Read Konyak Naga LUNGTET 18 Bible Online

LUNGTET 18 - Konyak Naga bible

LUNGTET 18

¹Youngwanpawe Aaronte i, “Khümjing nyenok me shaoshan wante püohpinpu ütamja ngaima-a, tüopa me ngaipu ümenga nange, nanghalan-e, hüyange Levilan-e kilak; hüpoi ngengpa toishao shanpu me nang hüyange nangha lan-e hei tüopa jingne shaoshilak ngohnang.

²Tüokhei aope nang hüyange nangha lan-e khümjing nyenok me shaoshan nang hüwante nang phei jam-e toi linge hüyange nangte jamlak jingne nang pheipulan hei Levi nokphonglan peine tamtüoh.

³Iman-e nangte hanghe linge tamlakne ngoh hüyange khümjing nyenok me iman toishaolan hanghe yin ngoh tüolan hei linglak, hüpoi üjao nyoi yejema-a wümjong me ngohpu üjao toinan te iman-e yenamnolak yang. Yejon laklante iman-e jonpaima-a nang hüyange iman moilan toine tamlak.

⁴Iman-e nang phei jam-e toi linglak hüyange khümjing nyenok me iman-e linglak meitam hanghe ngoh khongkümpu üshao ngoine tamlak; hüpoi yewang yengoipu kahta aowe-o nang phei toi lingne yetamlak.

⁵Nang hüyange nangha lan shahawe Üjao Nyoi hüyange wümjong me shaoshanpu üshao ngoine tamtüoh, hümme nakshih ü-mongshih ngaipu nishe Israel kahtalan tangme yepeilak.

⁶Nangte hünghao ja ne Israellan yo mepu nang pheipu Levilan leye tampuwa Tao ngoh nang. Iman-a üte jaowe tam-e phayangki, hümme nakshih iman-e khümjing nyenok me iman toishao linge taipu oklak.

⁷Hüpoi wümjong shongme jonne paipu hüyange Shejaopupa Nyoi me hanghe ngengpa toishaolan linglak ngohnang, tüolan toishao üshao ngoiye tamlaka nang hei nanghalan numan shaha ngohlak. Tüolan toishao me numan-e yak jonglak, hangjingne Taowe numante ngengpa ne menglak hünghao phayangki. Yewang yengoipu kahta ütam nehoi Üjao toinan shongte owe peima-a li ne tamlak.”

⁸Hüwante Youngwanpawe Aaronte i, “Hüyange leihuyah, nang jingne-a shemeipupa dopu üte yah peipulan tangme yakjong lak jingne Taowe nangte phanang; Israellan üjao hünghao khongkümpu Taowe hatüolan-a nang meitam ne phanang, hüyange nanghu hayimlan jin jintepu meitam ne phanang.

⁹Vün me yejakpe towe yinpu shejaopupa toinanlan nang jingne menglak; iman-e dopu lili mepu, hüyange iman hahying dopu lili mepu, hüyange iman ünu dopu lili mepu, hüyange iman püohpinpu jingne dopu lili mepu, hanghepa iman-e üte phalakei, nang jingne hüyange nanghalan jingne shejaopupa ne ngohlak.

¹⁰Nange hatüolan-a üshei phei shejaopu nyoi me hahlak; hüyange tüolan-a netanlan shahawe hahlak; hatüo nangjingne Üjao ne ngohlak.

¹¹“Tüo tokte paowe Israel kahtalan-e üte shemeipupa ne dopu ülaolan yahpeipu ngohma-a, tüolan-o nang jingne menglak. Taowe tüolan-a nangte, nang hayimlante, hüyange nangmepu yhala lante ngoikülak jin khongkümpu jingne phanang. Nenok noksa kahta liliye wanglamme aoyin jaowe shawe ngoh tüolan-a hahpu oklak.”

¹²“Israel kahtalan-e wangpeng lep iye, üwangne ngaipu hangheyin shemeipupa üte phanang; olive minnga, wuwüngti, hüyange tahlick Taowe nangte phanang.

¹³Iman kahtok me üwangne yümpu ülick, hanghepa iman-e Youngwanpa tangte yahpei nang, tüolan khongkümpuwa nangjingne menglak; nenok noksa me jaosa-e ngoh okpalan liliye hatüo hahlak.”

¹⁴“Israel me hüke lanshe phünne phayangpu toinan lili nang jingne menglak.”

¹⁵Shemin lamphe üwangne yam eppu, Youngwanpate phapu üyin yinmok khongkümpu, kahta jeyah, yinmok jeyah, nang jingne menglak; tüoyangpoi üwangne puhpu kahta nange ütingme yintamlakyang, hüyange üwangne puhpu yejao yeshapu yinmoklan nange yin tamlak yang.

