Read Konyak Naga LUNGTET 4 Bible Online

LUNGTET 4 - Konyak Naga bible

LUNGTET 4

¹Youngwanpawe Mosa hei Aaron nite ngaowe i,

²“Ülao Levilan mepu yoi yoi ne Kohathlan iman nyahtüp nyahtüp hüyange noksalan shangtoi itüoh;

³hüyange wangpeng delüm mepu wangpeng denga lwngmei te ngoiye netanlan khümjing nyenok me toi linglak jingne aoyin toite yahlakne wangnang khongkümpu nyantüoh.

⁴Shejaopupa toishao jingne khümjing nyenok me Kohath hayimlan toishao ngohnang.

⁵“Aope lakjing nyoi sheihlak ne hipak peilakeih, Aaron hüyange I hayimlan nyenok ümongte onglak yang, hüyange jiengjeppu ghonu sheshao mepu jhotnye khokke yahlak yang hüyange tüopawe ghonu te yüohlak yang.

⁶Iman-e tüopa tangme meisho shemeipupawe büanglak yang, wanghüng inkhek jawe tüopa tangme yüoh lak, tüophei me pailak jingne sheam lelak.

⁷“Tüopa Youngwanpa jingne an dopu khao tangme wanghüng inkhek ja nyamlak yang hüyange tüopa tangme sheng ja, sünyet yankhong ja, dopu phapu yankhong ja, hüyange wuwüngti dolak jingne yengsheng ja, she anglak yang. Khao tang me hipak phe me an angyange ngohlak.

⁸Iman-e tüolan khongkümpu tangme taakpu inkhek-e yüohyange anglak, tüopa tangme üne-o shemeipupa meishowe yüohlak, hüyange tüophei me sheam leyange anglak yang.

⁹“Hüyange wanghüng inkhek ja yahpuwe vüntük phei ngohpu vüntük yongjing, jeplak, sheng, hüyange olive minnga shokke angpu tüolan khongkümpu tangme yüohlak yang.

¹⁰Iman-e tüopa-a shemeipupa meisho me tüolan toinan khongkümpu beilak hüyange tüolan-a pailak sheam me ange tamlak.

¹¹“Tüophei me iman-e hon wümjong tangme wanghüng inkhek ja yahpuwe yüohlak, tüopa khongkümpu te büange shemeipupa meishowe yüohtamlak; hüyange tüophei me pailak sheam leye tamlak.

¹²Üjao Nyoi me jonpu tük hei sheng khongkümpu iman-e yahlak, hüyange tüolan-a wanghüng inkhek me beilak, hüyange tüolan tangme shemeipupa meishowe büanglak, hüyange tüolan-a sheam tangme ange tüohlak.

¹³Hüyange iman-e wümjong mepu jeilehpu vünla winlak yang, hüyange tüopa tangme phutti inkhek-e yüoh tamlak yang.

¹⁴Hüyange iman-e tüopa toishao jingne jonpaipu tük hei sheng khongkümpu tüopa wümjong tangme anglak: muktük, tüpshan, kahhoklak, hüyange yankhong, hüyange wümjong tük hei sheng khongkümpu; hüyange tüopa tangme iman-e shemeipupa meishowe yüohlak, hüyange tüopa tangme pailak sheam shalak.

¹⁵Aope Aaron hei Ihalan-e toinan khongkümpu tüm me shoyange lakjing khok-e sheih tailak hipak peilakeih, tüopa tangme büange tümyang phei me, Üjao toinanlan ki teilak jingne Kohath puhulan peilak. Kohath puhulan-e üjao toinanlan hanghe te-o yeletlak, letyahma-a iman lilak. “Tüokhei tüolan-a hangkih tingme khümjing nyenok sheih lakei, Kohath puhulan hangki ne menglak.

¹⁶“Aaron ngengpa üha Eleazarwe vüntük jingne minnga, sünyet, ülick dopulan, pholak minnga, hüyange Youngwanpa te jaowe tampu khümjing hüyange tüopa me ngohpu khongkümpu, khümjing nyoi hüyange tüopa toi nan khongkümpu tangme yakjongpa ne menglak yang.”

¹⁷Tüophei me Youngwanpawe Mosa hei Aaron nite ngaowe i,

¹⁸“Kohath nokphong puhulan Levilan mepu lange yewinlak jingne numan-e leitüoh.

¹⁹Hükih-e ngailak mepu tienlak jingne Aaron hüyange Ihalan ümongte onglak yang, hüyange kahta pümlep pute I toishao hüowe tamlak yang hüyange Iye hanghe kipailak iye tamlak yang.

²⁰Hüpoi Kohathlan khümjing nyenok mongte ongyange, yayonge sheih tailak jingne ngengpalan-e Üjao toinanlan tümtapute leima-a, iman lilak.”

²¹Youngwanpawe Mosate ngaowe i,

²²“Gershon nyahtüp nyahtüp hüyange noksalan shangtoi itüoh.

