Read Konyak Naga LUNGTET 16 Bible Online

LUNGTET 16 - Konyak Naga bible

LUNGTET 16

¹Sha-a Levilan puhu Kohath mepu Izhar üha Korah-e I phei jam-e Reuben nokphong mepu kahta lüm Eliab üha Dathan hei Abiram, hüyange Peleth üha On,

²hüyange ükhonge lepu ülao Israellan mepu woipa ütah gho ni denga omyange Mosa phei hok-e weye yonglak jingne mongyonge ngai.

³Mosa hei Aaron ni sheshao me iman jem hüyange imnite i, “Nangni jamloi she tainang! Ükhong kahta lili Youngwanpa jing ngohnang: hüyange teman üshei phei jakih-e Youngwanpa ngohnang. Hüma-a, Mosa, hangne nange nang nying nyingte Youngwanpa jing üshei tangme nang shaha ütahpa she teihpu?”

⁴Aope Mosawe tüopa jai, I yoi nying nyingke kahtokte khuhta hüyange yop.

⁵Hüyange Iye Korah hüyange I ükhong khong kümpute i, “Ngainap shomme Youngwanpawe I jingne aoyin meng temante hüopha lak; ao I jingne ngoh tüopa-a Iye I shongte peine tamlak; hüke ao Iye lelakei, Iye I-a wümjong sheshao me wenne tamlak.

⁶Tüokih-e lingtüoh: Korah hüyange nang pheipulan khongkümpuwe muktük yahtüoh,

⁷hüyange ngainap tüopa me vünoun angtüoh, hüyange tüolan me Youngwanpa sheshao me sünyet angtüoh; hüyange kahta aohe Youngwanpawe le üjao ne menglak, numan Levilan loishe tainang!”

⁸Hüyange Mosawe Korahte ngaowe i, “Numan Levilan, jaiyah!

⁹Israellan ükhong mepu numan shaha leyange I shongte peine tampuwa, hatüowa üjoi ünao toi a? Youngwanpa khümjing nyenok me shaoshanlak; hüyange ükhong sheshao me yongyange iman shaoshanlak;

¹⁰hüyange Iye nang I shongte owepei tamlak, hüyange nang phei nang jeihei naolan Levi hayim khongkümpu I shongte owe peitamlak? Hüyange sha-a numan-e ngengpa toishao-o yampu a?

¹¹Tüojingne nang hüyange nang shümpalan khongkümpu jempu hatüowa Youngwanpa phei tüi-e ngohnang; hüyange numan-e Aaron phei tüi-e ngao ngaiye ngu-ngalak ne Iye hanghe lingpu?”

¹²Hüyange Mosawe Eliab hayim Dathan hei Abiram nyikne shon; hüpoi imniye i, “Toman min pei!

¹³Egypt kahtok düamyeng hüyange zahtai jelo yünne ngohpu kahmük mepu nange toman woiye peiye phaonyu jong me toilak, hüyange toman tangme nang nying nyingke woipa ne menglak hatüowa üjoi ünao ja a?

¹⁴Nange ütingpa me düamyeng hei zahtai jelo yünne ngohpu kahtokte toman woiye manpei; yejema-a tomante kah yejema-a wulick kah toman mothlei ne menglak jingne manpha pe angyange, üne-o sha-a nange toman lowelamne ngangnang! Toman yepeilak!”

¹⁵Hüwante Mosa yeonge mongshih ngai, hüyange Youngwanpa te i, “Iman-e yahpeipu dopulan hango tahyah. Taowe iman mepu gado ja nehoi yeyah, hüyange iman aote-o hanghe ümengo yeling.”

¹⁶Hüyange Mosawe Korahte i, “Ngainyih nang hüyange nang pheipu gho ni denga khongkümpu Youngwanpa khümjing nyenok te peilak yang; hüyange Aaron-o tüoken me ngohlak;

¹⁷hüyange numan kahta liliye yoi yoijing muktük gho ni denga yahlak, tüopa me sünyet angtüoh, hüyange tüopa-a wümjong me peitam tüoh.”

¹⁸Tüokhei iman kahta liliye yoi yoi jing muktük pei hüyange tüopa me vünoun hüyange tüopa tangme sünyet ang, hüyange khümjing nyenok tafün shongme Mosa hei Aaron ni phei yong.

¹⁹Tüophei me Korah-e iman phei tüi-e khümjing nyenok tafün shongme ükhong üngang jemne tam. Hüwante mokhshe Youngwanpa phihlangpu wangngai ükhong üshei tangme ngai.

²⁰Tüophei Youngwanpawe Mosa hei Aaron nite i,

²¹“Numan nying nyingke tüolan ükhong yo mepu tokphei yete shinne yetüoh, üten japu mongme Taowe iman mah ne tamlak.”

²²Hüyangpoi Mosa hei Aaron ni kahtokte imni sheta khuh ta, hüyange i, “O Kahwang, kahtanyuha yaha üshei tangme nang hei nokpu ngohnang; kahta jawe hei ünu ompute nange ükhong khongkümpu tangme mongshih ngailak a?”

²³Hüyange Youngwanpawe Mosate i

²⁴“Ükhong te itüoh, Korah, Dathan, hüyange Abiram ümeken me ngoh, tüopa nyoi mepu sheng tüoh.”

²⁵Hüwante Israel lwngmeilan yahyange Mosa yayong hüyange Dathan hei Abiram tangte wen.

²⁶Hüyange Iye ükhongte i, “Tüolan Kahta ümenglan nyenok mepu yantüoh she taowe numante inang, hüyange iman jing hanghete-o tahlet hüke yeling yahma-a iman ünu üshei phei nang om-e moiye teiphalak.”

