Read Konyak Naga LUNGTET 31 Bible Online

LUNGTET 31 - Konyak Naga bible

LUNGTET 31

²“Israel kahtalante iman-e hanghe lingyangki tüopa jingne Midianlante phuh hahtüoh; nange tüopa ling yangphei me, nang yoi pheipulan phei omlak.”

³Tüokhei Mosawe kahtalante i, “Wehoklak jingne tümtayah, hüyange iman-e Youngwanpate hanghe lingyangki tüopa jingne numan-e Midianlan te shümlak hüyange imante shangne tamlak.

⁴Israel nokphong lili mepu kahta haja japong wehoklak jingne shontüoh.”

⁵Tüokhei Israel haja üngang yo mepu nokphong lili mepu haja japong, khongkümpu haja pen me ni ngou hei yang phei wehoklak jingne tüm.

⁶Hüwante Mosawe iman Eleazar ngengpa üha Phinehas woipa phangme nokphong lili mepu haja japong wehokte khümjing tük-heilak hüyange pongtam nyawong wünglak I yak me jonyange shon.

⁷Hüyange Youngwanpawe Mosate ngaowe tampu kih-e, iman-e Midianlan phei hok, hüyange netanlan khongkümpu toi.

⁸Hüyange iman-e Midianlan Ahngpa nga; Evi, Rekem, Zur, Hur, hüyange Reba iman-o omme toi. Iman-e üne-o Beor üha Balam-o yanglow-e toi.

⁹Hüyange Israel kahtalan-e Midian shekolan, hüyange iman hayimlan phowe jem; hüyange mahu ükhong khongkümpu, hüyange nyee ükhong khongkümpu, hüyange iman toinan khongkümpu, iman-e nyieyeyah.

¹⁰Hüyange iman ngohpu chingnyu khongkümpu, hüyange iman lakjing khongkümpu, vün phei iman-e jakke wintam.

¹¹Hüpoi iman-e chinghahwe yahpu khongküm, nyieyeyahpu khongküm, kahta hei yinmok moini yah.

¹²Hüyange iman-e phowe yahpalan, hüyange nyieye yahpu, hüyange chinghah-e yahpu toinan, Mosa hüyange Eleazar ngengpa hüyange Israel kahta ükhong üshei tangte Jordan ü-o me Jerikho me Moab kahjee te yahpei.

¹³Mosa, Eleazar ngengpa, hüyange ükhong woipalan üshei lakjing nokshao yete iman pongte yu.

¹⁴Hüyangpoi nyahpong woipalan, haja tangme woipa hüyange gho tangme woipa, wehok mepu yepalante Mosa mongshih ngai.

¹⁵Mosawe imante i, “Numan-e shekolan khongküm üyin me tüoh a?

¹⁶Teih tüoyah, Balam-e nyüoweleipu pheite woipalan-a shekolan ngoh yangki; hüyange Peor me kahtalan Youngwanpate üting yelak lakne ling tam. Tüo kaiye Kahwangpa jing kahtalante leam peine tamyangki.

¹⁷Tüokhei sha-a, üjoihalan yo me netanlan khongkümpu toitüoh, hüyange aoyin sheko netan phei shipu shingteiye ngoh iman lili toitüoh.

¹⁸Hüpoi aoyin sheko netan phei shipu manshing, hüyange tüokihpu sheko nahalan numan jingne üyin me angtüoh.

¹⁹“Hüyange numan lakjing ü-at ye me nyih nyit mongme hüng ngohtüoh; aohipawe kahta ütam toi; hüyange aohipawe lipu mang ütamte let, numan nying nyingke lüm shepupa nyih hüyange nyit shepu me numan hüyange numan-e phopalan jaowe tamtüoh.

²⁰Hüyange nyemo lili, hüyange meisho phei lingpu khongkümpu, youn ümin phei lingpu khongkümpu, pee phei lingpu toinan khongküm, numan-e numan nying nying ke jaolak yang.”

²¹Hüyange Eleazar ngengpawe wehokte taiyange leihyepu kahtalante i, “Youngwanpawe Mosate phawe tampu linglak ngaokeng lan-a hatüo ngohnang:

²²hon, khüm, shakphan yan, yanmei, tam, hüyange leaklan,

²³vün ne yehalak toilam lili, numan-e vün me shüppe tamlak yang, tüophei me jaowe tampu ngailak. Tüoyangpoi yejaopu lan-a yenge hatüo jaowe tamlak yang; hüyange hangheyin vün me yeshu ok, numan-e yeng kaiye jaowe tamlakyang.

