Read Konyak Naga LUNGTET 21 Bible Online

LUNGTET 21 - Konyak Naga bible

LUNGTET 21

¹Aope heyekao me ngohpu Kananlan Arad ahngpawe Israel lan Atharim lamme peiküki she ngaopu jai; Iye Israel phei tüi-e yong, hüyange ütam phoyah.

²Hüwante Israel lan-e Youngwanpate jiengjeppu ja yahyange i, “Nange ütingme tüopa kahtalan toman yak me phünne phaküma-a, hüwante toman-e iman jing chingnyulan jaosheye mahtamlak.”

³Hüyange Youngwanpawe Israel ngaolan jai hüyange Kananlan phünne pha; hüyange iman-e jaoshe-e iman hüyange iman chingnyulan mahtam; tüokhei tüopa kahmükte Hormah she nyik.

⁴Hüyange Israellan Hor kahtang mepu Ütak Yengching yekaote Edom neikon-e tai; hüyange kahtalan-e lamnyu me yenün okpe ngai.

⁵Hüyange kahtalan-e Kahwang hüyange Mosa phei tüi-e ngao. Iman-e ngaowe i, “Hangne numan-e toman phaonyu jong me lilak ne Egypt mepu woipei? Hangjingne tüoken me hahyingo yejema-a yeng-o yenang! Hüyange tüopa jajang japu hahyinge toman eangteki!”

⁶Tüokhei Youngwanpawe soihüng pheipu pu kahtalan yo me shon, hüyange tüolan-e kahtate jot; hüyange Israellan üngang li.

⁷Kahtalan Mosa tangte pei, hüyange i, “Toman-e ünu omyangki, hangjingne toman-e Youngwanpa phei tüi-e hüyange nang phei tüi-e ngaoyangki; toman mepu pu yah teilak Youngwanpate yoppe tongpha.” Tüokhei Mosawe kahtalan jingne yoppe tam.

⁸Hüyange Youngwanpawe Mosate i, “Yanphei mengshipu pu ja lingtüoh, hüyange hatüo sheam me jhottüoh, hüyange tüophei me aohipate jot, Iye leima-a, üyin me ngohlak.”

⁹Tüokhei Mosawe shakphan yan pu ja ling, hüyange hatüo sheam me jhot; hüyange puwe kahta ütamte jotma-a, Iye shakphan yan pute leiwante I meiye mahpu ngohyang ki.

¹⁰Israel kahtalan yayonge tai, hüyange Oboth me lakjing ling.

¹¹Iman Oboth mepu yayonge taiye Iye-Abarim me, Moab sheshao me ngohpu phaonyu heong yekao me lak.

¹²Tüomepu iman yayonge tai, hüyange Zered kahjee me lak.

¹³Tüomepu iman yayonge tai, hüyange Amorlan yikeng mepu ngaiye phaonyu jong me, Arnon jayekao me lak; hangjingne Arnon-a, Moab hei Amorlan nipa me Moab yikeng ngoh yangki.

¹⁴Tüojingne Youngwanpa wehok laitep me hatüo iye ngohnang. “Waheb, Suphah me, hüyange Arnon kahjeelan,

¹⁵hüyange kahjee kahnyüo Ar ngohpu yekaote meye hüyange Moab yikeng tangme nyengyange.”

¹⁶Hüyange tüo mepu iman-e yengnunglan she nyikpu nyoite yayong; hatüowa Youngwanpawe hanghe Mosate iyapeih tüopa yengnung ne ngoh; “Kahtalan jamme jemne tamtüoh, hüyange Taowe iman te yeng phalak.”

¹⁷Hüwante Israel kahtalan-e tüopa hem lok: “Yengnung, nang mepu yeng yünne ngaikei; Hüyange toman-e tüopate hem phei minyong pha ning.

