Read Konyak Naga LUNGTET 32 Bible Online

LUNGTET 32 - Konyak Naga bible

LUNGTET 32

¹Sha-a Reuben hüyange Gad nokphonglan ne mahulan üngang ngohyangki. Aope iman-e Jazer kahmük, hüyange Gilead kahmük, mahulan jingne hahnyoi kahmük ümei ne nge.

²Iman-e Mosa, Eleazar hüyange ükhong mepu ülao woipalan tangte peiyange i,

³“Ataroth, Dibon, Jazer, Nimrah, Heshbon, Elealeh, Sebam, Nebo, hüyange Beon,

⁴hanghe kahmük Youngwanpawe Israel ükhong sheshao me toi taine tam, mahulan hahnyoi jingne meipu nyoijing yang, hüyange nang shaoshanpalan me mahulan üngang ngohnang.”

⁵Hüyange iman-e i, “Nange tomante shüpshe nüng she ima-a, tüopa kahtok-a nang shaoshanpalante mothlei ne tampha; Jordan kaiye toman woi tahtei kei.”

⁶Hüpoi Mosawe Gad hei Reuben nokphong lante i, “Numan pheipu Israel jeihei naolan wehokte taiwante numan-a tüome shot-e ngohlak a?

⁷Hangne Youngwanpawe Israel kahtalante phapu kahmükte tailak numan-e iman mongjang wong yenanglak ne linge tampu?

⁸Kahmükte leilak jingne Kadeshbarnea mepu taowe iman shonne teiwante nangpalane-o hüke ling.

⁹Hangjingne iman Eshcol kahjee te ongyange Youngwanpawe Israel kahtalante phapu kahmük te leiyepong, hüpoi leih yewante Israel kahtalante yetailak üja she iman mongjang wong yenangpe lingetam.

¹⁰Tüopa nyih me Youngwanpa mongshih ngai, hüyange Iye jiengjeppe i,

¹¹‘Ütingme Taowe Abrahamte, Isaacte, hüyange Jacobte janpu kahmük-a, Egypt mepu ngaipalan wangpeng da me peiye ütokye kahtalan-e ye-ngelak; hangjingne iman-e üte phünne phawe yewoi;

¹²hüke Kenizzilan Jephunneh üha Caleb, hüyange Nun üha Joshua tokte kaiye, hangjingne imniye Youngwanpa te phünne phawe woi.’

¹³Hüyange Israel kaiye Youngwanpa mongshih ngai, hüyange Youngwanpa sheshao me ümeng lingpu jin khongkümpu manmah manmah Iye iman tata ong ong she wangpeng deli ngoiye phao wanwüng jeng me wa ne tam.

¹⁴“Hüyange leihu, Israel kaiye Youngwanpa nyam nyam shepu mongshih ngaipu ünyei loonge tamlak ne, tüome nangpalan nanleiye ünu ükhong jalun-e, numan ngainang!

¹⁵Hangjingne I phei te yewoipe numan-e lüppe yema-a, Iye nishe iman phaonyu jongme tüohlak, hüyange numan-e tüopa jin khongkümpu mahne tamlak.”

¹⁶Hüwante iman-e Mosa shongte owe wenne i, “Tampu yinmoklan jingne toman-e tüome longkon nokwelak, hüyange üjoilan jingne chingnyu linglak o-ngao yahkei.

¹⁷Hüpoi iman yoi nyoite woiye manpei manpei, toman nying nyingke Israel kahtalan sheshao yeme tailak nguo hei yang tümme ngohlak; hüyange kahmük me ngohpu kahtalan mepu yinne ngohlak toman hayimlan toman-e chingnyu peten mongme anglak,

¹⁸Israel kahta, kahta liliye imante tampu kahmük moth manlei manlei toman yoi nokte leih-e yeyelak.

¹⁹Hüyange Jordan janye me hüyange otüome toman-e iman phei moth yeleilak; hangjingne toman jing mothlei-a Jordan tüoye kao me wanghe ongjing yekao me ngohnang.”