²⁷Tüokhei Korah, Dathan, hüyange Abiram ngohpu nyenok üshei yemepu iman yanne tai. Hüwante Dathan hei Abiram, iman shekonyu lan, hayimlan, hüyange üjoilan phei ngaiye iman nyenok tafün shongme yong.

²⁸Mosawe kahtalante i, “Tüokih-e lingpuwa taowe yoiye mongpuwe lingpu yeje, tüolan toishao khongkümpu linglak jingne Youngwanpawe tao shon she numan-e shinglak.

²⁹Tüolan kahta li mei me li ma-a, yejema-a iman kahta khongkümpu wanglam kih-e lima-a, hüma-a Youngwanpawe tao yeshon.

³⁰Hüpoi Youngwanpawe ülam ja üla lingma-a, hüyange kahtok-e yoi ju eppe iman me nangpu khongkümpu phei iman lünge taima-a, hüyange iman üyin me sheolte ta ma-a, hüwante numan-e tüolan kahtawe Youngwanpate phoiteki she shinglak.”

³¹Iye tüolan ngao khongkümpu ngaowe shopu phei jam she Dathan hei Abiram yonge ngohpu nyoi me kahtok phüppe tang.

³²Hüyange kahtok-e yoi ju kayange iman khongkümpu, iman noksalan hüyange Korah phei ompu kahta khongkümpu hüyange iman toinyu nanha khongkümpu lünge mah.

³³Tüokhei iman hüyange iman phei ompalan khongkümpu sheolte üyin me ta; hüyange kahtok-e iman tangme yüoh, hüyange ükhong yo mepu iman ye-ngepe mah.

³⁴Hüwante iman neikon-e ngohpu Israellan khongkümpu iman-e üngwün wante phette taiküm; hangjingne iman-e üngwün-e i, “Phettüoh! Yetaima-a kahtok-e teman-o lüngphalak yang!”

³⁵Hüyange Youngwanpa mepu vün pei hüyange sünyet jakke dopu kahta gho ni denga hahshu.

³⁶Hüwante Youngwanpawe Mosate ngaowe i,

³⁷“Aaron ngengpa üha Eleazarte aoyin kahta hah shuyangki tüolan-e tüohpu shakphan yanmuktük yahtüoh, hüyange muktük mepu vünhan nyoijing ütam-e shaitam tüoh, hangjingne muktüklan pa-a üjao ngoh nang she itüoh.

³⁸Aope tüolan muktüka Youngwanpa wümjong shongte yah peilakeih üjao ne meng nang. Tüokhei tüolan kahta aoyin iman yoi ünu jingne li ne tam tüolan jing muktük yahtüoh, pelakpu yankhüw ja ne mette lingtüoh, hüyange wümjongte shonglak ne lingtüoh. Tüopa-a Israel kahtalante deingao phapu ja ne ngohnang.”

³⁹Tüokhei Eleazar ngengpawe shakphan yan muktük hanghepa jakke dopalan-e do, tüolan-a yah, hüyange wümjongte shonglak pelakpu yankhüw ja ne mette ling.

⁴⁰Hatüowa Israel kahtalante hüke Aaron huhayimlan-e yejepute Youngwanpa jingne sünyet jakne wümjongte ao-o peine ye-oklak she deingao phapu ja ngohnang. Ngao yejai yahma-a, I-a Korah hüyange I kahtalan mahpu kih-e mahlak. Tüolan khongkümpuwa Mosa kaiye Eleazarte Youngwanpawe ngaowe tampu kih-e ling yangki.

⁴¹Üne nyih Israel kahtalan ükhong üsheiye Mosa hei Aaron ni phei tüi-e ngao ngai hüyange i, “Numan-e Youngwanpa jing kahtalan toiteki.”

⁴²Hüyange aope kahtalan Mosa hei Aaron ni phei tüi-e ngao ngaiye jem ta-e khümjing nyenok yekaote leih ye hüyange leitüoh, wangphom-e hatüo yüoh, hüyange Youngwanpa phihlangpu wangngai peipu iman-e nge.

⁴³Hüwante Mosa hei Aaron ni khümjing nyenok nokshao yete wen-e yong;

⁴⁴hüyange Youngwanpawe Mosate ngaowe i,

⁴⁵“Tüopa kahtalan ükhong yo mepu yan-e taitüoh, tüoken nyoi me Taowe iman mahtamlak!” Hüyange imni moiniye kahtokte sheta khuhta,

⁴⁶Mosawe Aaronte i, “Nang muktük yahyah, hüyange tüopa me wümjong mepu vünoun yahtüoh, hüyange tüo tangme sünyet angtüoh, hüyange hatüo ükhong yote mamshe yah wentüoh, hüyange iman jingne wanglam kih-e ünu tantamlak lingtam tüoh; hangjingne Youngwanpa mepu mongshih ngaipu ngaiye taiteki; leam ükong wangteki.”

⁴⁷Tüokhei Mosawe ngaowe tampu kih-e Aaron-e yah, hüyange ükhong jem-e ngohpu hotan te I phet; hüyange leihu, kahta yo me leam-a ükong wange ngohyangki; hüyange Iye vünoun tangme sünyet ang, hüyange wanglam kih-e kahtalan jingne ünu tantamlak Iye ling.

⁴⁸Lipu hei üyin nipa me I yong; hüyange leamdak lakmah.

⁴⁹Sha-a leamdak-e lipu kahtalan haja pen me peli gho nyit, tüome Korah toishao jengme lipulan ye-om.

⁵⁰Aope leamdak ngaipu lakya peih, khümjing nyenok tafün shongte Mosa tangte Aaron leihye.