²⁴Nyit shepupa nyih me numan nyemo shaolak yang, hüyange numan wanglam kih-e jaowe ngailak, tüophei me numan-e lakjingte leih yelak.”

²⁵Youngwanpawe Mosate ngaowe i,

²⁶“Nang hüyange Eleazar hüyange ülao ükhong woipalan nangyange, kahta hüyange yinmok moini nyieyahpu toinan lili iyelei tüoh.

²⁷Hüyange nyieyahpu toi üphong ni ne, wehokte taipu ngangpalan hüyange ükhong khongkümpu nipa me tamtüoh.

²⁸Hüyange Youngwanpa jingne wehokte taipalan jing meitam mepu poon ne yahtüoh; kahta, mahu, gado, hüyange nyee ükhong mepu gho nga phe mepu japong yahtüoh.

²⁹Tüolan tangkhüw Youngwanpate shemeipupa dopu ja ne phalak ne Eleazar ngengpate phatüoh.

³⁰Hüpoi Israel hayimlante phapu meitam mepu tangkhüw kahta, mahu, gado, hüyange nyee, denga phe mepu japong yahlak, hüyange Youngwanpa khümjing nyenok me yakjongpu Levilante phalak.”

³¹Hüyange Youngwanpawe Mosa te ngaowe tampuke Mosa hei Eleazar ngengpa niye ling.

³²Sha-a chinghahne taipalan-e nyieyah yepu nyee hei younlan-a lakh wok haja denyit me nga ngohyangki.

³³Mahulan haja denyit me ni,

³⁴gadolan haja dewok me ja,

³⁵hüyange netan phei shipu manshingpu sheko haja delüm me ni.

³⁶Wehokte taipalan jing meitam tangkhüw youn hei nyee lakh lüm haja delüm me nyit gho nga.

³⁷Hüyange tüo mong mepu Youngwanpate poonne phapu nyee hei youn gho wok denyit me nga.

³⁸Hüyange mahulan-a haja delüm me wok; tüo mong mepu Youngwanpa jing poon-a denyit me ni.

³⁹Hüyange gadolan-a haja delüm gho nga, tüo mong mepu Youngwanpa jing poon-a dewok me ja.

⁴⁰Hüyange ngangpalan jingne netan phei manshipu sheko haja pen me wok, tüo mong mepu Youngwanpa jing poon-a iman delüm me ni.

⁴¹Hüyange Youngwanpawe Mosate ngaowe tampuke Mosawe Youngwanpa poon-a Eleazar ngengpate pha.

⁴²Israel kahtalan meitam tangkhüw, ngangpalan phei Mosate tampu mepu,

⁴³sha-a ükhong jing meitam tangkhüw-a nyee hei youn lakh lüm haja delüm me nyit gho nga.

⁴⁴Mahulan haja delüm me wok,

⁴⁵hüyange gadolan haja delüm gho nga,

⁴⁶hüyange netan phei manshipu shekolan haja pen me wok.

⁴⁷Israellan meitam tangkhüw kahta hüyange yinmok moini mepu denga mepu japong teakke yah, hüyange Youngwanpawe Mosate ngaowe tampuke Youngwanpa khümjing nyenok yakjongpa Levilan te tüolan-a pha.

⁴⁸Hüwante nyahponglan haja ja tangme woipa, hüyange gho ja tangme woipalan, Mosa tangte pei, hüyange Mosate i,

⁴⁹“Nang shaoshanpa lan-e toman yak me ngohpu ngangpalan toman-e iyelei teki, hüyange toman ja nehoi yemahpe ngohnang.

⁵⁰Hüyange Youngwanpa sheshao me toman yoi jingne ünu tantamlak linglak jingne kahta liliye yahpeipu dopu hon, wentong, awfa, shüptet, naju, yük, toman-e yahpeiye ngohnang.”

⁵¹Tüokhei Mosa hüyange Eleazar ngengpa niye iman mepu hon, wongpong ne mengpu toinan khongkümpu yah;

⁵²hüyange haja hei gho tangme woipalan-e Youngwanpate phapu hon khongkümpu tokke leiwante kilogram gho ni nanjing ngoh yangki.

⁵³Nyahponglan-aoyin woipa ne yemeng iman-e yoi nyieyah pulan-a yoi yoi jingne tükke-ang.

⁵⁴Tüokhei Mosa hei Eleazar niye nyahponglan woipalan mepu honlan-a khümjing nyenok te yah pei, tüo kaiye Israel kahtalan-a Youngwanpawe yinne ang.