Read Konyak Naga LUNGTET 19 Bible Online

LUNGTET 19 - Konyak Naga bible

LUNGTET 19

¹Youngwanpawe Mosa hei Aaron nite i,

²“Hatüowa Youngwanpawe ngaowe tampu ngaokhüm wanglam ngohnang: Israel kahtalan-e tushangpu yenangpu hüyange hanghepa me üko yenang, hüyange aope-o han manpaipu mahu üha ütak ja nang tangte yah-e peikei she itüoh.

³Hüyange numan-e hatüowa Eleazar ngengpate phalak, hüyange Iye lakjing nokshao ye me hatüo woiye yüoyange I sheshao me toilak;

⁴Eleazar ngengpawe tüopa iy-a yoi yaklan-e yahlak, hüyange khümjing nyenok nokshao ye me iy-a nyit me shaitamlak.

⁵Hüyange tüopa mahu üsho, ühak, ü-iy hüyange üyei ütanglan khongkümpu ngengpa yonge ngohwante jaklak.

⁶Tüophei me ngengpawe cedar pee, hüyange phemkhah hüyange taakke takpu wu yahpuwe mahu üha jakpu vün hotante shüppe tamlak.

⁷Tüophei me ngengpawe yoi nyemo shaolak, hüyange Iye yoipüm yeng yüolak, hüyange tüophei me Iye lakjing te yelak; hüpoi ngengpa-a ünpong manngoi manngoi yejaope ngohlak.

⁸Aope mahu üha jaklakei, Iye yoi nyemo shaolak, hüyange I püm tangta yeng yüolak, hüyange I-o ünpongte ngoiye yejaope ngohlak.

⁹Kahta ütam-e jaowe ngohpu mahu üha jakpu vünla-a shaijem-e lakjing nokshaoye üjao ken me tüohlak, hüyange hatüowa Israel kahtalan ükhong ünu winlak wanglam linge jonpu yeng tümwante jonlak jingne anglak. Tüopa wanglam ünu yahteilak jingne lingpu ngohnang.

¹⁰Hüyange aowe mahu üha vünla-a moijem Iye yoi nyemo shaolak, hüyange ünpongte ngoiye yejaope ngohlak. Hüyange hatüowa Israel kahtalan jingne hüyange yinpalan iman phei ngohpalan jingne jintepu jingne wanglam ja ne menglak.

¹¹“Aohepawe kahta ütam mangte letlakei nyih nyit ngoiye yejaope ngohlak.

¹²Nyih lüm shepupa hüyange nyit shepu nyih me Iye yoi nying nyingke tüopa-a yeng kaiye ünu mepu jaowe tamlak yang. Hüpoi Iye nyih lüm hüyange nyit shepupa moni nyih me yoi nying nyingke yejaotam okma-a, I jaowe ye-oklak.

¹³Aowe lipu mang, hüke kahta lipu mangte letlakei, hüyange yoi nying nyingke yejaope ngohlakei, Youngwanpa khümjing nyenok nuwetam nang; hüyange tüopa kahta Israel mepu winlak; hangjingne jaowe tamlak yeng Ite yeshaitam, I yejaope ngohlak; I yejaopuwa üne-o I me ngoh nang.”

¹⁴“Nyenok me aope kahta ja lilakei tüopa ngaokhüm ngohlak; nyenok te ongpu kahta lili, hüyange nyenok me ngohpu kahta lili, nyih nyit yejaope ngohlak.

¹⁵Hüyange ngohpu tük-heisheng hanghepa me küplak yenangpe ngoh, yejaope ngohlak.

¹⁶Aowe üko me yange mette toiyange ngohpute, yejema-a limei me lipu mangte, yejema-a kahta ütam waan, yejema-a mangjongte letlakei, nyih nyit yejaope ngohlak.

¹⁷“Yejao yeshapu yah teilak jingne iman-e mahu ütak jakpu vünla ütam yahlak, hüyange yeng üla tüopa me tük ja me yei anglak.

¹⁸Hüyange jaowe ngohpu kahta jawe phemkhah yahpuwe hatüo yengte hünglak, hüyange nyenok tangme, tük heisheng khongkümpu tangme, hüyange tüome ngohpu kahtate, hüyange waante letpu kahtate yejema-a toiye ngohpu tangte, yejema-a lipu, yejema-a mangjongte letpute shai tamlak yang.

¹⁹Hüyange jaopu kahtawe yejaopupate, nyih lüm shepu me, hüyange nyit shepupa nyih me shaitamlak; hüyange nyit shepupa nyih me Iye I jaowe tamlak; hüyange I yoi nyemo shaolak, hüyange I nying nyingke yeng yüolak hüyange ün yekao me I jaowe ngailak.

²⁰“Hüpoi kahta ao yejaope ngohlakei, hüyange yoi nying nyingke yejaotam ok, tüopa kahta ükhong yo mepu win lak, hangjingne Iye Youngwanpa nyenok nu ne tamteki; jaotamlak yeng Ite yeshaitam; I yejaope ngohnang.

²¹Hüyange iman jingne hatüo jintepu wanglam ne ngohlak. Aowe jaotamlak yeng shaine tamlakei, yoi nyemo shaolak yang; hüyange aowe jaotamlak yengte letlakei ün pongte ngoiye yejaope ngohlak.

²²Hüyange yejaopu kahtawe hangheyin te letlakei yejaope ngohlak; hüyange kahta aowe tüopate letlakei ün pongte ngoiye yejaope ngohlak.”