Read Konyak Naga LUNGTET 8 Bible Online

LUNGTET 8 - Konyak Naga bible

LUNGTET 8

¹Youngwanpawe Mosate i,

²“Aaronte ngaotüoh, hüyange Ite itüoh: Aope nange vüntük angyalakei, vüntük nyit-e vüntük yongjing sheshao nyoilan me wangngai phalak ne anglak yang.”

³Aaron-e ngao jaiye ling; Youngwanpawe Mosate ngaowe tampu kih-e, vüntük yongjing sheshao ye me wangngai tamlak ne Iye vüntük pah.

⁴Hüyange vüntük yongjing jingne yahpuwa hon shaha phei yajenth mepu jupeng ngoiye yanmee-e heap-e lingpune ngoh yangki; Youngwanpawe Mosate hüopu yapi kih-e Iye vüntük yongjinga lingyangki.

⁵Youngwanpawe Mosate i,

⁶“Israel kahtalan yo mepu Levilan ngai tamtüoh hüyange iman jaowe tamtüoh.

⁷Hüyange iman jaowe tamlak jingne nange hüke imante lingtam tüoh; ünu tantamlak jingne jonpu yenge imante shaitam tüoh, hüyange iman pümtangta khongkümpute shanglin nyitte lintam tüoh, hüyange iman nyemo shaone tamtüoh; tüophei me iman wanglam phei khakshuwe jaolak.

⁸Tüophei me iman-e mahu üpong üha ja yah ne tamtüoh, hüyange tüopa hahying dopu jingne olive minnga phei nyütyangpu anhüng ükhai, hüyange nange ünu dopu jingne mahu üpong üha ülao ja yahlak yang.

⁹Hüyange nange Levilan-a khümjing nyenok sheshao me woipeilak; hüyange nange Israel kahtalan ükhong khongkümpu jemne tamlak yang.

¹⁰Aope nange Youngwanpa sheshao me Levilan yahpeilakei, Israel kahtalan-e iman yak-e Levilan shangme shünglak yang;

¹¹hüyange Israellan mepu shemeipupa hünghao dopu ja ne Aaron-e Levilan-a Youngwanpate jaowe tamlak, tüo kaiye iman-e Youngwanpa toishao linglak.

¹²Hüyange Levilan-e mahu üpong ni shang me iman yak-e shünglak yang; hüyange Levilan jingne ünu tantamlak ünu dolak jingne ja, hüyange ja-a jakke dopu jingne nange Youngwanpate dolak yang.

¹³“Tüophei me shemeipupa hünghao ja ne Levilan-a Youngwanpate jaowe tamtüoh, hüyange Aaron hüyange I halan-a iman tangme yak jongne menge tamtüoh.

¹⁴Hüke nange Levilan-a Israel kahtalan yo mepu yoi yoi ne tamtüoh; hüyange Levilan-a üjingne ngohlak.

¹⁵Hüyange nange iman üjaone menge jaowe tamyang phei me, iman-a khümjing nyenok me toi linglak jingne wangngoiye ngailak.

¹⁶Hangjingne, Israellan yo mepu üjingne shaoshanlak iman leye ngohnang; Israellan üwangne puhpu khongkümpu, aoyinne üwangne naonyoi ep, iman khongkümpu nanleiye üjingne iman Taowe yahteki.

¹⁷Hangjingne kahta hüyange yinmok üwangne puhpu moini-a, Israel kahtalan yo me khongkümpuwa üjing ngohnang; Egypt kahtok me üwangne puhpu toipu nyih me Taowe iman ü-jingne jaowe sha-e angteki;

¹⁸hüyange Israel kahtalan yo me üwangne puhpu khongkümpu nanleiye Taowe sha-a Levilan yahnang.

¹⁹Hüyange Israel kahtalan khümjing nokshaote owe peiwante imante shanghah shaoshiye yengoilak, hüyange Israel kahtalan ünu tantamlak jingne khümjing nyenok me Israel kahtalan jingne toi linglak jingne Israel kahtalan yo mepu Taowe Levilan Aaron hüyange I hayimte hünghao ja ne shaoshanne phayangki.”

²⁰Tüokhei Mosa hei Aaron, hüyange Israellan khongkümpuwe Levilante jaowetam-e ling; Levilan jeng Youngwanpawe Mosate ngaowe tampu kih-e Israellan-e ling.

²¹Hüyange Levilan-e iman nying nyingke ünu mepu jaowe shawe iman-e yoi nyemo shao; hüyange Aaron-e iman-a shemeipupa hünghao ja ne Youngwanpate jaowe tam. Iye üne-o iman-a mengpu wanglam kih-e üjaone menge lingetam.

²²Hüyange tüophei me Aaron hüyange I hayimlan sheshao me khümjing nyenok me toi linglak jingne Levilan ong; Levilan jeng Youngwanpawe Mosate ngaopu kih-e iman-e imante ling.

²³Youngwanpawe Mosate i,

²⁴“Ha-tüowa Levilan jingne hüke linglak ngohnang; wangpeng da me nga lwngmei hüyange ütokye me peiye iman-e khümjing nyenok me toishao te yulak;

²⁵hüyange wangpeng denga ngoima-a toishao mepu laklak, hüyange shaaji yelinglak.

²⁶Iman-e khümjing nyenok me yoi jeiheinaolan toishao me jampu ok, hüpoi toishao me shao yeshanlak. Tüokih-e linge nange Levilan-a toishao me shaoshan tamlak yang.”