Read Konyak Naga LUNGTET 23 Bible Online

LUNGTET 23 - Konyak Naga bible

LUNGTET 23

¹Balam-e Balakte i, “Tüome üte wümjong nyit linge tampha, hüyange tüome üte mahu üpong nyit hüyange nyeepong nyit tüm-e tamtüoh.”

²Balam-e ngaotampu kih-e Balak-e ling; hüyange Balak hei Balam niye wümjong lep iye mahu üpong japong hüyange nyeepong japong do.

³Hüwante Balam-e Balakte i, “Nange jakke dopu ü-o me yonge ngohkei, hüyange tao taishih ning; aoweshing ü-phei hüolak jingne Youngwanpa peilak-o yeshing; hangheyin Iye üte ütahte ngaitamlakei, taowe nangte ilak.” Tüokhei I shaha kahtang shedaopute ong.

⁴Hüyange Balam phei Kahwang hüo; hüyange Balam-e Ite i, “Taowe wümjong nyit tümteki, hüyange wümjong phe me mahu üpong japong hüyange nyeepong japong doteki.”

⁵Hüwante Youngwanpawe Balam ju me ngao phawe tam, hüyange i, “Balak tangte leih yetüo, hüyange nange hüke ngaotüoh,”

⁶Tüokhei Balak tangte leihye, hüyange Moab ahngpalan khongkümpu phei jam she I jakke dopu ü-o me yongyange muh ngohpu nge.

⁷Hüyange Balam-e tüopa itpu ngao i: “Moab ahngpa Balak-e Syria mepu, heongye phaotang mepu tao woipei. Iye i, ‘Peikei ü-jingne ngaowe tampha.’ ‘Israel kahtalante phoiwümpu phatüoh.’

⁸Kahwange yephoipute taowe hangke phoiwümlak? Yejema-a Kahwange yengaotampu te taowe hangke mahtam ne ngaotamlak?

⁹Longnyu shedaopu ken me yongyange Taowe iman ngenangki; Kahtang mepu taowe imante leiye tainang. Üyin me ngoh okpu jat ja-a iman hei ngohnang; Ülao jatlan phei ünyei moiman yangpu jat-a iman jat she iman-e shingnang.

¹⁰Israel huhayim lan-a kahmak-ansoo shinne pange Iman-a aowe iye kümpu oklak? Ü-üyin jin-a Kahwangpa kahtalan yo me ja ne üküm ngoi ning; Taowe üjao kahta kih-e chingmei me li shih ning.”

¹¹Hüwante Balak-e Balamte i, “Nange üte hanghe ling tampu? Ü-wepalante phoiwüm tamlak jingne taowe nang tüome yahpei, hüpoi nange hanghe ling, khongkümpuwa imante moiman pha tamnang.”

¹²Iye jan-e i, “Youngwanpawe üjute hanghe ngaone tamhuyapeih tüolan hei taowe ngaolak üje a?”

¹³Balak-e Balamte i, “Ülao nyoi jing ja ümeken me leitüoh me nange Israellan ütam she-o she ngelakei tüoken nyoite ü-phei keihu; tüoken me yongyange nange üjingne imante phoiwüm-e tamkei.”

¹⁴Tüokhei Iye I Zophim kahjee te woiteiye Pisgah kahtang ütangte ong. Tüoken me-o Iye wümjong nyit ling, hüyange mahu üpong japong hüyange nyeepong japong do.

¹⁵Balam-e Balakte i, “Otüome taowe Youngwanpa phei hüoyang küning, tüokhei nanga nange jakke dopu tüoken me yonge ngohkei.”

¹⁶Youngwanpa Balam phei hüo, hüyange I ju me ngao phayange i, “Balak tangte yetüoh, hüyange hüke nange ngaotüoh.”

¹⁷Tüokhei I tangte I leihye, hüyange leihu, Iye jakke dopu phinme Moab woipalan phei I yongyange ngoh yangki. Hüyange Balak-e Ite tong, “Youngwanpawe hanghe ngao ei?”

¹⁸Hüwante Balam-e tüopa itpu hi-ngao ngaowe tam: “Peikei, Zippor üha Balak, Hüyange taowe hanghe inang jaitüoh.

¹⁹Kahwang-a kahtalan kih-e ngaoleih ipa ne yeje; yejema-a I-a juteih mongjang jeilei hümpu kahtanyuha kihpu ne yeje. Iye janpu pha, hüyange Iye tüopa yelinglak a? Iye ngaotam, hüyange Iye tüopa ye-ngaitamlak a?

²⁰Moiman phatamlak jingne üte ngao tamyange ngoh nang; Iye moiman tamyangki, taowe tüopa yah-e ye ne ye-ok.

²¹Israel ngoikülak juwan taowe nge oknang jumeng wanteng Jacob me yenang, shange pongpu Israel me yenang, Youngwanpa imanjing Kahwang iman phei ngohnang, Iman-e I-a ahngpa she üngwün nang.

²²Kahwange iman-a Egypt kahtok mepu woipei, Iye iman jingne pongwan kih-e hok.

²³Jacob phei tüi-e jonne tampu ya-ngan yejema-a Israel phei tüi-e phongyengpu ülam hango yenang. Sha-a Jacob hüyange Israel jeng me kahtalan-e ilak, ‘Leihuyah Kahwange hanghe lingtampu!’

²⁴Israel jat-a wongnangpu yengkong mailang kih-e; Tüopawe phünne khoih-e hüyange mah mantam mantam toloi yemei. Tüopawe toipu tüolan jing iy yinge manjok manjok tüopa toloi yemei ok.”

²⁵Hüwante Balak-e Balamte i, “Nange Israel kahtalan te phoiwümpu yepha hupu yang, hüpoi imante moimanpa-a tah pha tam.”

²⁶Hüpoi Balam-e Balakte jan-e i, “Youngwanpawe hanghe yin ilakei taowe hatüo linglak she taowe nangte ye-i a?”

²⁷Tüokhei Balak-e Balamte i, “Kei ü-pheite, taowe nang ülao nyoijing jate woi küning. Aoweshing, tüopa me ngohyange nange imante phoiwüm ne Kahwange tamne ok.”

²⁸Tüokhei Balak-e Balam Peor kahtang ümüoh hanghe mepu wanwüngjeng te leiye tainang, tüote woi in.

²⁹Hüyange Balam-e Balakte i, “Üjingne wümjong nyit tüome lingtüoh, hüyange üjingne tüome mahu üpong nyit hüyange nyeepong nyit yah peikei.”

³⁰Balam-e ngaowe tampu kih-e Balak-e ling, Iye wümjong lep iye mahu üpong hüyange nyeepong japong do.