Read Konyak Naga LUNGTET 5 Bible Online

LUNGTET 5 - Konyak Naga bible

LUNGTET 5

¹Youngwanpawe Mosate ngaowe i,

²“Ngondak pheipu kahta lili, üdi yünne ngohpu kahta lili, hüyange mangte letpu kaiye nuwe tamyangpu kahta lili iman lakjing mepu jange teitüoh she Israel kahtalante ngaokeng phatüoh.

³Mengpu wanglam ngaokeng me yejao yeshapu kahtalan khongküm yanne tamtüoh, hümme nakshih ümeken me ü-kahtalan yo me Tao ngohnang tüopa lakjing iman-e nuwe yetamlak.”

⁴Tüokhei Israellan-e ngao jai, hüyange Youngwanpawe imante ngaowe tampu kih-e iman khongkümpu lakjing mepu jange teiyangki.

⁵Youngwanpawe Mosate ngaowe i,

⁶“Israellante itüoh; Aope netan yejema-a sheko jawe Youngwanpate ütinglakpu menge kahta wanglamme ünu ütam om ma-a, hüyange tüopa kahta ümengne ngohma-a,

⁷Iye ompu ünuwa janlak yang, hüyange püohpu khongküm shümme yelak yang, hüyange aowe lye ümeng ling, Ite meitam da phong ünyei paoyange shümme yelak yang.

⁸Hüpoi aohipate püohpu jingne shümme yelak ngoh, I lima-a, hüyange I phei pulan ao-o yenangma-a, tüopa-a ngengpa jingne menglak ne Youngwanpate phalak yang. Tüopa phapuwa kahtawe püohyangpu jingne jaotamlak jingne khümwümpu me jonpu nyeepong tokte paowe phapu ne ngohnang.

⁹Israel lan-e hanghepa shemeipupa dopu Youngwanpate shai jempu khongküm, tüolan-a iman-e aoyin tangte yahpei tüolan ngengpalan jingne menglak.

¹⁰Ngengpa liliye I tangte yah peipu dopulan I jingne menge anglak.”

¹¹Youngwanpawe Mosate ngaowe i,

¹²“Israellante tüopa nyüoweleipu phatüoh, kahta ütam jing shekonyu yejepu lamte taima-a hüyange I kaiye mong yehümlak ünu om ma-a,

¹³hüyange kahta ütam-e yha phei phwng ngam, hüyange hatüo yhawe yoi netanpa sheshao mepu lowe angma-a, hüyange yha yoi nying nyingke nuweshak teiye ngohyange-o yha yepho okma-a, hüyange yha kaiye saki yenangma-a, yhate yakke tükke yepho okpu jingne;

¹⁴hüyange mong yehümpu yaha Ite peima-a, hüyange yoi shekonyu aowe yoi nying nyingke nuweshak, yha te Iye mong yehu ma-a; yejema-a mong yehümpu yaha Ite peima-a, hüyange Iye yoi shekote I mong yehu ma-a, yha nying nyingke yenuyeshakpe ngohyange-o;

¹⁵hüma-a tüopa kahtawe yoi shekonyu ngengpa tangte yah peilak yang, hüyange yha jingne barley ankhoih kilogram ja penphong meitam, hüyange yha jingne dopu peilak yang; Iye tüopa me olive minnga yenyetlak yang, yejema-a, tüopa tangme sünyet Iye ye-anglak; hangjingne hatüowa mong yehümpu hahying dopu ngohnang, ünu teihtüone tamme teih tüolak jingne hahying dopu ngohnang.

¹⁶“Ngengpawe shekonyuwa yah peilak hüyange yha-a Youngwanpa sheshao me yongne tamlak.

¹⁷Hüyange ngengpawe tükmei ja mepu üjao yeng yahlak, hüyange khümjing nyenok taleng me ngohpu kahmak yahlak, hüyange hatüo khahtamlak jingne yengme hüngtamlak.

¹⁸Hüyange ngengpawe shekowa Youngwanpa sheshao me yonge angyange, shekonyu shangmepu shangmin lantamlak, hüyange yha yak me teih tüolakpa hahying dopu jonne tamlak, hatüowa mong yehümpu hahying dopu ngohnang; hüyange ngengpawe yha yak me phoiwümme tampu ükhah yeng jonne ngohlak yang.

¹⁹Hüyange ngengpawe yhate jiengjepne tamme yhate ilak, ‘Nang phei kahta ao-o yeshiyangpu ne, hüyange nang netanpa phang me ngoh-e nange ünu linglak jingne ünyong yete yetaipe ngohpu ne mengma-a, phoiwümpu shahpu ükhah yeng mepu nang yanpu oktüoh.

²⁰Hüpoi nang netanpa phang me ngohyange nang ünyong yete taiye ngohma-a, hüyange nang nuyange ngohma-a hüyange nang netanpa tokte kaiye kahta ütam phei phwngngampu ling ngohma-a;

²¹shekonyute phoiwümpu ngao iye’ ngengpawe yhate ilak, ‘Youngwanpawe nang leppu ja ne mengtam tüoh, nang yungkeng jüppe hüyange nang sea peak-e Iye nang kahtalan yo me phoiwümnyu ne mengtam tüoh;

²²phoiwümme tampu yeng hatüowa nang yungkeng jüppe hüyange nang sea peak-e nao nyoite ongtam tüoh.’ Hüyange shekonyuwe janlak, ‘Amen, Amen.’

²³“Hüwante ngengpawe phoiwümpuwa laitep ja me nyanlak, hüyange hatüowa ükhah yenge poiye teine tamlak.

²⁴Hüyange Iye shekonyu te ükhah yeng yingne tamlak tüowe yha te phoiwümpu shahlak, hüyange hatüo phoiwümpu yeng yha te onglak hüyange yha te yeonge khah-e daklak.

²⁵Hüyange ngengpawe mongyehümpu hahying dopu shekonyu yak mepu yahlak, hüyange Youngwanpa sheshao me hahying dopuwa yakyüplak, hüyange hatüowa wümjong te yah peilak.

²⁶Hüyange hatüo teihtüolak nanjingne ngengpawe hahying dopuwa yakpoih ja maawe jonlak, hüyange hatüo wümjong me jaklak, hüyange phei me yeng-a shekonyu te yingne tamlak.

²⁷Hüyange aope Iye yha te yeng-a yingne tamlakei, yha nuyange ngohma-a, hüyange yha netanpa kaiye ünu omme ngohma-a, phoiwümme tampu yeng-a yha te onglak hüyange khah-e ngailak, hüyange yha sea bunglak hüyange yha yungkeng jüppe mahlak; hüyange shekowa yoi kahta yo me phoiwümpu ja ne menglak.

²⁸Hüpoi shekonyu yenupe jaowe ngohpune mengma-a, yha te hangko yesheilak, hüyange yhawe üne-o nao puhlak.

²⁹Hatüowa mong yehümpu ngaokhüm ngohnang, aope shekonyuwe yoi netanpa phang me ngohyange yeshupu lamte kemme nuwe ngailakei;

³⁰yejema-a netanpate mongyehümpu juteih ja peiye, I shekonyu te mong yehümpe ngailakei, hüwante Iye shekonyuwa Youngwanpa sheshao me angtamlak, hüyange ngengpawe tüopa ngaokhüm khongkümpu yha te linglak.

³¹Hüwante netanpa-a ümeng yenangpe ngohlak, hüpoi shekonyuwe püohyange ngohma-a yhawe ümeng kilak.”