Read Konyak Naga LUNGTET 9 Bible Online

LUNGTET 9 - Konyak Naga bible

LUNGTET 9

¹Israellan Egypt kahtok mepu ngaipu, nishepupa wangpeng üwangpa lekeng me, Sinai wanwüng jeng me Youngwanpawe Mosa phei ngaowe i,

²“Israel kahtalan-e lin taipu mo hipak khakshuwe nyoi tamtüoh.

³Tüopa leat penme peli shepupa nyih, ünpong hipak khakshuwe numan-e hatüo ngohlak yang; tüopa wanglam hüyange ngaokhüm khongkümpu kih-e numan-e hatüo ngohlak yang.”

⁴Tüokhei Mosawe Israel kahtalante i, numan-e lin taipu mo ngohlak yang.

⁵Hüyange Sinai wanwüng jeng me ünpong me iman-e üwangpa leat nyih penme peli shepupa me lin taipu mo ling; Youngwanpawe Mosate ngao phayangpu khongkümpu kih-e Israel kahtalan-e ling.

⁶Hüyangpoi kahta ütam-a kahta mang te letyangpu jingne yejaope ngaiye ngohpu jingne tüopa nyih me lintaipu mo yeyah ok, tüokhei tüolan-a tüopa nyih me Mosa hei Aaron ni sheshao te pei;

⁷hüyange tüolan kahtalan-e Ite i, “Kahta lipu mang ja te letpu jingne toman yejaope ngohnang; hüpoi Israel kahtalan phei hipak khakshuwe Youngwanpate dopu pha ne hangne toman-e ye-oklak shi?”

⁸Mosawe imante i, “Youngwanpa mepu numan jeng hanghe ngaowe tamkülakei taowe manjai manjai, numan-e tanne ngohkei.”

⁹Hüwante Youngwanpawe Mosate i,

¹⁰Israel kahtalante itüoh, “Numan kahta ütam yejema-a numan hayim ütam-e lipu mangte letpu kaiye yejaope ngohma-a yejema-a üjaite yin taiye ngohyapoi, tüoyangpoi Iye Youngwanpa jingne lin taipu mo ngohma-a,

¹¹ni shepupa leat penme peli shepupa nyih ünpong me iman-e hatüowa ngohlak yang; iman-e hatüowa do yenyetpu an hüyange ükhahwu phei hahlak yang.

¹²Tüopa-a iman-e ünepu nap ngoiye hango ye-anglak yang, yejema-a yinmok jing üwaan ja nehoi yepailak yang; lin taipu mo wanglam kih-e iman-e hatüo jonlak yang.

¹³Hüpoi kahta ao jaowe ngoh hüyange yinte yetaipe ngohyange, tüoyangpoi lin taipu mo yeyah, tüopa kahta yoi kahta mepu yanne tamlak yang, hangjingne tüopa kahtawe hipak khakshuwe Iye yoi dopu Youngwanpate yepha; tüopa kahtawe tüopa kaiye ngaipu ünu yoiye kilak yang.

¹⁴“Hüyange numan yo me yinpa ütam ngohma-a, hüyange Youngwanpate lin taipu mo ngoh huma-a, lin taipu mo hüyange tüopa ngaokhüm kih-e Iye linglak yang; yinpalan jingne hüyange nyupuh puhu jingne, moini jingne numan wanglam ja hei ngohlak yang.”

¹⁵Khümjing nyenok weshopu nyih me khümjing nyenok tangme wangphom yu hüyange wangphom-e nyeih yange ngoh. Wangnyakma-a wangphom-a vün kih-e ngeye ngohyangki.

¹⁶Tüokhei jinte hüke ngoh; nyihningma-a wangphom-e yüohyange hüyange yaningma-a vün kih-e ngoh yangki.

¹⁷Hüyange hangke tingme nyenok mepu wangphom yah teilakei, hüwante Israel kahtalan-e yayonge tai; hüyange ümeken me wangphom laklakei, tüome Israel kahtalan ne lakjing ling.

¹⁸Youngwanpawe phapu ngaome Israel kahtalan-e yayonge tai, hüyange Youngwanpawe phapu ngao me iman lak-e lakjing ling; hangshin me khümjing nyenok tangme wangphom ngohlakei teshinne iman lak-e ngoh yangki.

¹⁹Hüyange aope wangphom khümjing nyenok tangme nyih nangjange ngohlakei, hüwante Israel kahtalan-e Youngwanpawe ngaowe tampu jonne yayonge yetai.

²⁰Hüyange hipak hipak me-a wangphom-a khümjing nyenok tangme nyih ütenja ngoh yangki; hüwante Youngwanpawe ngaowe tampu kih-e iman-e lak-e ngoh, hüyange Youngwanpawe ngaowe tampuke iman-e yayong tai.

²¹Hipak hipak me-a wangphom-a yaning mepu napning ngoiye hei ngoh yangki; hüyange aope napning wangphom-a nowe inlakei, iman nünge yayonge tai; hüke hangki tingme wangphom-a nowe inlakei, hüwante iman-e yayonge taiyangki.

²²Nyih ni jeyah, yejema-a lekeng ja, yejema-a wangpeng ja, wangphom-a khümjing nyenok tangme yüohyange ngohwante Israel kahtalan-e lak-e ngoh, hüyange yayonge yetai; hüpoi hatüo nowe inwante iman yayonge tai.

²³Youngwanpawe ngaowe tampu kih-e iman lak-e ngoh, hüyange Youngwanpawe ngaowe tampu kih-e yayonge tai; Mosa kaiye Youngwanpawe phapu ngaokhüm iman-e jonne ngoh yangki.