjong me winlak.

³³Hüyange numan hayimlan phaonyu yüngjong me wangpeng deli ngoiye nyeeyom-e ponglak, hüyange phaonyu yüngjong me numan yo me ükümpa ne lipu mang seanam-e mantai mantai numan-e nuweshakpu hangki yih iman-e kilak.

³⁴Numan-e kahmük kuhshükyangpu nyih ityange, hüke nyih deli, nyih ja ja jingne wangpeng ja-a, hüke wangpeng deli, numan-e ompu ünu numan-e kilak, hüyange numan-e tao mongmengne tamyangpu shinge peilak.’

³⁵Tao, Youngwanpawe ngaowe shoyangki; ü-phei tüi-e jemyange yemeipe ngaowe ngohpu tüopa ümengpa ükhong khongküm pute ütingme Taowe toi linglak; tüopa phaonyu yüngjong me iman ükümpa ne yeiye kümlak hüyange tüome iman lilak.”

³⁶Hüyange Mosawe kahmükte kuhshüklak jingne shonpu leih yepu kahtalan, aoyinne kahmük yemei she ngaolan ümeng yah peipuwe ükhong khongkümpuwe Youngwanpa phei tüi-e ngao ngaiye ngu-nga ne tam,

³⁷hüke kahmük jeng ngaolan ümeng yahpeipu kahtalan Youngwanpawe leamdak ngaine tam-e li ne tam.

³⁸Hüpoi kahmükte kuhshüklak jingne taipu (pen me ni) yo me Nun üha Joshua hüyange Jephunneh üha Caleb towe üyinme ngoh.

³⁹Aope Mosawe Israellante Youngwanpawe hanghe i tüopa ngaowe tamwante, iman yeonge khah-e shap.

⁴⁰Ünenap shomme iman tüm-e yayong hüyange hüke i, “Sha-a leitüoh, Youngwanpawe ngaowe tampu kahmükte ongne toman tüome tümyange ngohnang. Toman-e ünu omyangki she toman-e shing nang.”

⁴¹Hüpoi Mosawe i, “Hangne numan-e sha-a Youngwanpa ngao yejaipe yongki? Numan-e okpu ye-ngelak!

⁴²Tah tai. Youngwanpa numan phei yenang ja, hüyange numan wepalan-e numante naopha lak.

⁴³Hangjingne numan sheshao me Amaleklan hüyange Kananlan ngoh nang, hüyange numan-a shapju me lilak; Youngwanpa numan phei yengoh külak, hangjingne numan-e I pheite minwoi she lanyangki.”

⁴⁴Tüoyangpoi iman phei Youngwanpa jiengjeppu ghonu yejema-a Mosa lakjing mepu ya yeyongpu shing jang shinge phaotang kahmükte iman onglak jingne ngang.

⁴⁵Hüwante Amaleklan, hüyange tüopa kahtangme ngohpu Kananlan-e imante shümme pei, hüyange iman phei hokke naoyange Hormah ngoiye imante jange tam.