Read Konyak Naga LUNGTET 20 Bible Online

LUNGTET 20 - Konyak Naga bible

LUNGTET 20

¹Hüyange üwangpa leat me Israellan ükhong khongkümpu Zin phaonyu jong ngoi, hüyange kahtalan-e iman nying nyingke Kadesh me lakjing lingyange ngoh; hüyange tüome Miriam li, hüyange tüome mang mu.

²Sha-a ükhong jingne tüome yeng yenangpe ngoh; hüyange iman-e jamshe iman nying nyingke Mosa hei Aaron ni phei tüi-e jem.

³Hüyange kahtalan-e Mosa phei tokteiye ngaowe i, “Youngwanpa sheshao me toman jeiheinao lipu hipak me toman-o Kahwange li ne tam-e ngohshih phang meihah shepu!

⁴Hangne Youngwanpa jing ükhong toman, toman-e tampu yinmoklan phei tüopa phaonyu jong me litamlak jingne nange toman woipeipu?

⁵Kahmük hatüo me tah, phuklick yejema-a wuwünglick, yejema-a chamuk yejema-a hango yinglak yeng yenangpu angsa nyoijing tüome woiye peilak, hangne Egypt mepu nange toman woipei ei?”

⁶Hüwante Mosa hei Aaron ni jem-e ngohpu ükhong sheshao mepu taiye khümjing nyenok tafün shongte onge imni sheta khuhta; hüyange Youngwanpa phihlangpu wangngai iman tangte ngai.

⁷Youngwanpawe Mosate i,

⁸“Jiengjep-pu ghonu sheshao me ngohpu wongjoi yayah hüyange nang hüyange nangjei Aaron niye ükhong bangha khongkümpu jemne tamtüoh. Hüyange iman mükke ngeye longte yeng ngaitamlak ne ngaotüoh, hüyange nange iman jingne long mepu yeng ngaine tamlak; hüke nange ükhong hüyange iman yinmoklante yinglak phalak.”

⁹Tüokhei Ite ngaowe tampu kih-e Mosawe Youngwanpa sheshao mepu wongjoi yah.

¹⁰Hüyange Mosa hei Aaron niye longnyu sheshao me ükhong jemne tam, hüyange Iye imante i, “Numan hokweye yongpalan, sha-a jaiyah; toman-e tüopa longnyu mepu numan jingne yeng ngaine tam phalak a?”

¹¹Tüophei me Mosawe I yak nowe I wongjoi-e longnyute ni me hep; hüyange yeng üngang ngai, hüyange ükhonge hüyange iman tampu yinmoklan-e ying.

¹²Hüyangpoi Youngwanpawe Mosa hei Aaron nite menge tee. Iye i, “Israel kahtalan sheshao me numan-e Ü-üjaopa üngan wong jaowe shawe anglak üte ütinglakpu wongnange yehüopu khei, Taowe imante phapu kahmükte numan-e tüopa ükhong woiye yepeilak.”

¹³Tüolan-a Meribah me ngaiyangki, ümeken me Israellan-e Youngwanpa phei tokteipu ngai, hüyange Iye I nying nyingke jaowe ngohpu imante hüo.

¹⁴Mosawe Kadesh mepu Edom ahngpa tangte ngaolan kipa shon ne i, “Hüke nang jeiheinao Israel nokphong lan-e tüopa ngaolan shon: Tomante pongpu shaoshi khongkümpu nange shing nang;

¹⁵hangke toman jing pajeiyonglan Egypt te lai, hüyange toman Egypt me hipak laolünge ngoh; hüyange Egypt lan-e toman hüyange toman payimlante yemeipe jon;

¹⁶hüyange aope toman-e Youngwanpate üngwün, Iye toman-e üngwünpu jai, hüyange wangdang shongmokpa ja shonne Egypt mepu toman woitei; hüyange leihu, nang yikeng ünah pongme ngohpu Kadesh chingnyu me toman ngohnang.

¹⁷Sha-a taowe yoppe tongnang, nang kahmük kaiye toman taine tampha; toman-e kah kaiye, yejema-a wuwüngkah kaiye yetailak, yejema-a toman-e numan jing yengnunglan mepu yeng yeyinglak. Toman-e nang yikeng linne mantai mantai yaknya hei yakjah yete yelüplak. Toman-a ahngpa tongkeng lamnyu paowe hei tailak.”

¹⁸Hüpoi Edom-e jan-e i, “Toman kahmük linne tailak jingne yetamlak! Numan ngange taima-a, toman-e numan phei tüi-e yanglow phei yonglak.”

¹⁹Hüyange Israel kahtalan-e Ite i, “Toman-a tongkeng lamnyu me hei ngohlakei, hüyange toman-e hüyange toman-e tampu yinmoklan-e numan jing yeng yingma-a, hüwante muh toman-e tüopa jingne ümee phalak; tomante lingne tamhupuwa toman ya me linne taine tampha she hei inang.”

²⁰Hüpoi Edomlan-e hüke muh i, “Toman-e lan-e tamyangki!” Hüyange yeonge wongnangpu nyahponglan phei Israel kahtalante shümlak jingne iman yayong.

²¹Hüke Edomlan-e iman yikeng kaiye Israellante tailak lamnyu yephalak ne tien; tüokhei Israellan iman mepu lüp-ye.

²²Hüyange iman Kadesh mepu yayonge tai; hüyange Israel kahtalan hüke ükhong khongkümpu, Hor kahtang te ngoi.

²³Hüyange Hor kahtang me Edom kahtok yikeng pong me Youngwanpawe Mosa hei Aaron nite i,

²⁴“Aaron yoi pheipulan phei omlak; hangjingne Taowe Israel kahtalante phapu kahmükte I yepeilak, hangjingne Meribah yeng jeng me nangniye ü-ngao phei tüi-e yong.

²⁵Aaron hei Iha Eleazar woiyange Hor kahtangte ongtüoh;

²⁶hüyange tüoken me Aaron jing ngengpa oleng khoktüoh, hüyange Iha Eleazarte tüolan-a o tamtüoh; hüyange Aaron yoi phei pulan phei omlak, hüyange tüome lilak.”

²⁷Youngwanpawe ngaowe tampu kih-e Mosawe ling. Hüyange ükhong khongkümpuwe ngeye iman kahtang te ong.

²⁸Hüyange Mosawe Aaron jing ngengpa oleng khokke Iha Eleazar te owe tam. Hüyange tüome kahtang üshang me Aaron li; tüophei me Mosa hei Eleazar ni kahtang mepu leih ye.

²⁹Aope ükhong khongkümpuwe Aaron liteki she shinge ok, Aaron jingne iman-e nyih delüm Israel nokphong üsheiye mang shap.