Read Konyak Naga LUNGTET 29 Bible Online

LUNGTET 29 - Konyak Naga bible

LUNGTET 29

¹“Leat nyit shepupa üwangpa nyih me numan-e yop-e khüm-e jempu ja ngohlak: hüyange numan-e toi hango yemokhlak. Tüopa ümpo nyih me numan-e nyawong wünglak yang.

²Jakke dopu ja üpe meipuwe I monghah tamlak jingne do tüoh: mahu üpong üha ja, nyeepong ja, hüyange wangja ngoite phei nyeeha nyit, khongkümpuwa üko ükat yenangpu ne menglak.

³Ütingpa ülick dopu olive minnga phei nyütyang phei ankhoih dotüoh: mahu üpong phei ankhoih kilogram lüm, nyeepong phei kilogram ni,

⁴hüyange nyeeha lili phei kilogram japong.

⁵Tüophei jam-e ünu dopu ja ne younpong ja kahtalan jaotamlak jingne dotüoh.

⁶Leat tepu üwangpa nyih ülick dopu ne yelakpe jakke dopulan phei paopu ne tüolan-a dotüoh, hüyange ülick dopu hei wuwüngti dopu phei nyihjeih jakke dopu dotüoh. Tüolan hahying dopu lan-a Youngwanpa te mongmei ne tam-e üpe ümei petampu ngohnang.”

⁷“Nyit shepupa leat tepu pen shepupa nyih me yop-e khümpu ja ngohlak jingne jemtüoh: hahying hango tah hah, hüyange toi hango tah mok.

⁸Numan-e jakke dopu ja üpe ümeiye mongmei ne tam-e dotüoh: mahu üpongha ja, nyeepong ja, hüyange wangja nao nyeepongha nyit: tüolan-a üko ükat yenangpe ngohlak yang;

⁹ütingpa ülick dopu olive minnga phei ankhoih me nyütyange dolak yang; ankhoih kilogram lüm mahu üpong phei, kilogram ni nyeepong phei,

¹⁰hüyange nyeeha nyit japong jingne kilogram japong.

¹¹Tüophei jam-e ünu dopu ja jingne youn pong ja kahtalan jingne jaowe tampu dopu youn tokte paowe, ülick dopu hüyange wuwüngti dopu phei nyih jeih jakke dopu tokte paowe dolak.”

¹²“Nyit shepupa leat tepu pen me nga shepupa nyih me yop-e khümpu ja ngohlak jingne jemtüoh; Youngwanpate yihnoonpu hüowe nyih nyit mongme tüopa mo ngoh tüoh, hüyange hanghe toite-o tahmokh.

¹³Tüopa üwangpa nyih me Youngwanpate hahying dopu ja, üpe meipuwe mongmei ne tam-e dotüoh; mahu üpongha pen me lüm, nyeepong ni, hüyange wangja nao nyeeha pen me peli, khongkümpuwa üko ükat yenangpu yahlak.

¹⁴Ütingpa ülick dopu olive minnga phei nyütyangpu ankhoih dotüoh; mahu üpong pen me lüm jaja jingne ankhoih kilogram lüm pong, nyeepong ni jaja jingne kilogram ni,

¹⁵hüyange nyeeha pen me peli jaja jingne kilogram ja, wuwüngti dopu phei omme yahlak.

¹⁶Tüophei jam-e ünu dopu ja jingne younpong ja dotüoh. Tüopa-a ülick dopu hei wuwüngti dopu phei nyihjeih jakke dopu tokte paowe dolak yang.

¹⁷“Ni shepupa nyih me numan-e mahu üpongha pen me ni, nyeepong ni, hüyange wangja nao nyeeha pen me peli dolak yang; khongkümpuwa üko ükat yenangpu yahlak.

¹⁸Hüyange iman hahying dopu hüyange wuwüngti dopu mahu ponglan jingne, nyee hüyange nyeehalan jingne, mengpu wanglam ngaokhüm kih-e iman shangtoi phei phinne,

¹⁹yelakpe jakke dopu, hahying dopu hüyange wuwüngti dopu tokte kaiye, ünu dopu jingne younpong ja dolak yang.

