Read Konyak Naga MAIKA 1 Bible Online

MAIKA 1 - Konyak Naga bible

MAIKA 1

¹Judah me Jotham, Ahaz, hüyange Hezekialan ahngne ngohwante, Moresheth jila mepu Maikate Youngwanpawe tüopa ngaolan pha. Youngwanpawe Maikate Samaria hei Jerusalem jeng tüolan khongkümpu ütahte ngaiye tam.

²Tüopa jaiyah, numan jatlan khongküm! Youngwanpa Kahwange numan phei tüi-e saki ne menglak. Jaiyah! Iye yoi wangdang Khümjing mepu ngaonang.

³Leihuyah, Youngwanpa-a yoi üjao nyoi mepu yuküki; I yulak hüyange kahtang üshanglan me kemlak.

⁴Hüwante kahtanglan-a vün me pondi kih-e juwe mahlak; kahtang mepu yeng shokke taipu kih-e iman-a kahjeete shokke tailak.

⁵Tüolan khongkümpu ngailak hangjingne ima-a Israel kahtalan-e ünu om hüyange Kahwang phei tüi-e hokke we. Israel-e hokkewepu jingne ao te ümeng phalak? Samaria ahngjong chingnyu temuh! Judah me nuweshakke püohpinpu aowe, Jerusalem tüowemuh!

⁶Tüokhei Youngwanpawe inang, “Taowe Samaria kahko me heamme pongpu ja ne, wuwüngwu deipu nyoijing ja ne linge tamlak. Chingnyu longkhoih lan-a Taowe kahjeete shokke tailak, hüyange chingnyu nokjinga üko me ange tamlak.

⁷Tüopa mepu peshao toinyulan-a khongküm khoihnyaiye paiye tamlak, tüopa mepu khümjing üshoyüopalante phapu shemin lamphe-a vünne mahtamlak, hüyange tüopa mepu mounglan-a khongküm wüngmakke phonge winlak. Wümme khümpu me ühak kohyah-e Samariawe tüolan tüolaka wangpu, hüyange sha-a yhatepu wepalan-e ükenphe me yoppekhümlak jingne tüolan-a kiye teiye kümlak.”

⁸“Tüojingne tao shapyoonglak hüyange mangshaplak. Ümong mengpu hüolak jingne, tao yakeng me hüyange tangko me kemlak. Hiyan kih-e taowe waolak hüyange yengwüm awnyu kih-e shapyoonglak.

⁹Samaria makolan yemei oklak, hüyange Judah-o hüke muh shaoshi ne oteiye ngohnang; mahtamlakpawe Jerusalem peten ümeken me ü-kahtalan nyoi ngoiteki.”

¹⁰Teman-e ye-okpu jeng Gath me teman wepalante tah i, numan shappu imante ngene tahtam. Beth-leaphrah kahtalan, kahmak yo me lüppe shüppe numan monghümlakpa yenangpu hüotüoh!

¹¹Numan Shaphir kahtalan, tangko me hüyange wüotüopu phei phoweteipu me taitüoh. Zaanan me aoyin nyoi iman chingnyu mepu ngailak jingne mong tahyong. Aope numan-e Bethezel kahtalan mangshappu jailakei, tüoken me lojing yenangpu yang she numan-e shinglak.

¹²Maroth kahtalan toloimeilak jingne yeonge lahnyikke tannang, hangjingne ima-a Youngwanpawe Jerusalem Peten me mahtamlakpa yahpei.

¹³Numan Lachish me nyoipalan tongtoite koipong, mamlak jingne shatamtüoh. Numan Israel ünu konyah hüyange Jerusalem ünu omne tam.

¹⁴Hüyange sha-a, Judah kahtalan, Moresheth Gath bangchingte salam she itüoh. Israel ahnglan-e Achzib bangching mepu jampu yetüolak.

¹⁵Mareshah kahtalan, Youngwanpawe numan-a aowe numan bangching hahlak ne ngohnang tüolan wepalante phünne phalak. Dehepu Israel woipalan-a tailak hüyange Adullam longsa me lolak.

¹⁶Judah kahtalan, numan-e kenpu hayimlan jingne mangshappe numanjing shang linyah. Numan nying nyingke pongkon (langtan) lan kih-e shang koyah, hangjingne ima-a numan hayimlan-a numan mepu phowe teitephalak.