Read Konyak Naga LUNGTET 27 Bible Online

LUNGTET 27 - Konyak Naga bible

LUNGTET 27

¹Hüwante Zelophehad yhalalan peingoi. Zelophehad-a Hepher üha Gilead üha Machir üha Manasseh üha Joseph üha, Manassehlan nokphong shangtoi ja mepu. Inok naoyhalan min-a Mahlah, Noah, Hoglah, Milcah hüyange Tizah ngohnang.

²Hüyange iman peiye Mosa sheshao me hüyange Eleazar ngengpa sheshao me hüyange woipalan sheshao me hüyange ükhong üshei sheshao me khümjing nyenok tafün shongme yong hüyange iman-e hüke i,

³“Toman üpa-a phaonyu jongme netan hayim ja nehoi yetüohpe li. Hüyange I-a Youngwanpa phei tüi-e iman nying nyingke jemme yongpu Korah ükhong phei I ye-om; hüpoi I yoi ünu jingne li yangki.

⁴I ha yenangpu khei she hangne Israel nokphong mepu toman üpa min winlak shi? Toman üpa jeiheinao lan yo me tomante mothlei yahkei.”

⁵Mosawe iman jeng Youngwanpa tangte yahpei.

⁶Hüyange Youngwanpawe Mosate i,

⁷Zelophehad yhalalan-e khakshuwe ngaonang; ütingme nange iman üpa jeiheinaolan phei mothlei phalak yang; hüyange nange iman üpa jeiheinaolan phei mothlei ne tamtüoh.

⁸Hüyange nange Israel kahtalante itüoh, “Hangke tingme kahta jawe netan naha yetüohpe lilakei, I jing moth-a Iye tüohpu yhala lan-e mothleilak.

⁹Hüyange I yhalalan-o yenangma-a, I mothlei I pheipu jeihei naolante numan-e phalak yang.

¹⁰Hüyange I jeiheinao yenangpu ne mengma-a, hüma-a Ipa phei jamme puhpu Ipalan te tüopa mothlei ne tamlak.

¹¹Hüyange Ipa pheipu jeiheinao-o yenangma-a, hüwante numan-e inok phong Iphei shü-o-pu pate I mothlei ne tamlak yang; Iye hatüo yahlak, hüyange Youngwanpawe Mosa te ngaowe tampu kih-e hatüowa Israel kahtalan jingne jinte angpu ngaokhüm ne menglak.”

¹²Youngwanpawe Mosate i, “Nang Abarim kahtangte ongtüoh, hüyange Taowe Israel kahtalante phapu kahtokte leitüoh.

¹³Hüyange aope nange hatüo ngelakei, nango nangjei Aaron kih-e yoi phei pulan phei omlak,

¹⁴hangjingne nangni moiniye Zin phaonyu jong me ü-ngaokhüm te win yejaipe yong. Aope Meribah me ükhong khongkümpuwe Ü-phei tüi-e yongyapeih, nange iman sheshao me ü-üjaopa wong hüone yetam.” (Tüolan-a Zin phaonyu jongme Kadesh me Meribah yengpeiwo ngoh nang.)

¹⁵Mosawe Youngwanpate ngaowe i,

¹⁶“Youngwanpa Kahwang, üyin yaha khongkümpu phapupawe kahta ja aowe kahtalan woipu oklak letüoh,

¹⁷hüyange iman sheshao me ao tailak hüyange shaote ngoiye tamlak, aowe iman woiteilak, hüyange woiye yelak; hüke Youngwanpa jing ükhonga nyeeyompa yenangpu nyeelan kih yengoh tamlak ne letüoh she taowe yoppe tongnang.”

¹⁸Hüyange Youngwanpawe Mosate i, “Nun üha Joshua ao me yaha ngohnang, nange I yahtüoh hüyange nang yakke Ite shüngtüoh.

¹⁹Hüyange Eleazar ngengpa sheshao me hüyange ükhong sheshao me I yongne tamtüoh; hüyange iman-e ngeye nang nanleipa ne Ite phünne pha tamtüoh.

²⁰Hüyange Israel kahtalan ükhong khongkümpuwe winjailak ne nange nang wangshüm I me angtam tüoh.

²¹Hüyange Iye Eleazar ngengpa sheshao me yonglak hüyange ngengpawe I jingne Youngwanpa sheshao me Urim hei Thummim kaiye ngaophünlak tonglak; I ngao me iman tailak, hüyange I ngao me iman leihyelak, hüke I hüyange Israellan khongkümpu, ükhong üshei khongkhangkümpu!”

²²Hüyange Youngwanpawe Ite ngaowe tampuke Mosawe ling; hüyange Iye Joshua woipeiye Eleazar ngengpa sheshao me hüyange ükhong üshei sheshao me yongne tam,

²³hüyange Iye yoi yakke Ite shüng hüyange Youngwanpawe I kaiye ngaowe tampuke Ite phünne phawe jaowe tampu pha.