Read Konyak Naga LUNGTET 6 Bible Online

LUNGTET 6 - Konyak Naga bible

LUNGTET 6

¹Youngwanpawe Mosate ngaowe i,

²“Israellante ngaotüoh: Aope netan jeyah, sheko jeyah, yoi nying nyingke Youngwanpa jingne Üjao Üyin ngohlak janyange hüyange yoi nying nyingke Youngwanpa te phünne pha,

³yoi nying nyingke yu hüyange joklak mepu yanlak yang. Iye wuwünglick mepu linge ngaipu yinglak hango yeyinglak yejema-a wuwünglick hei wuwünglick üwan hango yehahlak;

⁴I üjao üyin ne ngohpu mongme, wuwüngwu me ngaipu hango, wuwünglick üyeng yejema-a üsho nehoi hango yehahlak yang.

⁵“Üjao üyin me ngohne Iye janpu hipak mongme, Iye shang yelinlak yang. Iye Youngwanpate jaowe tampu kih-e hipak nopu me Iye janpuwe sayange ngohlak, hüyange Iye yoi shangmin laowe ngaine tamlak.

⁶“Iye Youngwanpa jingne phünne phawe ngohpu nyih khongkümpu me lipu mang ü-o-te I yewenlak yang.

⁷Ipa yejema-a Inyu, jeiheinao yejema-a nyanao liyapoi, iman yoi nying nyingke yenuyeshak lakyang; hangjingne ima-a Kahwangte I jaotam yangpu-a I shangtang me ngohnang.

⁸Üjao Üyin ne jaoweshawe ngohpu nyih khongkümpu me I-a Youngwanpate jaowe tam-e ngohnang.

⁹“Hüyange kahta ütam mokhshe I shongme lima-a, hüyange Iye jaoweshawe angpu shanga nu ne tama-a, nyih nyit shepu nyih me I shang linlak yang; tüophei me I jaowe ngailak.

¹⁰Hüyange tetshepu nyih me Iye awyei ni, yejema-a awshu üha ni ngengpa tangte khümjing nyenok tafün shongte yah peilak yang.

¹¹Hüyange ngengpawe ja-a ünu dopu jingne, hüyange ja-a jakke dopu jingne dowe I jingne ünu tantamlak; hangjingne lipu mange I ünu om hüyange tüonyih muh I shang jaowe tamlak yang;

¹²hüyange I jaowesha-e ngohpu nyih me Youngwanpa jingne yanne ngohlak yang, hüyange nyee üpongha ja wangpeng ja üha ünu dolak jingne Iye yah peilak yang; hüpoi sheshaoye me Iye Üjao Üyin ne ngohpu nyih hei hipak lan-a Iye nuwe tamyangpu jingne tüopa-a ipume ye-omlak.

¹³“Hatüowa Üjao Üyin ngaokhüm ne ngohlak; aope janpu hipak ngoiye peilakeih, I-a khümjing nyenok tafün shongte yah peilak yang,

¹⁴hüyange Iye Youngwanpate I dopu phalak yang, jakke dopu jingne wangja nao nyeepongha tushang yenangpu ja, hüyange wang ja nao nyee üpi ha tushang yenangpu ja ünu dopu jingne, hüyange nyee üpong tushang yenangpu ja chingmei dopu jingne dolak yang.

¹⁵“Hüyange do yenyütpu an küm ja, awkek an ankhoih olive minnga phei nyütpu an ü-oun ja, hüyange minnga phoyange do yenyütpu anpe, hüyange tüopa phei iman hahying dopu hüyange iman yinglak dopulan dolak yang.

¹⁶“Ngengpawe tüolan khongkümpu Youngwanpa sheshao me ünu dopu hüyange jakke dopu phalak.

¹⁷Hüyange nyeeponga do-yenyütpu an küm phei Youngwanpate chingmei dopu toiye dolak; tüopawe ngengpawe üne-o hahying dopu, hüyange yinglak dopulan phalak.

¹⁸Hüyange Üjao Üyin-e I shangmin-a khümjing nyenok tafün shongme linlak, hüyange üjao üyin shangmin-a, shüppe jempu dopu jakke ngohpu vün me jakne tamlak.

¹⁹“Jaotampu shanglin yang pheime, ngengpawe yange ngohpu nyeepong üphak-a yahlak, hüyange küm mepu jeilehpu anbung ja hüyange ankhüo ja phei üjao üyin ne ngohpupa yak me phalak.

²⁰Tüophei me ngengpawe tüolan-a shemeipupa hünghao ja ne Youngwanpa te phalak, tüolan-a ngaokhüm me ngengpa jingne mengpu nyeepong jing jakuh hei üyung tokte paopu ngengpa jingne üjaopa dopu ngohnang. Tüophei me Üjao Üyin ne wuwüngti yingne ok.

²¹“Hatüowa Üjao Üyin aowe jiengjeppu yahnang tüopa ngaokhüm. Youngwanpawe Iye dopuwa üjao üyin ne Iye jiengjeppu phei phinne, Iye phawe oklakpa meitam tokte kaiye; Iye jiengjeppu yahpu kih-e, hüke muh Iye üjao üyin ja ne I yanne ngohlak ngaokhüm kih-e linglak yang.”

²²Youngwanpawe Mosate ngaowe i,

²³“Aaron hüyange I hayimlante Israel kahtalante moimanpu phawante tüolan ngao jonlak jingne itüoh she i:

²⁴“Youngwanpawe nangte moiman tüoh, hüyange nang pao tük-e angtüoh;

²⁵Youngwanpawe nangte yayeng shüpshe hüyange nyakkenpu ngoh shih;

²⁶Youngwanpawe nang monghahpu phei leishih hüyange nangte chingmei phashih.

²⁷“Tüokhei, iman-e Israel kahtalan tang me moiman ja ne ü-min nyik-e tama-a, taowe imante moiman tamlak.”