Read Konyak Naga LUNGTET 22 Bible Online

LUNGTET 22 - Konyak Naga bible

LUNGTET 22

¹Tüophei me Israel kahtalan yayonge tai, hüyange Jordan yengyin jayekao Moab üjee me Jerikho phei janhüowe lak.

²Sha-a Moab ahngpa Zippor üha Balak-e Amorlante Israel lan-e lingtampu khongkümpu nge.

³Moab kahtalante yeonge nyampu pei, hangjingne iman kahta üngang ngohyapoi, tüoyangpoi Israel kahtalante Moablan yeonge nyam.

⁴Hüyange Moab-e Midian lwngmei lante i, “Tüolan waakempu nokphonge mahu üponge hahnyoi me hüng hah taipu kih-e teman neikon-e ngohpu shemin lamphe mahtam phalak.” Hüwante Zippor üha Balak-a Moab Ahngne ngoh.

⁵Beor üha Balam, ao Amaw kahmük me Euphrates Yengyin nah mepu Pethor me ngoh, Ite nyiklak jingne shongshonpalan shon. “Taowe nangte tüopa shingne tamhu nang jat ja no shepu Egypt mepu peiye ngohnang; tüopa jat mepu kahtalan üken phe me yan-e tainang, hüyange iman üshongme nyoi ngohnang.

⁶Iman-a toman phei wong she ngohnang; tüojing ne chingmei lamlinge sha-a peikei hüyange tüopa kahtalante üjingne phoiwümpu phayangkei. Tüophei me aoweshingpu toman-e imante naopu oklak, hüyange toman kahmük mepu iman jange teipu oklak. Hangjingne taowe shingnang, aoyin te nange moiman tamlakei imante moiman nang, hüyange aope nange aohipate phoiwümlakei Ite phoiwümpu shah nang.”

⁷Tüokhei Moab hei Midian lwngmeilan iman yak me hileipa jingne hünghao yakjai wangman-e yahyange yayong, hüyange Balam tangte peiye iman-e Balak ngaolan I te i,

⁸Balam-e imante i, “Teya tüome ngohkei; Youngwanpawe üte hanghe ngaokülakei ngainap taowe numan tangte ngao yah-e peitamlak.” Tüokhei Moab lwngmeilan Balam phei pümme lak.

⁹Balam tangte Kahwang pei hüyange tong, “Nang phei ngohpu tüolan kahta-a aoyin shi?”

¹⁰Balam-e Kahwangte jan-e i, “Moab ahngpa Zippor üha Balak-e üte ngaolan shonne i,

¹¹‘Leihuyah, Egypt mepu peipu kahtalan tüome kahtok khük maawe ngohnang; sha-a peikei, hüyange üjingne imante phoiwüm tamtüoh; aoweshingpu taowe iman phei hokpu oklak hüyange iman jange teipu oklak.’ ”

¹²Kahwange Balamte i, “Nang iman phei tahtai, hüyange nange Israel kahtalante phoiwümpu tah pha, hangjingne iman me ü-moiman ngohnang.”

¹³Tüokhei ünenap Balam lüoyange, Balak-e shonpu lwngmei lante i, “Numan yoi ngohjing te leih yetüoh; hangjingne numan phei yetailak jingne Youngwanpawe tao tienteki.”

¹⁴Tüokhei Moab lwngmeilan yayonge Balak tangte leih ye hüyange Ite i, “Balam-e toman phei mintai she lanpuyang.”

¹⁵Hüwante Balak-e ahnghalan iman phei shepang she hüyange üjenglan nishe shon.

¹⁶Hüyange iman Balam tangte tai hüyange Balak mepu tüopa ngaolan iye tam: Zippor üha Balak-e hüke iyangki; “Chingmei lamlinge nang ü-tangte peilak mepu hanghe-o tienne tahtam!

¹⁷Hangjingne taowe nang iyeshepu üyong phei linge tamlak, hüyange nange hanghe ilakei hatüo nangjingne taowe linglak; tüokhei taowe nangte yoppe tongnang, chingmei lamlinge peikei hüyange tüolan kahtate üjingne phoiwümpu phatekei.”

¹⁸Hüpoi Balam-e Balak shaoshanpalante janne i, “Balak-e I yoi ahngnok me hon hei khüm-e maawe üte phayapoi, Youngwanpa Ü-Kahwang ngao kaiye taowe yewangpe yejema-a ünyei üjingha nehoi lingne ye-ok.

¹⁹Tüoyangpoi sha-a Youngwanpawe üne-o hanghe üte ngaokülakei hatüo taowe shinglak jingne teya numan-a ülao lanne lingpu kih-e tüome üne-o lakkei she taowe numante yoppe tongnang.”

²⁰Tüoya-o Balam tangte Kahwang peiye Ite i, “Nangte nyiklak jingne tüolan kahta peipu ne mengma-a, tümyah hüyange iman phei taitüoh, hüpoi hanghe ngao Taowe nangte ngaowe tam, tüo hei nange ngaolak yang.”