²³Wangpeng delüm mepu wangpeng denga lwngmei netanlan khümjing nyenok me toi linglak jingne aoyin toite yahlak ne wangnang khongkümpu nyantüoh.

²⁴Gershonlan shaoshanpu-a tüolan toinan kipailak jingne namnolak:

²⁵Khümjing nyenok, tüopa ümongye me shonglak, tüopa ü-at yeme shonglak, tüopa ütok ye me küplak shemeipupa meisho, tafün ye jingne jhotnye,

²⁶jhotnyelan hüyange khümjing nyenok hei wümjong neikonpu gho jingne wulan, gho tafünye jingne jhotnye, hüyange tüolan toinan khüpkhanglak toinan khongkümpu pailak. Tüolan toishao khongkümpuwa iman-e jonne pailak.

²⁷Gershon hayimlan-e linglak toishao khongkümpu, iman-e kilak hangki khongkümpu me hüyange iman-e linglak ne ngohpu khongkümpu me, Aaron hüyange I hayimlan-e ngaophawe tampu kih-e lingya leilak yang.

²⁸Tüolan-a Gershon puhulan-e khümjing nyenokte paowe tüklak toishaolan ngohnang; iman-e tüolan-a Aaron ngengpa üha Ithamarwe hangke hüowe tam hüke kipailak yang.”

²⁹“Merarilan jingne, iman nyahtüp nyahtüp hüyange noksalan shangtoi itüoh,

³⁰wangpeng delüm mepu wangpeng denga lwngmei netanlan khongkümpu khümjing nyenok me toi linglak jingne aoyin toite yahlak ne wangnang khongkümpu nyan tüoh.

³¹Iman-e hatüolan toishao namnowe kipailak: pelao, wenaolan, shonglan, hüyange khümjing nyenok yajenth,

³²hüyange khümjing nyenok neikonpu gho tepu shonglan, yajenthlan, hanlaglan, hüyange wu, tüolan phei tüopa khüpkhanglak toinan khongkümpu phei kipailak. Kahta püm lep puwe yoiye hanghe pa toinan kipailakei tüopate namnolak.

³³Tüolan-a khümjing nyenok shaoshanpu me Merari puhulan iman-e namnopu toishaolan ngohnang: Iman-e tüolan-a Aaron ngengpa üha Ithamarwe hangke hüowe tam, hüke kipailak.”

³⁴Mosa hei Aaron hüyange ükhong woipalan-e Kohathlan iman puhulan iman nyahtüplan, iye lei;

³⁵Khümjing nyenok me toi linglak jingne aoyin toite yunang, kahta lili wangpeng delüm mepu ütokye wangpeng denga ngoipu mong;

³⁶hüyange aoyin nyahtüplan iye lei, tüolan-a haja ni gho nyit denga ngoh yangki.

³⁷Mosa kaiye Youngwanpawe ngaowe tampu kih-e, Kohath nyahtüplan khümjing nyenok me toi lingpalan khongkümpu Mosa hei Aaron niye iyeleipu iman tüolan ngoh yangki.

³⁸Gershon hayimlan iman nyahtüp hüyange noksalan iyeleipuwa,

³⁹khümjing nyenok me toi linglak jingne toite yupu kahta lili wangpeng delüm mepu ütokye wangpeng denga lwngmei,

⁴⁰hüke iman nyahtüplan, noksalan iyeleipu haja ni gho wok delüm ngoh yangki.

⁴¹Youngwanpawe ngaowetampu kih-e, khümjing nyenok me shaoshanpu khongküm Gershon hayimlan iman nyahtüplan, noksalan Mosa hei Aaron niye iyeleipu khongkümpu tüolan ne ngoh yangki.

⁴²Merari hayimlan iman puhulan hüyange iman nyahtüplan iyeleipuwa,

⁴³khümjing nyenok me toi lingne toishao te yupu kahta lili, wangpeng delüm mepu wangpeng denga ngoiye,

⁴⁴hüke iman puhulan shangtoi iye leipuwa haja lüm gho ni ngoh yangki.

⁴⁵Mosa kaiye Youngwanpawe ngaowe tampu kih-e, Merari hayimlan iman puhulan Mosa hei Aaron niye iyeleipu me tüolan ngoh yangki.

⁴⁶Mosa hei Aaron hüyange Israel woipalan-e Levi puhulan hei nyahtüp khongkümpu iye leipu me,

⁴⁷khümjing nyenok me hangki yih kilak toishao, hüyange shaoshanlak toishaote yupu kahta lili wangpeng delüm ütok ye mepu wangpeng denga ngoipu lwngmei,

⁴⁸hüke iman iyeleipu haja tet, gho nga detet ngoh yangki.

⁴⁹Kahta lili yoi yoi toishao hüyange yoi yoi hangki yih jingne Youngwanpawe ngaowe tampu kih-e Mosa kaiye leyetam; hüke Youngwanpawe Mosate ngaowe tampu kih-e iman iyelei yangki.