Read Konyak Naga LUNGTET 34 Bible Online

LUNGTET 34 - Konyak Naga bible

LUNGTET 34

¹Youngwanpawe Mosate ngaowe i,

²“Israel kahtalante ngaotüoh hüyange imante itüoh, Aope numan Taowe phapu Kanan kahtokte onglakeih, numan jingne menglak kahmük yikenglan-a hüke ngohlak;

³numan jing heyekao yikenga Zin phaonyu jong mepu Edom yikeng püowe ngoilak. Heong yeme tüopa ükong wangpuwa hüm yengching heyekao üküm ngoiye ngohlak.

⁴Tüophei me tüopa-a heyekao te Akrabbim lamkeng yete lüppe yelak, hüyange Zin lam yete tailak, hüyange Kadesh Barnea heyekao me laklak; hatüo Hazar Addar ngoiye hüyange yelakpe Azmon ngoiye tailak;

⁵Hüyange Azmon me yikenga Egypt kahjee yete lüplak, hüyange Mediterranean yengching me ngoiye laklak.

⁶“Henyip yekao yikenga Mediterranean yengching yengnah ngoiye ngohlak; tüopa-a nangjing henyip yekao yikeng.

⁷“Apyekao yikenga Mediterranean yengching üyong mepu ümee hüowe onge Hor Kahtang ngoilak,

⁸hüyange Hor Kahtang mepu Leba Hamath Lamkeng ngoilak. Tüopa mepu Zedad ngoiye

⁹hüyange Ziphron ngoiye yelakpe tailak hüyange Hazar Enan me laklak; tüopa-a nang jing apyekao yikeng.

¹⁰“Heongye yikeng jingne numan-e Hazar Enan mepu Shepham ngoiye yepinlakpa ümee lingtüoh.

¹¹Hüyange yikenga yelakpe ta-e Shepham mepu Riblah Ain heongyekao ngoiye, hüyange Kinnereth yengchingha ünah heongye kahtang ngoiye,

¹²tüophei me heyekao me Jordan Yengyin püowe Yengmang (Hüm yengching) ngoiye talak. Tüolan-a numan kahtok ünuk peli yekao tepu yikenglan ne ngohlak.”

¹³Tüophei me Mosawe Israel lante ngaowe tam-e i, “Hatüo hüke phongyeng yange hangke ngoi hüke numan nokphong tu phei me tangkhüw lan-e tam-e yahlak jingne Youngwanpawe numante phawe tampu kahmük ngohnang.

¹⁴Hangjingne Reubenlan nokphonglan hei Gadlan nokphonglan hüyange Manasseh nokphong tangkhüw jingne iman-e yoi mothlei yahteki.

¹⁵Nokphong ni phei me tangkhüw-e Jordan kaiye heongye Jerikho ngoiye, heong yeme iman mothlei yahteki.”

¹⁶Youngwanpawe Mosate i,

¹⁷“Elea-zar ngengpa hüyange Nun üha Joshua niye kahtalan jingne kahmük-a tamme phalak.

¹⁸Üne-o tüopa tamwante imnite jamlak nanjingne nokphong lili mepu woipa japong yahlak yang.

¹⁹Youngwanpawe lepu kahtalan min-a tüolan ngohnang; Judah nokphong mepu Jephunneh üha Caleb.

²⁰Simeon nokphong mepu Ammihud üha Shemuel.

²¹Benjamin nokphong mepu Kislon üha Elidad;

²²Dan nokphong mepu Jogli üha woipa Bukki.

²³Joseph hayimlan yo mepu; Manasseh woipa nokphong mepu Ephod üha Hanniel.

²⁴Ephraim nokphong mepu Shiphtan üha woipa Kemuel.

²⁵Zebulun nokphong mepu iman hayim woipa Parnach üha Elizaphan.

²⁶Issakhar nokphong mepu Azzan üha woipa Paltiel.

²⁷Asher nokphong mepu Shelomi üha woipa Ahihud.

²⁸Naphtali nokphong mepu Ammihud üha woipa Pedahel.

²⁹Kanan kahtok me mothleilak Israel kahtalan aoyinte teitamme yahlak Youngwanpawe tam, tüolan-ne ngoh yangki.”