Read Konyak Naga LUNGTET 25 Bible Online

LUNGTET 25 - Konyak Naga bible

LUNGTET 25

¹Aope Israellan Shittim me lakjing linge nyoiyapeih, netanlan-e tüoken me ngohpu Moab shekolan phei phwngngam ne wang.

²Tüolan ne iman Kahwangte toidopu mo te nyik, hüyange Israel lan-e hahying hüyange iman kahwangte yoppe khüm.

³Tüokih-e Israel-e Peor me Baal te yopkhüm; tüokhei imante Youngwanpa mongshih loishe ngai.

⁴Youngwanpawe Mosate i, “Israel woipalan khongkümpu yayah, hüyange ü-ngao jaiye iman-a ükhong sheshao üko me ngaokenge toitam tüoh, tüophei me nakshih Taowa shaaji kahtalan phei mongshih ngaipu yengohlak.”

⁵Hüyange Mosawe Israel kahtalante i, “Numan püm lep ipuwe numan nokphong mepu aoyin Peorlan Baal te yoppe khümpa ne meng toilak yang.”

⁶Aope iman Youngwanpa khümjing nyenok tafün shongme jemyange shappe yoonge ngoh yapeih, hüwante Mosa hüyange Israel ükhong khongkümpuwe ngeye, Israel naoshe jawe Midialan sheko ja woiyange yoi nyenokte ong.

⁷Hüyange aope Aaron ngengpa ühu Eleazar üha Phinehaswe tüopa nge, I lüowe yong hüyange lye ükhong jempu mepu lüowe tai. Iye nguo ja yah,

⁸hüyange Israelpa hei shekonyu ni phei woiye nyenok mongte ong, hüyange ngouwe moini tangta phüplüowe lütte tam. Hükih-e linge Israellan mahne tam-e peipu leamdak-a lakne tam.

⁹Tüoyangpoi tüopa leam me kahta haja da me peli ngoiye toiyangki.

¹⁰Youngwanpawe Mosate i,

¹¹Aaron ngengpa ühu Eleazar üha Phinehaswe Taowe yah hupukih-e iman yo me müktakpu hüopu jingne Israel mepu ümong shihpu lakne tamteki, hüyange hüke Taowe ü-müktakpu kaiye Israellan üküm ngoine yetam.

¹²Tüokhei Ite hüke itüoh, “Leihu Taowe I phei ngoikülak hipak üshei jingne ü-chingmei jiengjeppu phanang.

¹³Hatüo I jingne hüyange I me jalunpulan jingne jinte ngengpa toishao jingne jiengjeppu ngohlak; hangjingne Iye yoi Kahwang jingne müktakpu ngoh yangki hüyange Israel kahtalan jingne ünu tantamlak ling.”

¹⁴Sha-a Israelpa ao Midian sheko phei toi, I min-a Simeon nokphong woipa Salu üha, Zimri ngoh yangki.

¹⁵Hüyange toiyangpu Midian sheko min-a Zur üha Kozbi ngoh yangki. Zura Midian me Inok nokphong woipa ja ne ngoh yangki.

¹⁶Youngwanpawe Mosate ngaokeng phawe i,

¹⁷“Midianlante shümtüoh, hüyange iman mahtam tüoh;

¹⁸hangjing-ne Peor me aope iman-e numan yah hüyange ünu ling hüyange Midianlan woipa ja üha Kozbi leam hipak me toi, iman-e numan kaiye konkonpu jingne mahtamlak yang.”