Read Konyak Naga LUNGTET 24 Bible Online

LUNGTET 24 - Konyak Naga bible

LUNGTET 24

¹Sha-a Youngwanpawe Israel kahtalan te moiman phawe tamhupu Balam-e shinge pei, tüokhei üwang yeme Iye lingyangpu kih-e shaotan toi ngailak yamme I yetai. Wanwüngjeng yekaote I sheta lüp,

²Balam-e Israel kahtalan nokphong nokphong lakjing lingyange ngohpu nge. Hüyange Kahwang Yahawe I lanshe phünne jon,

³hüyange Iye tüopa itpu ngao i: “Beor üha Balam ngaolan, Aowe meimei-e ngenang tüopa kahta mepu ngaolan,

⁴Aowe Kahwange hanghe i meimei-e jainang. Himang taiwante mük weamyange ngenang, Ütahpa Kahwang mepu himang ngenang.

⁵O Jacob, nang jing nyenok lan-a, O Israel, nang ngoh jinga shemei yaoma!

⁶Laolünge logpeelan khüng lengpu kih-e, Yengyin nah mepu peshalan kih-e, Youngwanpawe deipu khahkhoipe kih-e, yengnah mepu cedarlan kih-e,

⁷Iman yengtük me yeng wangpu shinne tüolak, Hüyange yeng wange peipu kah me iman-e üli deilak. Iman jing ahngpa-a Agag phei sheyongpa ne menglak, hüyange Iye wanglam lampu khaowe yonge jalunlak

⁸Kahwange iman Egypt mepu woipei, Iye iman jingne pongwan kih-e hoknang, iman-e imanjing wepalan hahmenge tam, imanjing üwaan khoih nyai-e tam, imanjing lahhan kahwin.

⁹Tüopa jat-a wongnangpu yengkong mailang kih-e; Aope tüopa shiye ngohlakei, aowe-o tüopate loitamne ye-ok. Aoyinne Israelte moimanlakei, imante moimanlak. Hüyange aoyinne Israelte phoiwümlakei imante phoiwüm tamlak.”

¹⁰Hüwante Balak-e Balamte yeong mongshih ngai, hüyange Iye yak tümyange i: “Ü-wepalante phoiwümtamlak jingne taowe nang te nyik, hüpoi phoiwüm-e tamhah shepu nanleiye sha-a nange lüm shepupa imante moiman phanang.

¹¹Sha-a nenokte leih yetüoh! Taowe nangte khintak üyong phalak she jan, hüpoi leihuyah, Youngwanpawe nange khintak tüolak mepu tük-e angnang.”

¹²Hüyange Balam-e Balakte jan-e i, “Nange üte shonpu ngaolan kipalante taowe iyangki,

¹³hüke nange nenok ahngnok me hon hei khüm khongkümpu üte phayapoi taowe ü-nying nyingke ümongme ngaipu ngao iye Youngwanpa ngaokeng yejaipe taowe yelinglak. Youngwanpawe üte hanghe ngaone tamhuyapeih tüo hei taowe ngaolak.”

¹⁴Tüokhei, “Sha-a taowa ü-kahtalan tangte leih yeshih nüng, hüpoi tao taishao me, ngoikülak hipak me Israel kahtalan-e nang kahtalante hanghe linglak taowe deingao iphaning.”

¹⁵Tüophei me Iye tüopa itpu ngao i: “Beor üha Balam ngaolan, aowe khakwange ngenang, tüopa kahta mepu ngaolan,

¹⁶Kahwange hanghe i tüopa aowe jainang, Hüyange aowe Ütahpa mepu peipu konheingao tüo Iye inang. Aohe himang tainang hüpoi mükwem yange ngenang. Aohiye Ütahpa Kahwang mepu himang ngenang:

¹⁷Taowe ngoikülak hipakte lei, Hüyange taowe Israel jat ngenang. Ahngpa ja müktishiwapu shanha kih-e, tüopa jat mepu ngailak. I Israel mepu shanha ahngpa kih-e ngailak. Iye Moab woipalan-a khoih mah tamlak, hüyange Seth kahtalan khongkümpu te shüte tailak.

¹⁸Iye Edom mepu I jing wepalan chinghahlak hüyange imanjing kahmük-a I jing moth ne menglak, hüwante Israel-e okpu yelakpe tailak.

¹⁹Jacob mepu wanglam lampa ngailak, Hüyange ükümpa ne yin-e ngohpu-o pheak-e winlak!”

²⁰Tüophei me I himang me Balam-e Amaleklan nge hüyange tüopa itpu ngao i: “Üshei yo me Amalek wong sheyongpupa jat ne ngoh yangki, hüpoi ükümne tüopa-a jintepu jingne mahlak.”

²¹Tüophei me I yoi himang me Kenitlan nge, hüyange tüopa itpu ngao i: “Ümeken me nang nyoinang, tüopa nyoijinga ütuh yenangpe ngohnang, longwak ütangpa me lingpu ülüp kih-e ütuh yenangpe,

²²Tüoyangpoi nang Kenitlan, aope Assyriawe nang phowe teilakei nang mahlak.”

²³Tüophei me Balam-e tüopa itpu ngao i: “Onyukei, aope Kahwange tüo linglakeih aohe yinpu oklak?

²⁴Yenglin lan-a Kittim yengnah mepu peilak; Iman-e Asshur hei Eber ching hahlak, hüpoi, nyongküleih-e, iman-o jintepu jingne mahlak.”

²⁵Tüophei me Balam tümta hüyange nokte leihye, hüyange Balak yoi lamte taiye mah.