Read Konyak Naga LUNGTET 3 Bible Online

LUNGTET 3 - Konyak Naga bible

LUNGTET 3

¹Sha-a Sinai kahtang me Youngwanpawe Mosa phei ngaopu nyih me Aaron hei Mosa noksalan tüolan ngoh yangki.

²Tüolan-a Aaron hayim naoshe peli: Üwangne puhpu jeiyongpa Nadab, hüyange Abihu, Eleazar, hüyange Ithamar.

³Imante minnga phowe jaotam hüyange ngengpa shaoshanlak jingne phünne phawe tam.

⁴Hüpoi aope Sinai wanwüng jeng me Youngwanpa sheshao me Nadab hei Abihu niye yejaopu vün phei Youngwanpate doyapeih, imni-a toiyangki. Hüyange imni me hayim yenangpe ngoh. Tüokhei Eleazar hei Ithamar niye iman üpa Aaron üyin hipak me muh ngengpa toishao shan.

⁵Hüyange Youngwanpawe Mosate ngaowe i,

⁶“Levi nokphong sheshao yete woipei tüoh, hüyange Aaron ngengpa sheshao me shaoshanlak jingne iman letüoh.

⁷Hüyange iman-e khümjing nyenok me ngaipu toi linglak, khümjing nyenok me iman-e ngengpa jingne hüyange ükhong khongkümpu jingne toi linglak.

⁸Khümjing nyenok tepu toinan khongkümpu te iman-e yakjonglak, hüyange ülao Israellan khongkümpu jingne iman-e shaoshanlak.

⁹Levilan toishao ne-a Aaron hei I halan shaoshanlak hei ngoh nang.

¹⁰Hüyange nange Aaron hüyange Ihalan ngengpa toishao linglak jingne letüoh hüyangpoi kahta ütam-e tüopa toishao linglak jingne ngangma-a, I-a li ne tamlak.”

¹¹Tüophei me Youngwanpawe Mosate i,

¹²“Leihuyah, Israel hayim yo me üwangne puhpu khongkümpu nanleiye, Israel hayimlan yo mepu Taowe Levilan yahteki; hüyange Levilan-a üjingne menglak;

¹³hangjingne üwangne puhpu khongkümpu üjing; Egypt kahtok me Taowe üwangne puhpu khongkümpu toipu nyih me Israel me üwangne puhpu, kahta hüyange yinmok, khongkümpu üjingne jaowe tam-e ang; iman-a üjingne ngohlak; Taowa Youngwanpa ngoh nang.”

¹⁴Hüyange Youngwanpawe Sinai wanwüng jeng me Mosate i,

¹⁵“Levi hayimlan puhu hüyange nyahtüplan min nyantüoh; lekeng ja me peipu hüyange ütokye netan lili nange ilak yang.”

¹⁶Tüokhei Mosawe Ite nyinge tampu kih-e Youngwanpa ngaome iman iye lei.

¹⁷Hüyange tüolan-a Levi hayimlan iman min ne ngoh yangki. Gershon, Kohath, hüyange Merari.

¹⁸Hüyange tüolan-a Gershon hayim iman puhulan min ngoh nang: Libni hüyange Shimei.

¹⁹Hüyange Kohath hayimlan iman puhu lan min: Amram, Izhar, Hebron, hüyange Uzziel.

²⁰Hüyange Merari hayimlan iman min Mahli hüyange Mushi. Tüolan-a iman puhu kih-e Levi nyahtüp ngohnang.

²¹Gershon puhu ne-a Libnilan nyahtüp hei Shimeilan nyahtüp ngoh yangki.

²²Aoyin lekeng ja lwngmei mepu ütokye iye lei, netan khongkümpu shangtoi, hüke aoyin iyelei tüolan-a ha nyit gho nga ngoh yangki.

²³Gershon puhulan-a khümjing nyenok tokphei yeme henyip yekao me laklak.

²⁴Hüyange Gershon puhulan woipa ne Lael üha Eliasaph ngohlak.

²⁵Hüyange iman-a khümjing nyenok ümongye jant, tüopatepu ütahye jant, tafün shong yekao mepu jhotnye tüolante namnolak,

²⁶ghonyoi jingne yahpu jhotnye hangheye khümjing nyenok hüyange wümjongte neikonnang, hüyange gho tafün shong yekao tepu jhotnye tüolan khongkümpute Gershon puhulan-e namnolak. Hüyange tüolan toishao phei teishinpu shaoshanpu lili me iman-e namnolak.

²⁷Kohath puhu ne-a, Amram, Izhar, Hebron hüyange Uzziel nyahtüplan ngoh yangki.

²⁸Lekeng ja lwngmei me peiye ütokye netan khongkümpu üjao nyoi me shaoshanpu iyelei pu me haja tet gho wok.