²¹Tüokhei napning Balam lüo, hüyange I gado me shotyange Moab ahnghalan phei tai.

²²Balam taipu jingne Kahwang mongshih ngai, hüyange Balam yoi gado me shotyange I shaoshanpa niye shomyange taiwante Youngwanpa shongmokpa yoi nying nyingke lamnyu tienyange yong.

²³Aope gadowe Youngwanpa shongmokpa yoi yak me yanglow ja jonyange lamnyu me yongyange ngeyapeih, gadowe lamnyu tüohyange lüppeye, hüyange kah yekaote tai. Hüpoi Balam-e gadote shüt hüyange lamnyu yete aiye ye.

²⁴Hüwante Youngwanpa shongmokpa wuwüngkah nipa ümeken me lamjong shehit she ngoh hüyange moini yekao me long jantne shongyange ngoh, tüoken me yong.

²⁵Aope gadowe Youngwanpa shongmokpa nge, long jant penyu ngoine shütte ye, hüyange Balam ya jant me ngütte tam. Hüwante üne-o Balam-e gadote shüt.

²⁶Hüwante Youngwanpa shongmokpa üne-o jam shaoyete tai; hüyange jaye jaye me-o taiye oklakne yenangpu üjong hitpu nyoi ja me yong.

²⁷Sha-apa-a aope gadowe Youngwanpa shongmokpa nge, Balam yashong me I lamme ta; hüyange Balam mongshih ünyei ngai, hüyange Iye yoi wongjoi phei gadote shüt.

²⁸Hüwante Youngwanpawe gadote ngao iye oklakne üngan phawe ju epne tam, hüyange Balamte hüke i, “Nange üte hatüowe lüm shepupa ngoiye shütlak ne taowe nangte hanghe lingpu?”

²⁹Balam-e gadote jan-e i, “Hangjingne nange tao yaoweleye tamnang; ü-yak me yanglow ngohshihma-a, taowe nang toiyange ngoh hah shepu!”

³⁰Hüwante gadowe Balamte jan-e i, “Nang üyin jin khongküm-e tenyih ngoiye nang shotpu nangjing gadowa tao üje pu a? Taowe üshongwante-o hüke nangte jejon yangpu a?” Iye jan-e i, “Ya.”

³¹Hüwante Youngwanpawe Balam mük eppetam, hüyange Youngwanpa shongmokpa yanglow teak-e jonyange lamnyu me yongyange nge; hüwante nakshih Iye yoi sheta khuhtawe I sheshao me wenne khüm.

³²Hüyange Youngwanpa shongmokpawe Ite i, “Hangne nange nang gadote lümme ngoiye shütpu? Leihuyah, nangte tienlak jingne peipuwa Tao ngohyangki; hangjingne nang lamnyu ü-sheshao me mongmenglak ne ngoh nang;

³³hüyange gadowe Tao nge, hüyange lümme ngoiye ü-sheshao mepu lüp, Iye Ü-sheshao mepu yelüp shihma-a, Taowe nanga toiyange ngohhah shepu, hüpoi gadopa-a üyin me ngoh hahshepu!”

³⁴Hüwante Balam-e Youngwanpa shongmokpa te jan-e i, “Taowe ünu omteki, hangjingne ü-phei tüi-e lamnyu me nang ngoh yangki she taowe yeshingpe ngohyangki. Hüke sha-a hatüo nang sheshao me ünu toine mengma-a, hüma-a tao nokte leih yeshihning.”

³⁵Youngwanpa shongmokpawe Balamte i, “Tüolan kahtalan phei taitüoh, hüpoi Taowe hanghe ngao ngaotam lakei tüo hei nange ngao tüoh.” Tüokhei Balam Balak ahnghalan phei tai.

³⁶Aope Balak-e Balam peiküki she jai, Ar she minpu Moab ching Moab chingnyu yikengpong Arnon Yengyin ngoiye I pongte ta.

³⁷Hüyange Balak-e Balamte i, “Taowe nang nyikne üwangne shonwan temuh hangne nang yepeipu? Taowe nangte khintak wangman-e yephakülak she nange teih a?”

³⁸Balam-e Balakte jan-e i, “Leihuyah, tao nang tangte peiye ngohnang! Hüpoi sha-a taowe nangte ülam ja nehoi ngao oklakne wong ütam ngohlak a? Kahwange ü-ju me hanghe ngaowe tamkülakei tüo hei taowe ngaopu oklak.”

³⁹Tüokhei Balak phei Huzoth ching ngoine Balam tai,

⁴⁰Balak-e mahu üpong hei nyee toi, hüyange tüopa mepu mei ütam Balam hei Iphei ngohpu woipalante pha.

⁴¹Hüyange üne nap Balak-e Bamoth Baal ümeken me ngohyange Balam-e Israel kahtalan shü-o-she ngeye oklak tüoken te I woipei.