¹⁶Hüyange yintamlak ne ngohpu nahalan-a lekeng ja ütokye nange tüolan ümee khümjing me jonpu toklak me khüm ükhüw nga ne ityange nang nying nyingke itte okpuwe shaklak yang.

¹⁷Hüpoi üwangne puhpu mahu, yejema-a üwangne puhpu nyee, yejema-a üwangne puhpu youn nange yeyin tamlak yang. Tüolan-a lanshe üjing ngoh nang hüyange tüolan-a toidolak yang. Tüolan iy yahpuwe wümjongte shaitüoh hüyange tüolantepu üyao lan-a hahying dopu ja ne jakke dotüoh, tüopa üpe meipuwe üte mongmei ne tamnang.

¹⁸Hüpoi tüolan mepu mei nang jingne ngohlak, hüke shemeipupa ne dopu düam kihpu hüyange yajah ye üyung nangjingne ngohlak.

¹⁹“Üjao toilam dopu khongkümpu hanghe Israel kahtalan-e Youngwanpa te do nang hatüo nangte, hüyange nangha hüyange nang phei ngohpu yhala lante jintepu meitam jingne Taowe pha yangki; hatüowa Youngwanpa sheshao me jinte yemenglakpa nang hüyange nang phei nenoklan jingne jiengjeppu ngoh nang.”

²⁰Hüyange Youngwanpawe Aaronte i, “Iman kahtok me nang jingne hanghe-o mothlei yengohlak, yejema-a iman yo me nang hanghe meitam-o yenanglak; Israel kahtalan yo me nang meitam hüyange nang mothlei nang wongpong khongkümpu ne Tao ngoh nang.”

²¹“Taowe Levilante hüke khümjing nyenok me iman-e shaoshanpu toishao ümee, Israellan pen phong khongkümpu mothleilak jingne phayangki.

²²Sha-a me peiye ülao Israel kahtalan-e iman ünu omme yelilak jingne khümjing nyenok ü-o me yepeilak yang.

²³Hüpoi Levilan-e khümjing nyenok toi linglak, hüyange iman-e yoi ompu ünu yoi kilak; hüyange numan jin kümme hatüo jinjintepu jingne ngaokeng ngohlak, hüyange Levilan-e Israel kahtalan yo me iman-e mothleipu yengohlak.

²⁴Hangjingne Israel kahtalan penphong dopu hanghepa iman-e Youngwanpate dopu phanang, hatüo Taowe Levilante mothleilak jingne phayangki; tüokhei Taowe imante ngaoyangki, Israel kahtalan yo me iman mothleipu yenang lak.”

²⁵Youngwanpawe Mosate i,

²⁶“Tüophei jamme nange Levilante itüoh, ‘Aope numan-e Israellan mepu penphong dopu hanghepa Taowe iman mepu numan-e mothleilak jingne phapu yahya lakei, hüwante tüopa mepu numan-e Youngwanpate dopu phalak yang, penphong mepu penphong.

²⁷Tüopa shemeipupa penphong dopuwa kahhampalan-e tahlick üla hüyange wuwüngti üla dopu phei ja kih-e iyeshelak.

²⁸Hüke numan-e Israel kahtalan mepu tüopu numan penphong dopu khongkümpu mepu Youngwanpate dopu üne-o phalak yang; hüyange Youngwanpa jing dopuwa Aaron ngengpate numan-e phalak yang.

²⁹Numante phapu hünghao üshei mepu, numan-e Youngwanpate phalak dopu lili yahpeilak yang; tüolan mepu shemeipupa üshei, tüolan mepu shejaopupa phalak yang.’

³⁰Aope numan-e shemeipupa meitam phayalakei, kahhampa jawe Iye dolaklan doyange topulan yah angpu kih-e, topulan-a numan-e anglak yang.

³¹Hüyange hatüowa nang hüyange nenok noksalan-e ümeken me hah huyapeih tüoken nyoi me hah ne ok; hangjingne hatüowa numan-e khümjing nyenok me shaoshanpu nanmee ngohnang.

³²Numan-e shemeipupa meitam Youngwanpatehi pha pheima-a, aope numan-e tüopa hahlakei, numante ümengne yemenglak. Hüpoi shemeipupa meitam dopu ne manphape hünghaone phapu ülam ja nehoi hahpu kaiye Israel lan-e shejaopupa hünghaone phapu nuwe shakke yelinglak jingne kenting yah; numan-e hüke lingyahma-a, numan li ne tampha lak.”