Read Konyak Naga LUNGTET 15 Bible Online

LUNGTET 15 - Konyak Naga bible

LUNGTET 15

¹Youngwanpawe Mosate ngaowe i,

²Israellante ngaotüoh hüyange imante itüoh: Aope numan jingne taowe phapu kahmük te numan peilakeih,

³hüyange numan-e Youngwanpa te jakke dopu yinmok ükhong yejema-a mantoop mepu, jakke dopu ne jeyah, yejema-a toidopu ne jeyah, jiengjeppu ütahte hüopu ne mongloong dopu ja ne yejema-a numan-e wangpangpute ngohhümpu motapulan tüolan dopu üpe meipuwe Youngwanpate mongmei ne tam lak jingne dopu phatüoh.

⁴Aowe jakke dopu ja ne Youngwanpate nyeeja yejema-a youn ja yah peiyalakei, Iye yinmok ja ja jingne ülick dopu ja ne olive minnga litre japong nyütyang phei ankhoih kilogram japong,

⁵tüotokte, hahying dopu ja ne numan-e taksheng peli mepu meitam ja, jakke dopu phei jam-e yejema-a toidopu nyee ja ja jingne dolak yang.

⁶Aope nyeepong dolakei, ankhoih kilogram ni olive minnga litre ja phei me tangkhüw nyütyange ülick dopu ja ne yah peilak yang,

⁷tüophei jam-e wuwüngti litre ja phei me tangkhüw phei yah peilak yang. Tüopa dopu üpe meipuwe Youngwanpate mongmei ne tamnang.

⁸Aope Youngwanpate jakke dopu ja ne yejema-a shüppe jempu dopu ja ne mahu üpong doyalakei,

⁹ankhoih kilogram lüm olive minnga litre ni nyüt yange ülick dopu ja ne yah peilak yang;

¹⁰tüophei jam-e wuwüngti litre ni yah peilak yang. Tüopa dopu üpe meipuwe Youngwanpate mongmei ne tamnang.

¹¹“Hüke mahu üpong lili jingne, nyeepong lili jingne, nyeepongha lili jingne, yejema-a younpongha lili jingne linglak yang.

¹²Numan-e aope yinmok ja tokte nyeiye dolakei tüopa phei jam-e phapu lili jingne hüke tüolan shangtoi phei shuwe numan-e paowe linglak yang.

¹³Youngwanpate üpe ümei jingne hahying dopu phawante, Israel nyupuh lili ye hükih-e linglak yang.

¹⁴Hüyange yinpa ütam nang phei ngohma-a, yejema-a numan yo me jin küm-e ngohpu ne jeyah, Iye Youngwanpate hahying dopu üpe ümei doma-a, Iye hüke khakshuwe numan-e lingpu kih-e linglak yang.

¹⁵Ükhong jemlak jengme numan jingne hüyange yinpa jingne chingnyoi nokshaoh wanglam ja hei ngohlak, numan jin küm-e jinte ngaokhüm, yinpa hüyange numan Youngwanpa sheshao me ja hei ngohlak.

¹⁶Numan hüyange numan phei ngohpu yinpa jingne ngaokhüm ja hüyange chingnyoi nokshaohpu wanglam ja hei ngohlak.”

¹⁷Youngwanpawe Mosate ngaowe i,

¹⁸“Israel kahtalante itüoh, Taowe numan woipeilakpa kahtokte numan aope onglakeih,

¹⁹hüyange aope numan-e kahmük mepu hahying hahyalakei, numan-e Youngwanpate dopu ja phalak yang.

²⁰Aope numan-e an ngüowe linglakei, tahlick üla mepu üwangpa hahying tepu üwangpa anbunga shemeipupa dopu ja ne Youngwanpate yah peilak yang.

²¹Hatüowa numan-e tahnoi jing mepu tahlick shemeipupa dopu ja ne hangke yahpei tüokih muh tüopa-o jin küm-e yahpeilak yang.

