Read Konyak Naga LUNGTET 30 Bible Online

LUNGTET 30 - Konyak Naga bible

LUNGTET 30

¹Tüophei me Israellan nokphong üshanglante Mosawe i; “Hatüowa Youngwanpawe hanghe ngaokeng pha tüo ngohnang.

²Aope kahta jawe Youngwanpate ülam ja jingne jiengpu yahlakei, yejema-a ülam ja mepu jaowe ngohlak jingne janpu yahlakei, Iye yoiye janyangpu yemenglak yang, hüpoi Iye linglakei she ngaoyangpu khongkümpu linglak yang.

³“Aope sheko naoyha jawe Ipa nok me ngohyange Youngwanpate ülam ja jingne jiengpu yah, yejema-a ülam ja mepu jaowe ngohlak jingne janpu yah;

⁴yhawe jiengyangpu yejema-a janyangpuwa tüopa ngaolan jaiyang phei me Ipahi hang ngao-o yengaima-a lamphe li yhawe janne ngohyangpu kih linglak wongpong.

⁵Hüpoi Ipawe Iye jaipu nyih me yhate tienpu ne mengma-a, yhawe jiengpu yejema-a yhawe janpu hangheye yha shayange ngoh, hango yeyahlak; hüyange Youngwanpawe yhate ümeng winlak, hangjingne Ipawe yhate tien.

⁶“Yhawe jiengpu ngohpu hipak me yejema-a yeteih tüope janpu ütam jawe yhate shayange ngohpu hipak me yha toitaima-a,

⁷hüyange hatüo yha netanpawe jaima-a hüyange Iye jaipu nyih me ngao yengaipe ngohma-a; hüwantepa-a yha jiengpu yemenglak hüyange janpu hangheye yha nying nyingke shayange ngoh, hatüo yemenglak.

⁸Hüpoi Iye jaipu nyih me Iye hatüo o-ngao yepha ma-a, hüwante Iye yhate yhawe jiengpu ngohpuwa, hüyange yhawe yeteih tüope yha nying nyingke janpuwe shayange ngohpuwa phutte winlak; hüyange Youngwanpawe yha te ümeng winlak.

⁹“Hüpoi wümnyu ja yejema-a toiyanpu shekowe jiengpu hanghe yinne yhawe yha nying nyingke shayange ngoh, hatüo yha me shayange ngohlak.

¹⁰“Nokne mengte phei sheko jawe yha netanpa nok me jiengpu yejema-a janpuwe yhate shayange ngohma-a,

¹¹hüyange yha netanpawe hatüo jaima-a, hüyange yhate ngao yengaipe ngohma-a, hüyange yhate yetienma-a, hüwante yhawe jiengpu khongkümpu yemenglak, hüyange yhawe yha nying nyingke janpuwe yhate shapu khongküm yemenglak.

¹²Hüpoi yha netanpawe tüopa jaipu nyih me tüolan-a tientam küma-a, hüwante yha ju mepu hanghe yin jiengpu jeng yejema-a yhawe yoi janpu jeng ngailakei, hatüo yeyahlak; yha netanpawe tüolan-a wintam teki, hüyange Youngwanpawe yhate ümeng winlak.

¹³Jiengpu lili me hüyange janpu yahpu lili me hanghepawe yoite shaoshi yahnang, hatüo yoi netanpawe lingetampu oklak, yejema-a phutte winne ok.

¹⁴Hüpoi yha netanpawe nyih jeih she ngao yengaipe ngohma-a, hüwante yhawe jiengpu hüyange yha me ngohpu janpu khongkümpu linge tamlak; hangjingne Iye yha sheshao me hatüo jaipu nyih me Iye ngao yengaipe ngohyangki.

¹⁵Hüpoi tüolan-a Iye jaiyang phei me Iye yaoweleye winma-a, hüwante Iye yoi shekonyu ümeng kilak.”

¹⁶Tüolan-a netanpa hüyange I shekonyu nipa me, hüyange Ipa hei I yhala Ipa nokme ngohpu naoyhawan hipak imnipa me linglak jingne Youngwanpawe Mosa te ngaowe tampu ngaokeng hatüolan ngohnang.