Read Konyak Naga LUNGTET 35 Bible Online

LUNGTET 35 - Konyak Naga bible

LUNGTET 35

¹Jordan janyekao Moab kahjee Jerikho me Youngwanpawe Mosa te i,

²“Israellante iman-e tüopu kahmük mepu Levilante ngohlak chingnyu phatüoh she ngaotam tüoh; hüyange chingnyu lan neikonpu me hahnyoi kahmüklan-o phatüoh she itüoh.

³Iman ngohlak jingne chingnyulan-a ngohlak, hüyange hahnyoi kahmüklan-a iman-e tampu yinmok, iman mothkat, hüyange yinmok yinha khongkümpu jingne menglak.

⁴Nange Levilante phapu chingnyu me jeppe hahnyoi kahmük-a chingnyu pe ü-atye khongkümpu neikon-e yakkong haja ja ngohlak.

⁵Tüokhei nange chingnyu ü-atye heongye jingne yakkong haja ni shemtüoh, hüyange heyekao jingne yakkong haja ni, hüyange henyipye jingne yakkong haja ni, hüyange apyekao jingne yakkong haja ni , hüyange chingnyu-a hotan me ngohlak. Iman chingnyulan jingne tüolan-a hahnyoi kahmük ne menglak.

⁶“Numan-e Levilante kahta ütam-e yeshingpe kahta ütam toiwante taiye lolak chingnyu wok phalak yang. Tüolan tokte paowe, imante ülao chingnyulan üne-o deli me ni phalak yang;

⁷tüolan phei iman jingne hahnyoi kahmük-o omlak, khongkümpu sheitüoh me chingnyu deli me tet ngoilak.

⁸Hüyange chingnyulan jeng, hanghepa numan-e Israel kahtalan jing mepu phayalakei, sheyong she numan-e yahtüoh, hüyange sheshoipupa tepu sheshoi she yahtüoh; ja-o ja-o yoi mothlei tüopa phei shuwe chingnyulan-a Levilante phalak yang.”

⁹Youngwanpawe Mosate i,

¹⁰“Israel kahtalan te ngaotüoh, hüyange iman te itüoh, Aope numan-e Jordan kaiye Kanan kahtokte yulakei,

¹¹hüwante kahta ütamme püohpin-e ütam toima-a, kahta toipa tüome lolak jingne numan-e numan jingne lowe oklak chingnyu letüoh.

¹²Tüome ngohyange Iye toiye tampu kahta pheipulan-e phuh hahne yampu mepu yinne lowe ngohpu oklak. Kahta ja toitam yangpu kahta-a ükhong sheshao me ngao manphün pute li ne yetam lak yang.

¹³“Tüokhei chingnyu wok ngoiye lojing chingnyu ne leyange angtüoh.

¹⁴Chingnyu lüm-a Jordan heong yeme hüyange chingnyu lüm-a Kanan kahtok me. Tüolan-a lowe oklak chingnyu ne ngohkülak.

¹⁵Israel kahtalan jingne, kahhenglan jingne, hüyange iman yo me neakyange ngohpalan jingne tüolan chingnyu wok-a lojingne ngohkülak; hüke kahta aowe püohpin-e kahta ütam toiyalakei, tüome taiye lolak.”

¹⁶“Hüpoi yoi mepu yansho ütam-e Ite shütma-a, hüke I lima-a, I kahta toipa ngohnang; kahta toipa-a ütingme li ne tamlak yang.

¹⁷Yejema-a Iye yak me kahta lilak ne long ütam jonyange Ite shüpma-a, hüyange I lima-a, I kahta toipa ne mengnang; kahta toipa-a ütingme li ne tamlak yang.

¹⁸Yejema-a Iye yak me pesho ütam jonyange lilak ne shütma-a, hüyange I limah ma-a, I kahta toipa ngohnang. Kahta toipa-a ütingme li ne tamlak yang.

¹⁹Kahta toipa toitamlak ne ngaima-a lipupa pheipu kahtalan yo mepu shejawe toilak yang. Aope Iye ngeyalakei, hüwante I-a toitamlak yang.

²⁰“Hüyange teinupu kaiye Ite lütte tampu ne mengma-a, yejema-a tanne ngoh-e Ite shüppe tamküma-a, hüyange I lima-a,

²¹yejema-a teikhahpu kaiye I yak tümp phei tüpma-a, hüyange limah ma-a, aowe Ite shüt, ütingme I li ne tamlak yang; I kahta toipa ngohnang: phuh hahpalan-e aope I hüolakei, kahta toipa-a Iye li ne tamlak.

²²“Hüpoi teikhahpu yenangpe mokhshe Ite tüppe tamküma-a, yejema-a tanne yengohpe ülam jawe Ite shüppe tampu ne mengma-a,

²³yejema-a I ye-ngepe kahta lilak ne long ütam-e Ite shüppu ne mengma-a, hüyange I limah ma-a, hüyange I wepa ne-o yeje, yejema-a Ite ümeng linglak yeyam;

²⁴hükihpu ngaima-a ükhonge, phuh hahhuwe teihpupa phei yeje, kahta toipa tingpu ne linge phuh yehahne ngao phünne tamlak yang.

²⁵Hüyange phuh hah hupu kahta yak mepu ükhonge kahta toipa-a yinne anglak yang, hüyange I taiye ngohpu lojing chingnyu te ükhonge I woiye peiye tüohlak; hüyange üjao minngawe phowe jaowe tampa ütahpa Ngengpa manli manli I tüome ngohlak.

²⁶Hüpoi I phette taijing, lojing chingnyu yikeng kaiye kahta toipa-a aope tailakei,

²⁷hüyange iy phuh hahpu pawe lojing chingnyu yikeng kaiye I ngeye, kahta toipa-a toima-a; I iy yinpu jingne ümeng yengohlak.

²⁸Hangjingne Ütahpa Ngengpa manli manli Iye lojing chingnyu me ngohlak ne ngoh shihpu; hüpoi ütahpa ngengpa liphei me kahta toipa-a yoi moth tangte leih yelak.

²⁹“Tüolan toishaowa numan jin küm-e numan ngohjing khongkümpu me jinte wanglam ne menglak.

³⁰“Aowe kahta toilakei, kahta toipa-a sakipalan kahta ni hei lüm ju kaiye I toilak; hüpoi kahta aowe-o saki phapa kahta ja hei ngaiye phapu ne mengma-a, I li ne yetamlak.

³¹Kahta toipa-a li ne hei tamlak. Ngin phayange I lilak mepu yinne ye-ok lak.

³²Kahta ja lojing chingnyu te phette taiye lopu ne mengma-a, Ütahpa Ngengpa manli manli tüoken mepu I lüowe ngailak jingne ngin phane tahtam.

³³Numan-e hüke linge tampu ne mengma-a, numan ngohpu kahmük numan-e nuwe tamnang. Hangjingne kahmük nuwe tampuwa iy ngaitampu kaiye ngohnang; aowe iy shai tüopa iy tokte kaiye, kahmük me iy shaipu jingne ünu tantamlak hango yelinglak yang.

³⁴Hüyange numan ngohpu kahmük numan-e nuwe yetamlak yang! Hangjingne Taowa Youngwanpa hüyange Taowa Israel kahtalan yo me ngohnang.”