²²“Hüpoi leppu ja me kahta ütam-e yeshingpe Kahwange Mosa te phapu ngaokenglan püohma-a;

²³hüyange leppu ja me ngoikülak hipak me ükhonge Youngwanpawe Mosate phapu ngaokenglan yejon okpe püohpu ne mengma-a:

²⁴Püohpinpuwa ükhonge üpong yetüopu kaiye püohpinpu ne mengma-a, iman-e jakke dopu ja ne mahu üpong ja khakshupu ülick dopu hüyange wuwüngti dopu phei jam-e, üpe ümeiye Youngwanpa mongmei ne tampuphei dolak yang. Tüopa tokte paowe, iman-e ünu dopu ja ne younpong ja dolak yang.

²⁵Hüyange Israel kahtalan bangha jingne ngengpawe wanglam me ünu tantampu ja linglak yang; hüyange imante ümeng winlak; hangjingne iman-e hatüowa yeshingpe püohpin-e ngoh, hüyange Youngwanpate hahying dopu iman-e yoi dopu yahpeiteki, hüyange iman-e püohpinpu jingne Youngwanpa sheshao me ünu dopu yahpei teki.

²⁶Hüyange Israel kahtalan bangha, hüyange iman yo me ngohpu yinpalan khongkümpu te ümeng winlak; hangjingne kahta liliye püohpinpu me omyangki.

²⁷“Kahta jawe yeshingpe ünu om ma-a, hüwante ünu dopu jingne Iye wangja nao younpongha jawe dolak yang.

²⁸Ngengpawe wümjong me tüopa kahta ünu mepu jaolak jingne wanglam kih-e jaowe tampu ja linglak, hüyange Ite ümeng winlak.

²⁹Tüopa ngaokeng ja muh aoyinne yeshingpe ünu om tüolan khongkümpu jingne jonlak, hüke I-a Israel puhu ne jeyah, yejema-a yinpalan-e jeyah yafün ja ngohlak.

³⁰“Hüyangpoi kahta aohiye shingjang shinge ünu omlakei, I-a nyupuh kahta ne jeyah, yejema-a yinpa ne jeyah, Iye Youngwanpa phin me püohpin-e yongnang; tüokhei tüopa kahta-a kahtalan yo mepu li ne tamlak yang.

³¹Hangjingne Iye Youngwanpa ngao ye-i-yeshepe lingnang, hüyange Iye phapu ngaokhümlan yo mepu ja Iye shingjang shinge mengnang. Tüopa kahta-a jaosheye lange winlak; Iye ompu ünu I tangme ngohlak.”

³²Aope Israellan phaonyu jongme ngoh, kahta jawe Sabbath nyih me han yah ngohpu pho;

³³Hüyange aoyinne I hanmoiye ngohpu hipak me pho, iman-e I Mosa hei Aaron hüyange ükhong khongkümpu sheshao me woipei;

³⁴hüyange iman-e I yomyange ang, hangjingne Ite hanghe linglak hatüo üne-o shingne man tampe ngoh yangki.

³⁵Hüwante Youngwanpawe Mosate i, “Kahta hatüowa li ne tamlak; lakjing ü-at ye me ükhong khongkümpuwe Ite longe shüppe toilak.”

³⁶Tüokhei Youngwanpawe Mosate ngaowe tampu kih-e, I lakjing ü-at yete yah yüowe ükhong moilan-e longe shüppe I toi.

³⁷Youngwanpawe Mosate i,

³⁸Israel kahtalante hüke ngao tüoh: “Numan jing nyemo üjeng me nyejeng lingtüoh hüyange nyejeng lili me wanghüng wu satüoh. Numan-e tüopa-a ngoikülak numan jin khongkümpu me linge jonlak.

³⁹Tüopa nyejenge teihtüo pu ja linge tamlak, hüyange numan-e tüolan ngepu lep iye numan-e ü-ngaokhümlan teih tüolak, hüyange tüolan jonlak; tüome nakshih numan ü-mepu yanne yetailak hüyange numan nying nyingke monge lahnyikpu yekaote yetailak.

⁴⁰Hüke nyejeng kaiye numan-e ü-ngaokenglan jonlak jingne teihtüone tamphalak hüyange numan-a üjingne jaosa-e ngohpu oklak.

⁴¹Taowa numan Kahwang Youngwanpa; aowe Egypt kahtok mepu numan Kahwang ne menglak jingne woipei; Taowa numan Kahwang Youngwanpa.”