²⁰Tüokhei Mosawe imante i, “Numan-e ütingpa me tüokih-e linglakei she ima-a, hüyange numan-e Youngwanpa sheshao me taiye hoklak numan nying nyingke tümlakei she ima-a,

²¹hüyange taipu kahta liliye yoi sheshao ye mepu wepa jange mantei mantei Youngwanpa sheshao me Jordan kaiye tai lakei she ima-a,

²²hüyange Youngwanpa sheshao me kahtok-a yahlakei she ima-a, hüwantepa-a numan leihye-e Youngwanpa sheshao me hüyange Israel yekao me ümeng yenangpe ngohlak; hüyange tüopa numan ngohpu kahmük-a Youngwanpa sheshao me numan jingne ngohlak.

²³Hüpoi numan-e janyangpu kih yelingma-a, numan-e Youngwanpa kaiye ünu omnang; hüyange numan ünuwe numan yamme tüolak she shingyah.

²⁴Tüokhei numan hayim üjoipalan jingne chingnyu hüyange numan nyee jingne nok wetüoh; hüyange numan-e janyangpuwa lingtüoh!”

²⁵Hüyange Gad hüyange Reuben hayimlan-e Mosate i, “Nang shaoshanpalan-e toman nokpuwe ngaowe tampuke linglak.

²⁶Tomanjing naha üjoihalan, toman jing shekolan, toman jing mahulan khongkümpu Gilead chingnyu me ngoh tanlak.

²⁷Hüpoi toman nang shaoshanpalan-e toman nokpuwe ngaowe tampu meimeike Youngwanpa sheshao me toman nguo hei yang yahyange wehokte hoklak jingne tailak jingne Jordan kaiye tailak.”

²⁸Tüokhei Mosawe Eleazar ngengpate, hüyange Nun üha Joshua te hüyange Israel kahtalan nokphong woipalante tüolan jeng ngaowe tüoh.

²⁹Hüyange Mosawe imante i, “Gad hüyange Reuben hayim nguo hei yang jonpalan khongkümpuwe Youngwanpa sheshao me Jordan kaishih nüng she ima-a, hüyange numan-e kahmük-a chinghah-e ok yahma-a, hüma-a imante tüopa Gilead iman mothleine yahne tamtüoh.

³⁰Hüpoi iman-e numan phei nguo hei yang phei wehokte yetaima-a, hüwantepa-a imante-o Kanan kahtok me numan phei meitam tamlak.”

³¹Hüyange Gad hüyange Reuben hayimlan-e jan-e i, “Youngwanpawe nang shaoshanpalante ipu kih, hüke toman-e linglak.

³²Toman-e nguo hei yang jonyange Youngwanpa sheshao me shapju jingne Kanante onglak, hüyange Jordan heongye kahmük-a toman jing mothlei ne yahlak.”

³³Tüokhei Mosawe Gad hei Reuben nokphong lante hüyange Joseph üha Manasseh nokphong tangkhüw pute, Amorlan ahngpa Sihon ahngching, hüyange Bashan me ahngpa Og ahngching, chingnyulan hüyange iman neikon-e ngohpu kahmük khongkümpu pha.

³⁴Hüyange Gad nokphonge meipe latyangpu chingnyu Dibon, Ataroth, Aroer,

³⁵Artroth Shophan, Jazer, Jogbehah,

³⁶Beth Nimrah hüyange Beth-haran, nyoilan me ling; hüyange nyeelan jingne nokwe.

³⁷Hüyange Reuben nokphong lan-e Heshbon Elealeh, hüyange Kiriathaim ling;

³⁸hüyange Nebo, hüyange Baal Meon, (tüopa min jeilei) hüyange Sibmah ling. Hüyange iman-e lingpu chingnyu lante min üla nyik.

³⁹Hüyange Manasseh üha Machir puhulan-e Gilead te taiye chinghah, tüome ngohpu Amorlan jange teiyange kahmük-a nyieyeyah.

⁴⁰Tüokhei Mosawe Manasseh üha Machir puhulante Gilead pha, hüyange tüome iman ngoh.

⁴¹Hüyange Manasseh nokphong mepu Jair tai hüyange chingshaolan ütam hah, hüyange tüolante “Jair chingshaolan” she mintam.

⁴²Hüyange Nobah-e Kenath hüyange tüome ngohpu chingnyulan chinghah hüyange tüolante I min me Nobah she nyik-e tam.