Read Konyak Naga LUNGTET 28 Bible Online

LUNGTET 28 - Konyak Naga bible

LUNGTET 28

¹Youngwanpawe Mosate ngaowe i,

²“Israel kahtalante ngaowe tamtüoh hüyange imante itüoh, ‘Üte dopu üjingne hahying dopu vün kaiye phapu, üjingne üpe ümei, tüolan hipak khakshuwe üte dolak jingne numan-e kentinglakyang.’

³Hüyange nange imante ilak, Youngwanpate numan-e dolakpa dopuwa hatüo ngohnang; yelakpe jakke dopu jingne nyeepong üko yenangpu wangja nao nyihjeih she ni.

⁴Nyeeha ja napning nange dolak hüyange nyeeha ja-a ünpong me nange dolak;

⁵hüyange hahying dopu jingne ankhoih kilogram ja phei shemeipupa olive minnga liter ja nyütyange dolak.

⁶Hatüowa yelakpe jakke dopu, hanghe üpe ümei jingne vün phei Youngwanpa jingne dopu Sinai kahtang me wangpu ngoh nang.

⁷Hüyange wuwüngti dopuwa üwangpa nyeeha ja jingne wuwüngti liter ja nange Youngwanpa jingne wümjongte wuwüngti shokke tamlak yang.

⁸Hüyange nyeeha ja-a nange ünpong me dotüoh; Youngwanpa jingne üpe meipu, vün kaiye dopu, wuwüngti dopu kih-e nange hatüo shomme hahying dopu kih-e dolak yang.”

⁹“Sabbath me wangja nao üko yenangpu nyee üpong ni, hüyange hahying dopu jingne ankhoih kilogram ni olive minnga phei nyütyange ülick dopu ja ne, hüyange wuwüngti dopu ja ne dolak.

¹⁰Nyihjeih she wuwüngti dopu phei paowe jakke dopuwa Sabbath nyih lep iye dolak yang.”

¹¹“Numan leat üwangye me, numan-e Youngwanpate jakke dopu ja phalak yang; mahu üponghani, nyeepong ja, wangja nao üko yenangpu nyee üpongha nyit;

¹²hüyange ülick dopu ja ne, olive minnga phei nyütyange ankhoih dotüoh; Mahu üpong ja ja jingne ankhoih kilogram lüm pong, nyeepong jingne ankhoih kilogram nipong;

¹³hüyange nyee ha jingne kilogram japong. Tüolan jakke dopulan-a hahying dopu ngohnang, tüopa üpe meipuwe Youngwanpa mongmei ne tamnang;

¹⁴Ütingpa me wuwüngti dopuwa mahu üpong jaja jingne wuwüngti liter nipong, nyeepong ja jingne liter ja phei me tangkhüw, hüyange nyeeha jingne liter ja pong. Hatüowa leat lili tepu üwangpa nyih hüke wangpeng khongkümpu mongme jakke dolak jingne ngaokenglan ngoh nang.

¹⁵Hüyange wuwüngti dopu phei nyih jeih jakke dopu tokte paowe ünu dopu ja ne younpong ja dotüoh.”

¹⁶“Üwangpa leat nyih pen me peli shepu nyih me Youngwanpate yinyepu mo dopu ngohlak.

¹⁷Hüyange tüopa leat nyih pen me nga shepupa nyih me, nyih nyit mongme molak, tüolan nyih hipak me do yenyetpu an shaha hahlak.

¹⁸Üwangpa nyih me yoppe khümpu jempu ja ngohlak; hüyange numan-e toi hango yemokh lak.

¹⁹Hüpoi jakke dopu ja, Youngwanpa te hahying dopu ja ne dotüoh; mahu üpong üha ni, hüyange nyeepong ja, hüyange wangja nao nyee üpongha nyit tüolan-a hang üko-o yenangpe ngohlak yang.

²⁰Ütingpa ülick dopu olive minnga phei nyütyange dotüoh: Mahu üpong ja ja jingne kilogram lüm pong, nyeepong jingne kilogram nipong,

²¹hüyange nyeeha ja ja nyit jingne kilogram japong.

²²Tüophei jamme ünu dopu jingne youn pong ja dotüoh, hüyange hüke lingne kahtalan mengpu wanglamme jaowe tam-e lingtüoh.

²³Shomme jakke dopu, hanghepa jintepu jingne jakke dopu ngohnang, tüopa tokte paowe nange tüolan-a dolak yang.

²⁴Tüokih-e muh, dopulan nyih nyit jingne Youngwanpate hahying dopu Ite mongmei ne tampu üpe meipu dotüoh. Tüopa dopuwa nyih jeih jakke dopu hüyange wuwüngti dopu tokte paowe dotüoh.

²⁵Hüyange nyih nyit shepupa me numan yoppe khümpu jempu ja ngohlak; hüyange numan-e toi hango yemokh lakyang.”

²⁶“Tahyah mo tepu üwangpa nyih, aope numan-e Youngwanpate tahlick üla doyalakei, yoppe khümlak jingne numan jemlak yang hüyange numan-e lüohlu toi yemokhlak yang.

²⁷Tüoyangpoi Youngwanpate üpe ümei peye tamlak jingne jakke dopu ja dotüoh: Mahu üpongha ni, nyeepong ja, hüyange wangja ngoite phei nyee üpongha nyit khongkümpuwa üko üshang hango yenangpu yahlak.

²⁸Ütingpa ülick dopu ja olive minnga phei nyütyangpu ankhoih dotüoh: Mahu üpong jingne kilogram lüm pong, nyeepong jingne kilogram nipong,

²⁹hüyange nyeeha nyit japong jingne kilogram japong.

³⁰Tüophei jamme ünu dopu numan jingne younpong ja dotüoh.

³¹Tüolan hüyange wuwüngti dopulan nyihjeih she jakke dopu hüyange ülick dopulan tokte paowe dotüoh. Tüolan-a tah-yetüopulan ne menglak.”