²⁰“Lüm shepupa nyih me mahu üpongha pen me ja, nyeepong ni, wangja nao nyeepongha pen me peli, khongkümpuwa üko ükat yenangpu yahlak.

²¹Hüyange tüolan hahying dopu hüyange tüolan wuwüngti dopu mahu üponglan jingne, nyeeponglan jingne, hüyange nyeehalan jingne, mengpu wanglam ngaokhüm kih-e shangtoi phei phinne;

²²hüyange yelakpe jakke dopu, hahying dopu hüyange tüopa wuwüngti dopu tokte kaiye ünu dopu jingne youn pong ja dolak yang.”

²³“Peli shepupa nyih me mahu üpongha pen, nyeepong ni, wangja nao nyeepongha pen me peli, khongkümpuwa üko ükat yenangpu yahlak.

²⁴Iman hahying dopu hüyange wuwüngti dopu mahu üpong jingne, nyeeponglan jingne, hüyange nyeehalan jingne, mengpu wanglam kih-e shangtoi phei shuwe;

²⁵yelakpe jakke dopu hahying dopu hüyange wuwüngti dopu tokte kaiye, ünu dopu jingne younpong ja dolak yang.”

²⁶“Nga shepupa nyih me mahu üponglan tu, nyeepong ni, wangja nao nyeepongha pen me peli, khongkümpuwa üko ükat yenangpu yahlak.

²⁷Hüyange iman hahying dopu hüyange wuwüngti dopu mahu üponglan jingne, nyeeponglan jingne, nyeehalan jingne, mengpu wanglam ngaokhüm kih-e shangtoi phei shuwe;

²⁸hüyange yelakpe jakke dopu, hahying dopu hüyange wuwüngti dopu tokte kaiye ünu dopu jingne younpong ja dolak yang.”

²⁹“Wok shepupa nyih me, mahu üpongha tet, nyeepong ni, wangja nao nyeepongha pen me peli; khongkümpuwa üko ükat yenangpu yahlak.

³⁰Hüyange hahying dopu hüyange wuwüngti dopu mahu üponglan jingne, nyeeponglan jingne hüyange nyeehalan jingne mengpu wanglam kih-e shangtoi phei shuwe;

³¹hüyange yelakpe jakke dopu, hahying dopu hüyange wuwüngti dopu tokte kaiye, ünu dopu jingne younpong ja dolak yang.”

³²“Nyit shepupa nyih me mahu üpongha nyit, nyeepong ni, wangja nao nyeeha pen me peli, khongkümpuwa üko ükat yenangpu yahlak.

³³Hüyange iman hahying dopu, hüyange wuwüngti dopu mahu üponglan jingne, nyeeponglan jingne, hüyange nyeehalan jingne, mengpu wanglam ngaokhüm kih-e iman shangtoi phei shuwe,

³⁴hüyange yelakpe jakke dopu, hahying dopu hüyange wuwüngti dopu tokte kaiye ünu dopu jingne younpong ja dolak yang.”

³⁵“Tet shepupa nyih me numan-e yoppe khümlak jingne jempu ja ngohlak; hüyange numan-e hangtoi-o yemokhlak yang.

³⁶Hüpoi Youngwanpate hahying dopu ja ne jakke dopu üpe meipuwe I mongmeine tam-e dolak yang; mahu üpongha ja, nyeepong ja, hüyange wangja nao nyeepongha nyit, khongkümpuwa üko ükat yenangpu yahlak.

³⁷Iman hahying dopu hüyange wuwüngti dopu mahu üpong jingne, nyeepong jingne hüyange nyeehalan jingne, mengpu wanglam ngaokhüm kih-e shangtoi phei shuwe;

³⁸hüyange yelakpe jakke dopu, hahying dopu hüyange wuwüngti dopu tokte kaiye, ünu dopu jingne younpong ja dolak yang.”

³⁹“Tüolan-a numan-e leyahpu mo hipak me jan-e tampu hüyange numan mongloong dopu, hüyange numan hahying dopu hüyange numan wuwüngti dopu hüyange numan chingmei dopu tokte kaiye tüolan-a numan-e Youngwanpate dolak yang.”

⁴⁰Tüokhei Youngwanpawe Ite ngaowe tampu kih-e, khongkümpu Mosawe Israel kahtalante ngaowe tam.