Read Konyak Naga LUNGTET 17 Bible Online

LUNGTET 17 - Konyak Naga bible

LUNGTET 17

¹Youngwanpawe Mosate i,

²“Israel kahtalante ngao tüoh, hüyange iman mepu nokphong phe mepu wongjoi japong yahtüoh, iman nokphong woipalan mepu khongkümpu sheiye wongjoi pen me ni ngohlak. Kahta lili wongjoi me yoi yoi min nyantüoh,

³hüyange Levi wongjoi me Aaron min nyantüoh. Hangjingne iman nokphong woipa lili jingne wongjoi japong ngohlak.

⁴Hüyange khümjing nyenok ümeken me Taowe nang phei hüonang tüoken me jiengjeppu ghonu sheshao me nange tüolan-a angtüoh.

⁵Hüyange kahta aohipa lelakei, I wongjoi me üyoi ngailak; hüyange Israellan ngao ngaihümpu hanghepa iman-e nang phei tüi-e yelakpe ngu nga nang, tüo kaiye lakne tamlak.”

⁶Tüokhei Mosawe Israel kahtalante ngao hüyange iman woipalan khongkümpuwe Ite wongjoi pha, iman nokphong woipa lili japong, hüke wongjoi pen me ni; hüyange iman wongjoi yo me Aaron wongjoi ngoh yangki.

⁷Hüyange Mosawe wongjoi khongküm yahpuwe khümjing nyenok me Youngwanpa jiengjeppu ghonu sheshao me ang.

⁸Üne nyih, aope Mosa nyenokte ong, hüyange leihu, Levi nokphong jingne peipu Aaron wongjoi me üyoi ngaiteiye ngoh, hüyange üpeng peng hüyange almond pelick üyim lick!

⁹Hüyange Youngwanpa sheshao mepu Mosawe wongjoi lan-a Israel kahtalan tangte yah yüo; hüyange hanghe ngaiyangki iman-e nge, iman-e leiyange kahta liliye yoi yoi wongjoi yah.

¹⁰Hüyange Youngwanpawe Mosate i, “Ghonu sheshao me Aaron wongjoi-a yahye angtüoh. Hatüowa ngao ngaihümpu Israellante kentinglak jingne anglak, iman ngu ngapu yelakpe ngohyahma-a iman lilak.”

¹¹Hüke Mosawe, Youngwanpawe Ite ngaowe tampu kih-e Iye ling.

¹²Israel kahtalan-e Mosate i, “Leihuyah, toman mahpuweih, toman-o üjelak yang, toman khongkümpu üjelak yang!

¹³Kahta aoyin Youngwanpa ghonu shongte owe wen, lilak; teman khongkümpu mahlak a?”