¹⁸Ahngyongha lan-e shao pu yengnung, Kahta hammanpa lan-e shaowe okpu, Ahngpa wongjoi-e hüyange imanjing wongjoiye shaoyangpu.” Hüyange phaonyu jong mepu iman Mattanah te tai;

¹⁹hüyange Mattanah mepu Nahaliel, hüyange Nahaliel mepu Bamoth;

²⁰hüyange Bamoth mepu Moab me ngohpu kahjee te pei, hanghepa Pisgah kahtang ü-o me pheih kahtokte leiye tainang.

²¹Tüophei me Israel kahtalan-e Amorlan ahngpa Sihon tangte ngaolan kipa shonne i:

²²“Nang kahmük kaiye toman taishih nüng. Toman hüyange toman jing yinmoklan lamnyu tüohyange yetailak hüyange kah yekaote, yejema-a wuwüngkah yekaote yelüplak; hüyange toman-e numanjing yengnung mepu yeng yeyinglak; nang yikeng mankai mankai toman-e ahngpa jing tongkeng lamnyu te hei tailak.”

²³Hüpoi Sihon-e I yikeng kaiye Israel kahtalan tailak yetam. Iye yoijing nyahponglan khongkümpu shaijem, hüyange Jahaz ngoine phaonyu jongte tai hüyange Israel lante shümme pei.

²⁴Hüpoi Israel lan-e shapju me wepalan üngang toi hüyange imanjing kahmük Arnon mepu Jabbok ngoiye, hüke Ammonlan ngoiye, hangjingne Ammonlan yikeng ngoiye yomyange ngohpu yah;

²⁵Hüyange Israel kahtalan-e tüolan chingnyu khongkümpu om, hüyange Ammonlan chingnyu khongkümpu me, Heshbon me hüyange tüolan ching khongkümpu me Israel ngoh.

²⁶Hangjingne Heshbon-a Ammorlan ahngpa Sihon ahngjong chingnyu ne ngoh, aowe lintepu Moab ahngpa phei tüi-e hok hüyange I mepu I kahmük khongkümpu Arnon ngoiye nyieye yah.

²⁷Tüojingne hem jaipawe lokke i, “Heshbonte peikei, Ahngpa Sihon jing chingnyute! Tüopa linge yepu hüyange yange yepu toman-e ngehu nang.

²⁸Hipak ja me tüopa Heshbon chingnyu mepu, Sihon jing nyahponglan vünkih-e ngaiye tai. Tüopawe Moab me Ar mahtam, Hüyange Arnon kahtang ütokye nokpulan mahtam.

²⁹O Moab kahtalan, numan jingne onyukei! Numan Khemosh te yoppe khümpalan, mahlak jingne yah peinang! Numan jing kahwange kahtalan chingtaipa lan ne linge tam, hüyange shekolan-a Amor Ahngpa phangme phowe küopalan ne linge tam.

³⁰Hüpoi sha-a imanjing huhayim lan-a mahtam teki. Heshbon mepu Dibon ngoipu khongkümpu me, Medeba ü-o mepu Nophah ngoiye.”

³¹Tüokhei Amorlan yikeng pong me Israel kahtalan nyoi,

³²Hüyange Mosawe Jazer kuhshüklak jingne shon; hüyange iman-e tüopa chinglan hah, hüyange tüome ngohpu Amorlan jange tei.

³³Tüophei me Israellan leihye hüyange Bashan yekao lamte ong; hüyange Bashan ahngpa Og iman phei tüi-e, I hüyange yoi jing nyahponglan khongkümpu Edrei me hok ne ngai.

³⁴Hüpoi Youngwanpawe Mosate i, “Ite nyam-e tah teih, hangjingne Taowe I hüyange I kahtalan khongkümpu hüyange iman kahtok, nangte phünne phateki; hüyange nange Heshbon me ngohpu Amor ahngpa Sihon te lingpu kih-e Ite lingtam tüoh.”

³⁵Tüokhei Israellan-e Og, I halan, hüyange kahta lili üyin me sheja nehoi yetüohpe toi, hüyange tüophei me iman-e I jing kahmük omme yah.