²⁹Kohath hayim puhulan-a khümjing nyenok heye kaome laklak yang;

³⁰Kohathlan puhu me üshang ne Uzziel üha Elizaphan ngohlak.

³¹Hüyange iman-a jiengjeppu ghonu, khao, vüntük yongjing, hüyange wümjonglan, hüyange ngengpalan-e Üjao Nyoi me jonpaipu khümwümpu toinan, hüyange üjao tokte Üjao Nyoi tafün shongte ongpu jhotnye tüolan lilite namnolak. Hüyange tüolan toishao phei teishinpu shaoshanpu lili me iman-e namnolak.

³²Hüyange Levilan woipa ütah ne Aaron ngengpa üha Eleazar woipa üjeng ne menglak. Hüyange aoyinne üjao nyoi me shaoshanpu toi ling tüolan tangme I-a yakjongpa ne menglak.

³³Merari puhu ne-a Mahli hei Mushi nyahtüplan ngoh yangki. Tüolan-a Merari nokphong.

³⁴Hüyange lekeng ja lwngmei hüyange ütokye netanlan iye leipu me haja wok gho ni ngoh yangki.

³⁵Hüyange Merari puhu woipa ne Abihail üha Zuriel ngoh yangki; tüopa puhu ükhonga khümjing nyenok apyekao me iman laklak.

³⁶Hüyange iman-a khümjing pephatlan, tüopa tepu wenao, hüyange shonglan, hüyange yajenth, hüyange tüopa tepu toinan khongkümpu jingne namnolak. Hüyange tüolan toishao lan phei teishinpu shaoshanpu lili me iman-e namnolak.

³⁷Iman-a üne-o gho ü-at ye me yahlak shonglan, yajenthlan, hanlaglan, hüyange wu tüolan jingne iman-e namnolak.

³⁸Hüyange Mosa hüyange Aaron hei Ihalan-a khümjing nyenok nokshao ye heong ye me lakjing linglak. Iman-a Üjao Nyoi me Israel kahtalan jingne khümwümpu toishao lili lingpu me yakjong ne menglak. Kahta ütam-e tüopa toishao linglak jingne ngangpuwa li ne tam-e ngoh yangki.

³⁹Hüyange lekeng ja lwngmei hüyange ütokye netan khongkümpu Youngwanpawe ngaowe tampu me Mosa hei Aaron niye Levilan iyeleipu khongkümpu sheiyange haja da me ni ngoh yangki.

⁴⁰Hüyange Youngwanpawe Mosate i, “Israel hayim üwangne puhpu netan lekeng ja yejema-a tüo ütokye lwngmei lili min nyantüoh.

⁴¹Hüpoi tüolan khongkümpu nanleiye Taowe Levilan khongkümpuwa üjing she tünnang! Taowa Youngwanpa! Taowe üne-o tampu yinmok üwangne puhpu khongkümpu nanleiye, Levilan jing yinmok lan tünnang.”

⁴²Tüokhei Youngwanpawe Ite ngaowe tampu kih-e Mosawe Israel hayim yo me üwangne puhpu khongkümpu min nyan.

⁴³Hüyange üwangne puhpu netan khongkümpu, lekeng ja lwngmei hüyange ütokye mepu iman min nyanpu me haja da me ni gho ni denyit phei me lüm.

⁴⁴Hüyange Youngwanpawe Mosate ngaowe i,

⁴⁵“Israel hayim üwangne puhpu khongkümpu nanleiye Levilan, hüyange iman-e tampu yinmok nanleiye Levilan-e tampu yinmok jaowe tamtüoh; hüyange Levilan üjingne ngohlak; Tao Youngwanpa ngohnang.

⁴⁶Hüyange üwangne puhpu Israel hayimlan Levilan phei shangtoi gho ni denyit me lüm nyeiye ngohtepuwe, nyeiye ngaipu netan nahalan-a nange shakke yelak yang.

⁴⁷Naoshe ja ja jingne nange khüm ngin ükhüw nga nga phalak yang, Üjao Nyoi me jonpu toklak me tok-e heiyange phalak yang.

⁴⁸Hüyange tüopa ngin-a Aaron hei Ihayim lante phatüoh.”

⁴⁹Tüokhei Levilan-e yintampu, aoyin shangtoi ünyei ne ngoh iman mepu yintampu ngin-a Mosawe yah;

⁵⁰Israel hayim üwangne puhpu mepu Iye ngin-a khüm ngin ükhüw haja ja gho lüm dewok me nga yah;

⁵¹hüyange Youngwanpawe Ite ngaowe tampu kih-e Mosawe yinyetampu ngin-a Aaron hüyange I halante pha.